Read Angguruk Yali YEREMIA 1 Bible Online

YEREMIA 1 - Angguruk Yali bible

YEREMIA 1

¹Yeremia hun Hilkia amloho, Allah fahet hubu lahaptuk latfag inap imam o Anatot kinang Benyamin fam welatfahonen ondohowon inowen ele uruk latfahon suwesingga tu fam haharoho imbibag.

²Hun Amon amloho ap suwon Yosia inowen kinang Yehuda seneg latfag li itano mo nuwalen atfagma NINIKNI Allah ele Yeremia fam uruk ane ak tibag.

³NINIKNI Allah ele ino Yosia amloho ap suwon Yoyakim kinang Yehuda senehon ino wereg latfag li oho urukmen eneg Yosia amloho eke Zedekia ino Yehuda inap onowe lahibag li mo nanggoloben atfagma pikalem fuwabon fam o Yerusalem inap ininggik hele waroho o Babilonia imbisik libag.

⁴NINIKNI Allah ele an Yeremia nubam hiyag nutuk lit,

⁵”Anden hat hisinga ahummu uwan werehap habuk fugmu hat fahet An noluk latisi. Hat hisinga ahummuwen uwan indag am fugmu Anden mumal haptikikteg ap ununggul unuk o kema-kema werehon unubahet An nawene hiyag isaruk laruhu ulug nabi humbaharikik,” irisi.

⁶Ari irisimu anden hebeloho uruk lit, ”Yihi, nakolen-e, Allah NIKNI! An nebe we tot lit nele angginen uk fug teg lahi,” irikik.

⁷Ari irikikmu NINIKNI Allahn, ”An nebe toron nele uk fug teg lahi ehenon ari uhun fug,” irisireg, ”Ap sa-o sa-o wereg ambeg lahun ulug mon haptuk laruhukmu enembeg laruk laruhun. Laruk laruhunteg nungge-nungge hiyag hutuk laruhukon ari haren hiyag isa laruk laruhun.

⁸It fahet hakol ha fug! An hat men wereg lit ap ininggikmuwen windat haptuk laruhuk,” ulug NINIKNI Allahn hiyag nitisi.

⁹Hiyag nitisireg NINIKNI Allahn inggik nambilikmu emberuk lit, ”An nele ap hiyag isaruk laruhun ulug hat hambilikmu emberuk lahi.

¹⁰Yoho Anden hat ap ununggul unuk kinang atogman atogma werehon o pumbuk obog toho unubahet palimu welaruhun ulug lahap haptukmu siyahon heneko hik isaruk lit eleha feseruk laruhun, siyag ane halog toho ilkal isaruk lit fanowon yako suwap turuk laruhunen hat hindimu holuk toho welamin,” irisi.

¹¹NINIKNI Allah ele an nubam kapal niyaruk lit, ”Yeremia nare, nungge yet haruk lahen?” irisimu anden hebeloho uruk lit, ”Anden yet haruk lahiyon te e pak umbahan yet haruk lahi,” irikikmu

¹²NINIKNI Allahn an nubam uruk lit, ”We tem yet haruk lahen. Aben e umbahanma pak fahet sap teg hag toho Anden hiyag hutuk laruhukon teko lawag ulug sap teg laruhuk,” irisi.[1]

¹³Irisireg NINIKNI Allahn inggik pireneg angge umung niyaruk lit, ”Nungge yet haruk lahen?” irisimu anden, ”Ik eleruk filen ik osohowon kubag fam hulug turuk lit kusaloho nit ninibil waharukmu yet haruk lahi,” irikikmu

¹⁴NINIKNI Allahn an nubam ele uruk lit, ”Yet haruk lahenon ari hag toho ik eleruk filen alem angginon ap kinang tu fam werehon obog toho unubam arik waruhu.

¹⁵Anden ap suwon ik eleruk fil werehon unumalikisi obog toho wol enebuhukmu wamuhupteg o Yerusalem walinggoho elehet ohowon sok elma wal taneg kahaleg lit o pumbuk kinang Yehuda fam werehon obog toho ngi amuhup,” ulug NINIKNI Allahn ele irisireg

¹⁶nin eke uruk lit, ”An numalikisiyen siyag ane eneg anggolo turuken Anden alem angginon it unubam umbuhuk. Iren An numbahalug ap winonen tu Allah hag toho wereg ulug wel eneptukon fahet hubu lahaptuk lit ap hag angge ininggik fam laltukon fahet ninikni ulug wel turuk.

¹⁷Ari ihiyon fahet hindi anggat toho wilit in atmihinteg hiyag hutuk lahiyon aruma obog toho it hiyag isa lahun. Anden it enembeg mon eneptuk lit it onolohotman hakolap habuhuk tohon hambong se roho welamin.

¹⁸Ap suwon Yehuda kinang seneg inap men onowesi suwon men hubu lahaptuk inap imam men o pumbuk obog toho werehon arimanowen hat hubam siyag ane anggolo turuk lamuhup angge famen An hat hibil aruhukmu hat o yaron uwag ineyon wit aruhun, elehet ubule yag aruhun ulug o yoho Anden hat hineyap haptuk lahi. Hineyap haptuk lahiyon ariyen hebeloho unusuruk laruhunmu iren hat apmayap haptuk lamuhup fug. An hat men wereg lit it ininggikmuwen windat haptuk laruhuk,” ulug NINIKNI Allahn an nubam hiyag nitisi.