Read Angguruk Yali YEREMIA 13 Bible Online

YEREMIA 13 - Angguruk Yali bible

YEREMIA 13

¹NINIKNI Allahn an nubam ele uruk lit, ”Lamihinteg humi pahaluk hekel sulumon fam suwalehon onggo paloho hilalug pug toho wan teg lamihin. Wan teg li misihim oho ik umatuk laruhun fug,” ulug hiyag nitisi.

²Hiyag nitisi ane hikit toho larikikteg pahaluk eke onggo paloho walug wan tirikik.

³Wan teg lit weregman NINIKNI Allahn inggik pireneg angge an nubam ele uruk lit,

⁴”Pahaluk ino walug lamihinteg ik Efrat horogma kiling elma hirahik lamihin,” ulug hiyag nitisi.

⁵Hiyag nitisi ane hikit toho larikikteg pahaluk ino ik Efrat horogma kiling elma hiraho fik larikik.

⁶Suhuloho waharikikteg hup wirim toho nohorikikmu NINIKNI Allahn an nubam, ”Nin hebeloho lamihinteg pahaluk ik Efrat horogma hiraho ferikinon ino wak lamihin,” ulug hiyag nitisi.

⁷Hiyag nitisimu nin hebeloho ik Efrat horogma larikikteg pahaluk ino kiling elma hiraho ferikik ambehen lisoho warikikteg yet harukmen pahaluk ino filik tirisireg mondabi siyag atisi.

⁸Ari tirisimu NINIKNI Allahn an nubam ele uruk lit,

⁹”Pahaluk mondabi siyag atisi ane hikit toho Yehuda inap men Yerusalem inap men inindimu winik-wonog toho hemet til laruk ane ino Anden siyahap enebuhuk. An HINIKNI Allahn nele aru uruk lahi.

¹⁰Ap inindi onolokon arimano ununggul uwag haro reg lit Allahn hiyag nisaruk ane ninirim ulug ap winonen tu Allah hag toho wereg ulug wel eneptukon onombolim laruk lit it unubam sembahyang uruk. Ari roho turuk inap arimano pahaluk mondabi siyag atisiyon ari hag toho amuhup.

¹¹Aben humi pahaluk kong toho hik isaruk eleg hag toho Israel inap oho Yehuda inap oho An men nininggik ahandip toho welahe ane kong am fug angge welamuhuk perikik. It An numalikisi wereg lit nunuk palimuwap turuk lamuhupmu ap o kema-keman wel naptuk lamuhup ulug wenggel harikik angge famen iren An nele holtuk latusa fug,” ulug NINIKNI Allahn ele irisi.

¹²NINIKNI Allahn an hiyag nutuk lit, ”Israel inap hiyag isamihinon tu: Nit Israel ninap NINIKNI Allahn ele urukon tu holeg lamek: ’Kubag ik olokon fahet wirihon arimano ololop toho hinanggeg,’ imihin. Imihinmu iren hat hubam, ’Ehenon ari nit nonoluk,’ ulusa.

¹³Ulusama haren te, ’NINIKNI Allahn ele urukon tu: Ap kinang tu fam wereg inap men, ap suwon Daud ubalmangge laharuson men, An namingmingangge imam men nabi men, Yerusalem inap obog tohowen ik olokon nalug nenek turuk lamag ulug Anden ik olokon ololop toho hinang isahuk.

¹⁴Hinang isahukmu nahupteg ik nalug nenek turukmu Anden inilaheg ulug nindi isa fug angge ap eke seneko eke fam hik isahukmu ununggul kik-kik atuk lit ikniyet amlohowet mangno roho war amuhup imihin,” ulug hiyag nitisi.

¹⁵Israel hinap, nori, NINIKNI Allahn ari irisimu hit hininggarehen palimuwap ta fug angge At apma welahe ulug ele holeg lamok!

¹⁶Hit HINIKNI Allahn o hikap tuhumu hit punu ke larukmen fuk toho wat taruk lit hinindimuwen o seleg amag ulug wenggel haruk lamuhup angge famen NINIKNI Allahn seleg ino nin hebeloho hikap tuhu. Ari teko la fugmu hit HINIKNI Allah unuk suwap turuk lamuhup!

¹⁷Hiren At ele holtuk lamuhup fug halug hit hemet toho turuk lahebon fahet an hirahoman uba yatuk laruhuk. Uba yatuk lit NINIKNI Allah umalikisi ininggik hele waroho o winama imbisik lahup ulug uba longgon kil-kal uruk lit nil hik aruhu.

¹⁸NINIKNI Allahn an nubam ele uruk lit, ”Ap suwon raja men isinga men hiyag isamihinon tu, ’Heneliliyangge hununggulmu wan teg latikibon mako wambirisi angge re hit lehoma heriyeg lahep ambehen wambilihipteg kinangma hur amiyek!

¹⁹Hit hunumalikisi Yehuda inap obog toho ininggik hele waroho o winama imbisik lahupmu inibam pumbuk Yehuda kinang ik ambut fil werehon elehet walinggoho ohowon sok arimano laregman eneg nin hebeloho husuhup fug,’ imihin,” ulug hiyag nitisi.

²⁰O Yerusalem, nehe, ap seliyon ik eleruk filen waharukon yet isimin! Waharukmu Yehuda pumbuk wam sei anggolo werehon hag toho foroho laruhun ulug og hitfahon arimano nangginuhup?

²¹Ap haren hindi enesug latikin inap arimano NINIKNI Allahn hat sen hasug lamuhuben mon enebik waruhu halug haren nungge uruk laruhun? Iren hat siyahap haptuk lamuhup halug hiyap malik indag tamin ulug ouk waruk hag toho hubam aruhu.

²²Hubam aruhumu hat hindimuwen wenggel haruk lit, ”Nungge fahet an nasum leg halug siyahap naptusa?” ulug wenggel hahun halug siyag ane hum toho turuk latikikon fahet alem ari nubam atisi ulug holuk aruhu.

²³NINIKNI Allahn ele uruk lit, ”Ap ahap singon famen hulu am teg ano? Wam oruk panduhabon famen singon am teg ano? Enehap onoruk nin am fug teg hag toho hit henesupmu roho siyag ane turuk lahep hinap nin hebeloho fano ane tuk fug teg lahep.

²⁴Ari fahet alinglongangge homhomowen walug laruk hag toho Anden hit o kema-kema pilili-palala hisahuk.

²⁵Hiren An fahet henepeleg atuk lit ap winonen tu Allah hag toho wereg ulug wel eneptuk angge alem elehon onombolim laruk lahebon fahet Anden emberikikon hikit toho alem ari hit hunubam aruhu.

²⁶Anden oho hat hasum hunggulmuwen huyugmu obog toho hog tubusuhukmu hat kabiyog weregma ap obog tohowen yet hiyahup.

²⁷Haren An numbahalug wam olombik fitlug uwali yami ruruk hag toho hinggali eleg toho yaying turuk lit ap winonen tu Allah hag toho wereg ulug lal eneptuk angge ap inindi siyahap eneptukon arimano punumuwen oho tonggoman oho wel eneptuk lahen ane fahet Anden nirim-pirim toho yet hiyarikik. Noenam welamuhukteg hat hinggarehen siyahap taruk lahen ane ino umbusuhun?” irisi.