Read Angguruk Yali IMAMAT 7 Bible Online

IMAMAT 7 - Angguruk Yali bible

IMAMAT 7

¹NINIKNI Allahn Musa fam ele uruk lit, ”An Allah nangge palehonen nindi fanowap naptuk ane fahet kong toho emberuk lahiyon tu: Ap ekeyen Allah angge paleg lahiyon fahet og itmin ulug wam walug waharukon mondabi fano reg.

²Mondabi fano rehen wam waroho hubu lahaptukon paltuk ambeg o sabo fanowon alukeman ware fuhupmu imam inowen wam amep hubu lahaptuk ambeg walinggoho hik isil lahu.

³Hik isil lahureg imam inowen wam ahabuhug sei werehon men wam seiyangge amiyon men sei obog toho winon men kiyatni men anggirang piren men asimbulal men NINIKNI Allah fahet yalmin ulug wahureg hubu lahaptuk ambeg indok yale fuhu. Indok yaltuk lit Allah angge palehon fahet og uruhu.

⁶Wam unu ino Allah ngi regma usa ulug imam unumalikisi abon men o fanoman eneg naruk lamuhup.

⁷Aben siyag ane tirikik ulug wam walug waharukmu imam wam ino waroho esetuk lit Allah indi ahiyehap turukon inowen eneg naruk laruhu hag toho ap ekeyen Allah angge paleg lahiyon fahet og itmin ulug wam walug waharuk ambohom ino unu imam inaben naruk lamuhup.

⁸Wam ahap oho imamen ngi roho foroho laruhu.

⁹Ap ekeyen roti anggen helep fam wirahowon men, kubag fam wirahowon men, wiratuk angge tuwalehon ine angge besi wirihon fam wirahowon men walug waharukmu imam Allah olohotma emberukon inowen naruk laruhu.

¹⁰Roti anggen e zaitun ahaluwe men mangno roho tag turukon men, e ahaluwe embeselug tag turukon men Harunen ondohowonen endebuhubon arimanowen naruk lamuhup,” ibag.

¹¹Allahn Musa fam ele uruk lit, ”An HINIKNI Allah nolohotman wam naruk ane fahet emberuk lahiyon tu:

¹²Ap ekeyen Allah wel turuk lit olohotman wam nul puhu. Aren Allah fahet sebe roho embemin ulug roti anggen suwap turuk angge embeselug tag toho e zaitun ahaluwe mangno roho wirahowon men, e zaitun ahaluwe are roho wirahowon men, roti anggen fano roho lilibug tohon tag tebelug e zaitun ahaluwe mangno roho wirahowon men walug waharuk laruhu.

¹³Roti anggen suwap turuk angge men tag toho wirahowon oho walug waharuk laruhu.

¹⁴Walug waruhureg roti anggen wirahowon eke hag eke hag walug waruhu angge misig-misig NINIKNI Allah olohotma leho fuhu. Leho fuhu angge arimano imam wam amep Allah olohotma hililtukon inowen naruk laruhu.

¹⁵Wam Allah wel turuk lit olohotman nul perukon ino naruk lit sono nahukon ulug tor angge oho umbat ta fug angge o ino sambil eneg obog toho naruk lamuhup.

¹⁶Allah fam wam eke Hat holohotman nahuk ulug sali emberukon men, At olohotman nenehiyehen nul perukon men misihim naruk lit enehum ouken umbuhubon wereg halug likiyamon naruk lamuhup.

¹⁷O hinahanam welaruhu halug obog toho indokma yale feseruk lamuhup.

¹⁸O hinahaneg angge nahup halug NINIKNI Allahn yet isahureg indi siyag aruhumu An nolohotman saplangge nenggesama Anden inineyap enebuhuk fug puhu. Ap arimanowen saliyog nahubon fahet alem angginon unubam aruhu.

¹⁹Wam ino fam nungge-nungge siyahon tag teg laruhu halug tor angge oho na fug angge indokma yale feseruk lamuhup. Ap unubabut puhun toho werehon arimanowen eneg Allah olohotman wam naruk lamuhup.

²⁰Ap nungge-nungge siyahon ubam tag tehon ekeyen wam NINIKNI Allahn tohon ino nahu halug ap ino Allah umalikisi sehelimuwen elehap tuhup.

²¹Ap ano wam ano lebe ruruk angge winon ano siyag angge unubam tag tegma ap ekeyen tung isahureg wam ino nahu halug ap ino oho Allah umalikisi sehelimuwen elehap tubusuhup,” ibag.

²²NINIKNI Allahn Musa fam ele uruk lit,

²³”Israel inap hiyag isahunon tu: Wam sapi domba kambing sei nahup fug.

²⁴Wam warehon sei men olomeneyen watukon sei men oko walug nungge-nungge wiri feruk lamuhup angge famen tor angge oho nahup fug.

²⁵Ap san wam NINIKNI Allah fahet indokma yalukon sei naruk halug Allah umalikisi sehelimuwen elehap tubusuhup.

²⁶O kema-kema welamuhup ambehen wam amep men suwe amep men naruk lamuhup fug.

²⁷Ap san mep naruk halug Allah umalikisi sehelimuwen elehap tubusuhup,” ibag.

²⁸NINIKNI Allahn Musa fam ele uruk lit,

²⁹”Israel inap hiyag isahunon tu: Ap san NINIKNI Allah olohotman wam nul peruk halug wam nul perukon ino minggiroho NINIKNI Allah fahet emberuk laruhu.

³⁰NINIKNI Allah fahet embemin ulug wam sei men iliyapma men inggik fam seneko walug iliyapma ino hubu lahaptuk ambeg olohotma leho feruk laruhu.

³¹Leho fuhumu wam sei obog toho imam inowen hubu lahaptuk ambeg indokma yale feruk laruhu. Iliyapma ino imam arimanowen naruk lamuhup.

³²Wam uyug pikiron ino imam wam amep men sei men Allah olohotma emberukonen naruk laruhu.

³⁴Israel inaben NINIKNI Allah olohotman wam nul perukon fahet NINIKNI Allahn kong toho emberuk lit iliyapma men uyug pikiron men waminteg imam inaben nalusan og isamin ulug emberisi. Kong toho emberisireg Israel inap hiyag isaruk lit Harunen ondohowonen endebuhubon arimano imam in atuk sambilen tulug wam An nolohotman nul peruk lamuhubon iliyapma men uyug pikiron ino men og isaruk lamuhup ulug hiyag isarisi. Hiyag isarisi ane ari Israel inaben endebuhubonen endebuhubon arimanowen mondabi seneg lamuhup.

³⁷Ihiyon ari wam waroho yaltuk ane men, roti anggen Allah fahet emberuk ane men, siyag ane turukon Allahn elehap tukag ulug wam waroho hubu lahaptuk ane men, Allah anggengge palehonen og itmin ulug wam emberukon men, Allah olohotman wam naruk ane men, imam in eneptuk lit wam waroho hubu lahaptuk ane men fahet ihi,” ibag.

³⁸Ibahon ari NINIKNI Allahn Musa ino tom Sinai fam weregma hiyag itfag. Hiyag itfag ane ari hikit toho Musa inowen Israel inap tom Sinai alma lekma welatfahon unubam NINIKNI Allah fahet wam waroho hubu lahaptuk lamuhup ulug hiyag isibag.