Read Angguruk Yali IMAMAT 8 Bible Online

IMAMAT 8 - Angguruk Yali bible

IMAMAT 8

¹ NINIKNI Allahn Musa fam ele uruk lit,

²”Harun umalikisi men wol enepmihinteg imamen wan teg asum men e ahaluwe amben fanowon men wam sapi hunon siyag ane elehap turukon men wam domba yuhambukon piren men roti anggen suwap turuk angge embeselug wirahowon kubag elma werehon men oko walug

³o sabo fanowon sok kuruk ambeg iraham lalihipteg Israel inap obog toho palu arik wamusan wol enepmihin,” ulug hiyag itfag.

⁴NINIKNI Allahn hiyag itfag ane hikit toho Musa inowen tibagma Israel inap arimano o sabo fanowon iraham palu arik watfag.

⁵Watfagma Musan ele uruk lit, ”NINIKNI Allahn hiyag nitisi ane hikit toho timin ane yet niyalihip,” ulug hiyag isibag.

⁶Hiyag isibareg Musa inowen Harun umalikisi men an niraham maniyek ulug wol enepfareg enebe ik umag enepfag.

⁷Ik umag enepfareg sum undamon men ebemon men pahaluk alunggu ke pug turukon men sum amigmu hililip toho wan turukon efod ino men hun Harun wan tebelug pahaluk hag angge efod onggorikmu werehon ino ilili fibag.

⁸Ilili fibareg sum eke amigmu sukni felug enehangge hik turukon Urim men Tumim men sum ino elma kilabe fibag.

⁹Kilabe fibareg sum unggulmu langguk tebelug NINIKNI Allahn hiyag itfag ane hikit toho sum ino hondo roho ilahuwag fil enehangge emas fam wirihon ”NINIKNI Allah fahet” haharehon lombog tibibag.

¹⁰Ilili fibareg Musa inowen o sabo fanowon men undama foroho angge obog toho men Allah anggengge ulug e ahaluwe amben fano angge are ribibag.

¹¹Are reberuk lit e ahaluwe tor angge sabirenam hubu lahaptuk ambeg palimu hilili fibareg hubu lahaptuk ambeg haltuk angge obog toho men kou humon ik hinanggoho werehon men kou ino emberuk ambeg men oho are ribibag.

¹²Are ribibareg e ahaluwe tor angge Harun unggulmu are reberuk lit Allah amingmingangge welaruhun ulug unduhuk fibag.

¹³Unduhuk fibareg Musa inowen Harun umalikisi oho wol enepfareg NINIKNI Allahn hiyag itfag ane hikit toho sum enebemon imamen wan turukon men pahaluk men wan enepfareg sum ununggulmu langguk enepfag.

¹⁴Langguk enepfareg wam sapi hunon ino wibagma Harun umalikisi menen siyag ane turuk latukukon eleg amag ulug wam ino ininggik unggulmu imbibag.

¹⁵Imbibagma wam ino ware fibareg hubu lahaptuk ambeg fanowap timin ulug Musa inowen wam amep tor angge inggik tum fam hubu lahaptuk ambeg atog nganog teg ke fima-fima werehon are rebelug wam amep winon hubu lahaptuk ambeg alem ke hilili fibag. Ari roho turuk lit hubu lahaptuk ambeg aru Allah anggengge weregma siyahon ubam tag tehon obog toho eleg amag ulug fanowap tibag.

¹⁶Fanowap tibareg wam seiyangge amiyon men kiyatni men anggirang piren men asimbulal men hubu lahaptuk ambeg emberimu indokma yale fibag.

¹⁷Yale fibareg wam sapi unu obog toho men ahap men al yohet angge Israel inap wereg ambehen walug wilip atfareg NINIKNI Allahn Musa hiyag itfag ane hikit toho indokma yale fisibag.

¹⁸Yale fisibareg Musa inowen wam domba hunon indokma yalmin pibahon ino wibagma Harun umalikisi menen ininggik unggulmu imbibag.

¹⁹Imbibagma Musan wam domba ino waroho amep hubu lahaptuk ambeg walinggoho hilili fil libag.

²⁰Hilili fibareg wam ino senggelfareg wam senggeleg ino unggul men sei men hubu lahaptuk ambeg emberimu indokma yale fibag.

