Read Angguruk Yali YEREMIA 10 Bible Online

YEREMIA 10 - Angguruk Yali bible

YEREMIA 10

¹Hit Israel hinap welahebonen NINIKNI Allahn ele urukon tu holeg lamek:

²”Ap o pumbuk winamon onombolim laruk lamuhup fug! Iren enehangge poholma inam atukon fahet enekol haruk hag toho hiren henekol haruk lamuhup fug.

³It inikni umban tibag ane hikit toho alem elehon fahet turuk. E sali ruruk ahun ekeyen fareman e murik lalug tu Allah hag toho welamag ulug yaha fam ap hag toho lale feruk.

⁴Ap hag toho laltuk angge ino orohole fano amag ulug aliliyangge perak emas umbagpag turukon lahaptuk. Lahabe felug usangge aru yuk tuhu rohon ulug posiyemanggen tele feruk.

⁵Usangge arimano suwe yanggaltuk angge ap hag toho yabukmu unduhuk ferukon hag toho wereg lit enele uruk eleg. Unuyuhen la fug tehen aben ha rulug laruk. Iren fano aneyet siyag aneyet tuk fug tehen it fahet henekol haruk lamuhup fug.”

⁶Hat NINIKNI Allah hahon eke wereg eleg. Hat eneg suwon wereg lit hine roho turuk lahenon ariyen hunuk palimu wereg.

⁷Hat ap o pumbuk munon manon Inikni suwon welahenon, ap sa Hat fahet akol toho welaruhu fug? Ap obog tohowen Hat wel habuk teg. O pumbuk kinang atogman atogma werehon onowesi suwon men inindi anggat tehon men enesehelimu Hat hahon eke wereg eleg.

⁸Tu Allah hag toho wereg ulug wel eneptuk angge alem elehon e fam wirihon arimanowen ap arimano milal eneptukmu inindi nonghong uruken sohu ane eneg turuk.

⁹Wel eneptuk angge arimano obog toho ap ininggiken laltuk angge wereg. E sali ruruk ahunen e fam ap hag toho witukmu ap inggik fanowon ekeyen fanowap timin ulug perak ili rurukon o Tarsisen walug waharukon men emas umbagpag turukon o Ufasen walug waharukon men topno reberuk. Topno rebelug sum wiyuk anggen men mut men fam palehon wan turuk.

¹⁰We NINIKNI Allah Hat eneg tem toho welahen. Hat hebe holukon suwon wereg lit ap obog toho fet enesugmen eneg mondabi welaruhun. Haren holok haruk lahenma kinang obog toho yuk elek turuk. Hundama ahe laharuk halug ap o pumbuk obog toho inine eleg atuk.

¹¹Usangge arimano fahet hit Israel hinaben ap o pumbuk winon hiyag isaruk lit, ”Tu Allah hag toho wereg ulug wel eneptukon lahebonen pohol ha kinang ha wal tibag fug angge re kinangman eleg amuhup,” ulug hiyag isaruk lamuhup.

¹²NINIKNI Allah ineyonen kinang wal tibag. At eneg indi anggat teg lit kinang yuk tuhu rohon ulug ineyap tibag. Aren eneg mun ane man ane oluk teg lit pohol leho fibag.

¹³At ele urukmu ululu sipuk toho poholman osit wambik waharuk. Kinang atog filen hina mondotil waharuk lit osit warik ohoma ilabut lebeg tukag ulug monde feruk. Homhomo poholman fu rukag ulug hiyag utuk.

¹⁴Ap kinangmon obog toho inindi anggat teg eleg lit mun ane man ane alem obog toho fahet wenggel ha fug teg. Tu Allah hag toho wereg ulug laltuk inap arimano ininggali haruk lamuhup. Ininggiken laltuk angge onoluk welam fug angge nungge-nungge tuk fug teg.

¹⁵Usangge arimano alem wereg eleg ulug aben inda yag eneptuk. Allahn alem obog toho haloho umbuhu sambil mondabi eleg amuhup.

¹⁶Israel inap INIKNI Allah it hag toho wereg eleg. Aren mun angge man angge wal tibag. At unuk NINIKNI Allah pohol ha kinang ha senehon suwaleg. Aren Israel ninap An numalikisi welamuhup ulug mumal nenepfag.

¹⁷Hit Yerusalem hinap, nori, hinibam ap seliyonen waling henesug lit weregma iren hondog neneplug o winama nunumbahakup ulug henenggengge andog toho embelug wep toho welamuhup!

¹⁸NINIKNI Allahn ele urukon tu, ”Ketiya Anden ap kinang tu fam werehon arimano het toho o winama hik isahukmu asengseng anggolo haruk lamuhup,” uruk.

¹⁹Ari urukmu Yerusalem inaben enele uruk lit, ”Nit nunusurusama yowil nunubam werehon fano amuhuk fug. Atam niren te, ’Alem siyahon nunubam atisiyon nenembong se roho ha ruruk lamuhuk,’ perukmen

²⁰ninibam o sabo wiroho welatukuk ambeg ungga salehonet hele pug tehonet angge halog turusa. Halog turusama nunumalikisi kabiniyon obog toho nit nunumbahalug larusama o wit nisaruk lit ungga sal nisarukon wereg eleg,” uruk.

²¹Iniknisi roho werehon arimano inindi anggat teg eleg lit NINIKNI Allahn ele hiyag nisamisi ulug yami ruruk eleg. Yami ruruk elehen mun ane man ane tul perukon fano teberuk eleg. Ari roho turukmu enembohom obog toho pilili-palala rurusa.

²²Holeg lamek! Ik eleruk filen ap mondoko waharuk lit eneplohok hum toho til waharuk. O Yehuda pumbuk obog toho olomene eneg welamuhuben harep pisako oluna fusuhuk ulug waharuk.

²³NIKNI Allah, ap kinangmonen kema lamin ulug wenggel haruk angge famen o kema-kema laruk ane Hat hinggikmu eneg wereg ulug an noluk atisi.

²⁴NIKNI, haren nit fano komo yig nisaruk laruhun angge famen nit mondabi siyag amuhuk tohon ulug hahummu het-pet toho nunusuk fug. We niren siyag ane turuk latukukon wirim toho nunusuhun.

²⁵Hat holok haruk lit hundama ahe laharukon ari o pumbuk winon Hat hunuk enepeleg inap unubam hik isahun. Olomeneyen wam naruk hag toho ap arimanowen Hat humalikisi elehap eneptuk lit enengginang harep pisako siyahap turusa ane fahet holok toho unusuhun.