Read Angguruk Yali IMAMAT 9 Bible Online

IMAMAT 9 - Angguruk Yali bible

IMAMAT 9

¹Hup sabirenam atfagma Musa inowen Harun umalikisi men Israel inap onowesi men wol enepfareg

²Harun hiyag utuk lit, ”Wam sapi umalik yuhambukon siyag teg elehon Allahn siyag ane elehap tukag ulug waroho hubu lahaptukon men wam domba yuhambukon fanowon waroho yaltukon men walug o sabo fanowon alukema watmihin.

³Watmihinteg hori Israel inap unubam hele uruk lit, ’Allahn siyag ane elehap tukag ulug waroho hubu lahaptukon wam kambing uwaliyon misig men, Allah fahet waroho yaltukon wam sapi umalik mo misig famon siyag teg elehon men wam domba umalik mo misig famon fanowon men walug watihip.

⁴Walug waharuk lit NINIKNI Allah olohotman nulon wam sapi misig men domba uwaliyon misig men, Allah fahet emberukon roti anggen men e zaitun ahaluwe tag tehon men walug watihip. Walug watihip angge arimano Allah fahet umbulmu o yoho eneg NINIKNI Allah hit henelukema inam arik watmisi,’ ulug hiyag isamihin,” ibag.

⁵Musan ibag ane ari hikit toho Israel inap obog tohowen Allah fahet umbul perukon walug watfareg NINIKNI Allah wel tul ulug o sabo fanowon owahalma unduhuk latfag.

⁶Unduhukmu Musa inowen ele uruk lit, ”NINIKNI Allah umbagpag turukon ino hit honolohotma inam arik watmisiyen Aren hiyag hesehek ane hikit toho tilihip!” ulug hiyag isibag.

⁷Hiyag isibareg Harun fam ele uruk lit, ”NINIKNI Allahn hiyag nisarisi ane hikit toho hubu lahaptuk ambeg iraham lamihinteg haren siyag ane turuk latikinon elehap tukag ulug Allah fahet wam waroho hubu lahaptuk lit eke indokma yalmihin. Yalmihinteg Israel inap aruman siyag ane turuk latuson Allahn ambolmayap tukag ulug wam eke waroho hubu lahapmihin,” ulug hiyag itfag.

⁸Hiyag itfagma Harun ino hubu lahaptuk ambeg iraham libareg siyag ane turuk latikikon Allahn elehap tukag ulug wam sapi umalik walug watfahon ino ware fibag.

⁹Ware fibagma umalikisiyen wam amep ino inikni iraham walug watfagma Harunen mep ino tor angge inggik tum fam oko walug hubu lahaptuk ambeg atog nganog teg ke fima-fima werehon fam are ribibareg mep winon hubu lahaptuk ambeg alem ke hilili fibag.

¹⁰Hilili fibareg NINIKNI Allahn Musa hiyag itfag ane hikit toho wam sei men, anggirang men, kiyatni men hubu lahaptuk ambeg indokma yalfag.

¹¹Yalfareg wam unu men ahap men o sabo wirig ambehen walug wilip atfareg selma yale fisibag.

¹²Yale fisibareg Allah fahet wam waroho yalmin ulug wam domba ino ware fibagma umalikisiyen wam amep ino inikni og itfag. Og itfagma Harun inowen mep ino oko walug hubu lahaptuk ambeg walinggoho hilili fil libag.

¹³Hilili fibagma umalikisiyen wam ino senggele fibareg inikni og utuk lit unggul oho og itfag. Og itfagma Harun inowen wam senggele fibahon ino hubu lahaptuk ambeg palimu abirangge indokma yalfag.

¹⁴Yaleg ambeg wam undamangge men ahinanggen men ik umako yale fibag.

¹⁵Yalfareg Israel inaben Allah fahet umbul ulug walug watfag angge arimano hubu lahaptuk ambeg iraham walug watfag. Walug watfareg wam kambing uwaliyon Israel inaben siyag ane turukukon Allahn elehap tukag ulug walug watfahon ino ware fibag. Ware fibareg inggareg fahet waroho hubu lahapfag ambohom hag toho wam ino oho yaltuk lit hubu lahapfag.

¹⁶Yalfareg tuk teg ane hikit toho wam eke hubu lahaptuk ambeg iraham walug watfareg Allah fahet waroho yalfag.

¹⁷Yalfareg roti anggen Israel inaben walug watfahon inggik indanggenma ololop toho wibareg hubu lahaptuk ambeg indokma yalfag. Indokma yalfahon ari likiya roti anggen men mangno roho wam waroho hubu lahapfahon ino palimu yalfag.

¹⁸Roti anggen ino yalfareg Israel inaben Allah olohotman wam nul ulug walug watfahon wam sapi men domba yuhambukon men ware fibagma umalikisiyen wam amep ino inikni og itfag. Og itfagma Harun inowen mep ino hubu lahaptuk ambeg walinggoho hilili fibag.

¹⁹Hilili fibagma Harun umalikisiyen wam domba ahabuhug sei werehon men wam piren itano amiyon men sei obog toho winon men enenggirang piren men enesimbulal men wibareg

²⁰wam piren itano iliyapma emberimu imbibagma Harunen wam sei hubu lahaptuk ambeg emberimu imbibahon ino obog toho indokma yalfag.

²¹Yalfareg Musan hiyag itfag ane hikit toho wam iliyapma itano NINIKNI Allah olohotma leho fibag.

²²Harunen wam arimano men walug watfag angge winon men Allah fahet emberuk lit yalfareg inggik piren leho lit Israel inap Allah unuk fam hi enepfag. Hi enepfareg hubu lahaptuk ambehen wambibag.

²³Wambibareg Musa men Harun men o sabo fanowon fam kibareg welatfag. Welatfareg nin hebeloho wilip atug Israel inap hi eneptukmu NINIKNI Allah umbagpag turukon ino Israel inap obog toho enelukema inam arik watfag.

²⁴Inam arik waharukmu indok ambulpul At alukeman wilip atfareg wam Harunen hubu lahaptuk ambeg imbibahon unu men sei men obog toho han nibag. Narukmu Israel inaben yet hibareg enehiyehen enele hi roho uruk lit enelenggen fam hur atfareg sembahyang uruk latfag.