Read Angguruk Yali YEREMIA 11 Bible Online

YEREMIA 11 - Angguruk Yali bible

YEREMIA 11

¹NINIKNI Allahn an Yeremia nubam ele uruk lit,

²”Allahn ari roho irisi ulug Yehuda inap men Yerusalem inap men hiyag isahunon tu: Anden hit hunumbasi unubam nininggik ahandip toho welamuhuk ulug sali emberuk lit komo eneptik iyahon hikit toho turuk lamuhup.

³Ap san ari hikit toho tuhu fug halug siyag aruhu. An hit Israel hinap HINIKNI Allahn nele aru uruk lahi.

⁴Anden hit hunumbasi o Mesir asengseng toho welatfag ambehen hondog eneplug wilip atuk lit hiyag isiyahon tu, ’An nele holtuk lit alem ekeyon-ekeyon fahet komo heneptuk lahiyon hikit toho turuk lamuhup halug An hit Hinikni weregma hit An numalikisi welamuhup.

⁵An nele holeg lit welamuhup halug eneg Anden hit hunumbasi kinang ag owe men kin ahaluwe men eleg am fug angge mondabi anggolo wereg ambeg og hisahuk ulug sali imbiyag ane hikirap tuhuk,’ ulug hiyag isiyag. Hiyag isiyahon hikit toho kinang og isiyag ambeg hit ketiya welahep,” irisi. Ari irisimu anden, ”Amin! Hat NIKNIYEN ehenon hikit toho teko lawag!” irikik.

⁶Irikikmu NINIKNI Allahn an nubam nin ele uruk lit, ”Anden ihiyon hikit toho Yehuda pumbuk ele ke men Yerusalem inap inibam owahalem ke men hiyag isil lahunon tu, ’Anden hit hunumbasi unubam nininggik ahandip toho welamuhuk ulug sali emberuk lit komo eneptik iyahon hikit toho turuk lamuhup.

⁷Indam Anden hit hunumbasi o Mesiren hondog eneplug wilip atuk lit An nele holtuk lamuhup ulug komo eneptik iyag hag toho ketiya oho An numalikisi hundig-hundig komo eneptuk latikik angge famen

⁸it obog toho inindi arik teg lit An nele holuk fug angge iren peruk ane hikit toho siyag ane eneg turuk latusa. Ari roho turukmu Anden hiyag isaruk lit sali hit hunubam emberuk lahiyon sobir isahup halug siyag amuhup ulug imbiyag ane roho alem siyahon eke hag eke hag unubam emberuk latikik,’ ulug hiyag isil lahun,” irisi.

⁹Irisireg NINIKNI Allahn an nubam nin ele uruk lit, ”Anden hol harukmen Yehuda inap men Yerusalem inap menen it-it enele uruk lit, ’NINIKNI Allah fahet ninirim,’ uruk.

¹⁰It enele sahaltuk inap arimanowen unumbasiyen turuk latfag ane hikit toho An nele holtukon fahet ninirim peruk lit An numbahalug ap winonen tu Allah hag toho wereg ulug wel eneptukon onombolim laruk. Ari roho turuk lit sali Anden it unumbasi fam imbiyahon sobir isaruk.

¹¹Sobir isaruk ane ari fahet Anden alem angginon unubam umbuhukmu fano roho wilip amuhup fug. Fano wilip am fug angge enele hi roho An nubam let nenebik ma uruk lamuhup halug Anden hol isahuk fug. An HINIKNI Allahn nele aru uruk lahi.

¹²Anden holuhuk fugmu Yehuda inap men Yerusalem inap men asengseng toho wereg lit nunumbasi ulug wam waroho hubu lahaptuk latuson unubam windat nenebik maniyek ulug heng enebik lahup angge famen windat enebuhup fug.

¹³O Yehuda pumbuk anggolo wereg ane hikit toho nunumbasi ulug wel eneptukon oho anggolo kilaptuk latusa. Kebunggalem o Yerusalem larukon anggolo yaho hag toho ininggali eleg toho nunumba ulug wel turukon Baal fahet oho hubu lahaptuk ambeg anggolo wirig latusa.

¹⁴Nunumbasi ulug wel eneptuk angge anggolo arimanowen Yehuda inap men Yerusalem inap men windat enebuhup fugmu haren it fahet sembahyang uruk lit Hat humalikisi let enepmihin ulug An nubam heng nabuhun fug. Ap arimano eneliplip eneptuken enele hi roho nubam uruk lamuhup halug Anden we tem toho holuhuk fug,” irisi.

¹⁵Irisireg nin ele uruk lit, ”An numalikisi nindi enesug lahiyon inindimuwen nonolok ane tul ulug wenggel haruk lit wereg angge famen nungge fahet An nibam waharuk? An nibamen wam waroho hubu lahaptuk lit Allahn alem siyahon hunubam umbuhuk irisiyon uwag oko wahumu nin hebeloho nenehiyeg toho welamuhuk peruk ano?” uruk.

¹⁶Indam NINIKNI Allahn hit hununuk ”e zaitun anggen fano yihikon” ulug suwal heneptisi angge famen ketiya e ino inggik indoken nawag ulug indok ambulpul ulog turukon munggale fesehuk peruk.

¹⁷NINIKNI Allahn hit yag heneptuk lit hununuk ”e zaitun fanowon” ulug suwal heneptisi angge famen hit Israel hinap men Yehuda hinap menen Baal fahet hubu lahaptuk lit At indi siyahap tirikip. Siyahap tirikip ane fahet At pohol ha kinang ha senehon inowen e ino muko yale fesehuk ulug kong toho emberisi.

¹⁸An men seli roho wereg inap inindimuwen wenggel haruk latusa ane NINIKNI Allahn hiyag nitisimu an noluk atisi.

¹⁹Ap arimanowen enele sahaltuk lit, ”E anggen yihikon ari mubulen maniyek! Ap onolukon wereg ambehen elehap tulmu aben at fahet wenggel haruk lamuhup fug,” uruk latusa. Ari uruk latusa ane napeleg toho wereg lit wam domba umalik il sahuhon wabul ulug walug larukon hag toho welatikik.

²⁰NIKNI Allah, Hat pohol ha kinang ha seneg lahenonen ap inindimu hirako wenggel harukon kim isaruk lit mun ane man ane alem obog toho fano haloho emberuk lahen. O Anatot inaben enele uruk lit, ”NINIKNI Allah unuk fam hele hiyag nisahun fug! Hiyag nisahun halug huwabuhuk!” uruk. Ap an nuwabul perukon arimano Haren hebeloho unusurukmu yet hahuken alem an nubam lombohap naptuson ari Hat hinggikmu emberuk lahi ulug NINIKNI Allah hiyag itikik.

²²Hiyag itikikmu At pohol ha kinang ha senehon inowen hiyag nutuk lit, ”Anden alem angginon unubam umbuhukmu ap kabiniyon arimano seliyonen unusuhupmu unumalikisi suburu oboken war amuhup.

²³Anden unusuhuk li horog aruhumu o Anatot inap arimano misig oho onoluk welam fug angge obog toho war amuhup,” irisi.