²¹Yale fibareg wam undamangge men ahinanggen men oho ik umako hubu lahaptuk ambeg emberimu indokma yale fibag. Yale fibag ane ari Musa inowen NINIKNI Allahn hiyag itfag ane hikit toho turuk lit wam ino waroho NINIKNI Allahn amben somug haruk lit fano pukag ulug hubu lahapfag.

²²Hubu lahapfareg Musa inowen Harun umalikisi men imam in enepmin ulug wam domba pirenehon ino Harun umalikisi onolohotma imbik watfagma ininggik unggulmu imbibag.

²³Imbibagma wam ino waroho amep tor angge oko walug Harun isanggo muluk pikit filon men inggik fuwap pikit filon men uyug tum pikit filon men are ribibag.

²⁴Are ribibareg Musa inowen Harun umalikisi oho an niraham maniyek ulug wol enepfareg wam ino amep tor angge wibareg inisanggo muluk pikit filon men ininggik fuwap pikit filon men unuyug tum pikit filon men are ribibag.

²⁵Are ribibareg wam domba ahabuhug sei werehon men wam seiyangge amiyon men kiyatni men anggirang piren men asimbulal men uyug pikit filon men wibag.

²⁶Wibareg roti suwap turuk angge embeselug wirako NINIKNI Allah olohotma kubag fam kilaboho imbibahon mase roho wirahowon eke men e zaitun ahaluwe are roho wirahowon eke men roti winon eke men wibag. Wibareg wam sei tam wibahon men uyug ino men emberimu imbik lahibag.

²⁷Imbik lahibahon arimano obog toho Harun umalikisi men ininggik indanggenma imbibareg NINIKNI Allah fahet umbul ulug At olohotma leho felihip ulug hiyag isibag.

²⁸Hiyag isibag ane ino hikit toho leho fibagma Musa inowen it ininggikmu imbibahon arimano obog toho oko walug wam tamon waroho hubu lahapfahon ino emberimu indokma yale fibag. Ari roho Harun umalikisi men imam in enepmin ulug indokma yaltuk lit NINIKNI Allahn amben somug halug fano pukag ulug At olohotma hubu lahapfag.

²⁹Hubu lahapfareg Musa inowen wam pirenehon ino iliyapma NINIKNI Allah olohotma leho fibag. Iliyapma leho fibahon ino fobik hat hinggareg namihin ulug NINIKNI Allahn Musa hiyag itfag ane hikit toho Musan tohon atfag.

³⁰Ari obog toho tibibareg Musa inowen e ahaluwe amben fanowon men mep hubu lahaptuk ambeg palimu hilili fibahon tor angge oko walug Harun umalikisi men enebeyet enesum wan tehonet Allah anggengge ulug it enebe men enesum wan tehon men fene hilili fibag.

³¹Hilili fibareg Musa inowen Harun umalikisi men unubam ele uruk lit, ”Wam pirenehon aru o sabo fanowon sok kuruk ambeg irahamen isag talihipteg NINIKNI Allahn hiyag nitisi ane hikit toho sok ino irahamen wam ino men roti kubag elma kilabehon men nalihip.

³²Obog toho nalihipteg henehum ouken embeselihibon wereg halug indokma yale feselihip.

³³Ari roho turuk lit o sabo fanowon sok kuruk ambeg iraham weregman eneg hup sabirenam aruhu. Hup sabirenam aruhumu imam in neneptisi ane obog atisi ulug o sabo fanowon embeselug lahup.

³⁴NINIKNI Allahn irisi ane hikit toho o yoho siyag ane hunubam werehon eleg amag ulug wam waroho hubu lahaptuk lahe hag toho hiren fobik oho turuk lamuhup.

³⁵Hit war amuhup tohon ulug NINIKNI Allahn hiyag nitisi ane hikit toho likiya hupmu o sabo fanowon sok kuruk ambeg iraham wereg lit Aren irisiyon hikit toho turukmen eneg hup sabirenam aruhu,” ulug hiyag isibag.

³⁶Hiyag isibagma Harun umalikisi menen NINIKNI Allahn Musa feneyen ibag ane ari obog toho turuk latfag.