Read Angguruk Yali YEREMIA 12 Bible Online

YEREMIA 12 - Angguruk Yali bible

YEREMIA 12

¹Anden NINIKNI Allah ubam nele uruk lit, ”NIKNI Allah, Hat fano hahun hubam alem lombohap habuk fug teg lahi angge famen alem haloho emberuk ane fahet nele iminon tu: Nungge fahet ap onolokon arimano fano wereg? Ap hare ane turukon obog toho inindi yuwag toho wereg.

²Haren yag eneptikinmu unumanggen kinang apma wamburuk lit yat toho lahalug anggen fano uruk angge famen enembilik fam eneg wel haptuk lit inindiyen Hat hele embeseruk lit un ane peruk.

³NIKNI Allah, an nundaman hirako wenggel haruk lahiyon Haren kim niyaruk lit nindi piren teg eleg angge Hat hubam eneg ebet haruk lahi ane Hat holuk. Ari fahet ap an nuwabul perukon arimano wam domba umalik wabul ulug walug laruk hag toho unusuhup ambeg ininggik lisoho imbisik lahun.

⁴Iren an nabug uruk lit, ’Siyag amuhup irisiyon ino nunubam atukmu aren yet hahu fug,’ uruk. Ap aruman siyag ane turukon ariyen nenengginang lilohap turukmu wam pak suwe men eleg atuk. Noenam welamuhukmu nit nenengginang lilog tegma kinangman wilip atuk angge obog toho ilim atuk ane eleg aruhu?” irikik.

⁵Irikikmu NINIKNI Allahn ele uruk lit, ”Hat ap unuyug fam larukon men ambiyeg larukmen eneg hine eleg atisi angge re wam kuda folo larukon men ambiyeg lahen ha reg ano? Kinang fanowon tu fam wereg lir oho hindimu hakol toho welahen angge re ik Yordan fuma fil farema welalen halug nangginoho welalen?

⁶Hat hori men howe ot yuhon menen oho hat siyahap habul ulug turuk. Inindi abiranggeyen hat fahet ninirim ulug habug uruk. Iren hat hubam enele fano roho uruk lamuhubon fahet oho inindi nasug lit ehesa puhun fug,” irisi.

⁷Ari irisireg NINIKNI Allahn nin ele uruk lit, ”Israel inap An numalikisi welamuhup ulug mumal eneptik iyag angge famen An men welamuhup fug ulug miyaloho hik isarikik. Anden nindi enesug lahiyon arimano ap seliyon ininggikmu emberikik.

⁸An numalikisi arimano An men seli roho wereg lit olomene olokonen hilak turuk hag toho enele hi roho Allah siyag uruk. Ari uruken Anden it fahet nirim peruk lahi.

⁹It enengginang Anden mumal tiyag ambeg ino suwe ngilek arimanowen suwe oruk hesenggengge paleg asuwe misig nul ulug walinggoho sap teg ambeg hag atisi. Suwe ari mondabi eleg aruhuwen wam pak mene menen oho nalusan wol enebiyek!

¹⁰Ap anggolowen enembohom og eneplug An niyabuk fam kurukmu wam neng watil larukmen An nangginang fanoma lekma hag atisi.

¹¹Lekma hag tebeselug larusa ambeg ino Anden yet harukmen orohole nik-neng toho weregma ap misihen oho wenggel haruk eleg,” irisi.

¹²Ap seliyon arimano lekma punu keyen waharuk lit NINIKNI Allahn hiyag isarisi ane hikit toho kinang atogman atogma siyahap til laruk lit ap obog toho unusurukmu misig oho wilip aruhu fug.

¹³Allah umalikisiyen roti anggen fanowon fok turusa angge famen hinde-hinde eneg wilip atisi. Lisag toho yabuk witusa angge famen molip eneg atisi. NINIKNI Allahn olok haruk ane indok ambulpul hag toho turuk lit mun angge man angge siyahap tirisimu Allah umalikisi arimano ininggikmu eleg atuken ininggali haruk.

¹⁴NINIKNI Allahn ele urukon tu, ”Ap o pumbuk winamon Israel kinang walinggoho werehon unubabut onolok toho wereg lit An nangginang numalikisi Israel inap og isiyahon ino senebuhuk ulug turukon arimano Anden it enengginang famen lisoho hik isahuk. It hik isahuk hag toho Yehuda inap oho hik isahuk.

¹⁵It hik isahuk ambeg amusun toho welamuhupmu Anden it inilaheg ulug hebeloho enengginang wal taneg hondog eneplug waruhuk.

¹⁶Hondog eneplug waruhukmu wereg lit ap arimanowen Allah umalikisiyen wenggel haruk ane hikit toho niren oho wenggel haruk lamuhuk ulug milal taruk lamuhup. Milal taruk lit iren unumba Baal unuk fam enele tem toho uruk ane An numalikisi anggul eneptusa hag toho ketiya hebeloho An HINIKNI Allah noluk welahiyon nunuk fam tem toho uruk ane milal taruk lamuhup. Milal taruk lamuhup halug Anden hiyag isahuk ane hikit toho An numalikisi enesehelimu fano welamuhup.

¹⁷Ap o pumbuk ekeyen An nele holtuk lamuhup fug halug Anden ap arimano nin hebeloho yanggal enebuhukmu mondabi siyag amuhup ulug An HINIKNI Allahn nele uruk lahi,” irisi.