Read Angguruk Yali YEREMIA 14 Bible Online

YEREMIA 14 - Angguruk Yali bible

YEREMIA 14

¹O hibi amusun toho laharisiyon fahet NINIKNI Allahn an Yeremia nubam irisi ane aru,

²”Yehuda inap inindi anggin toho wereg lit ninindi sok husoho laha ulug kinangma yamba pising uruk. Ngi hum urukmu ap o kema-kema werehonen holtuk.

³Ap suwonen enemingmingangge ik hinanggik lalihip ulug mingming eneptukmu enemingmingangge arimano ik habulig ambeg larukmu ik elehen kubag ei eneg walug waharuk. Ik yami rurukmen elehen inil ouken nininggali ulug ininggiken onorohole saloho waharuk.

⁴Osiren kinang filik turuk elehen yabuk wit taruk eleg. Yabuk wituk inap inindi anggin toho wereg lit ununggul kik turuk.

⁵Wam heyon arimano unumalik ket indag taruk angge famen naruk angge elehen unumalik lin isalug laruk.

⁶Wam keledai ohimu werehon arimano punumu unduhuk lit ik oboken enenggolobag lilog atisimu sat leg-leg uruk lit wereg. Naruk angge elehen inil yanggowon inam atuk.

⁷Yehuda inaben enele uruk lit, ’NINIKNI, niren anggoloenam nenembol yig hutuk lit siyag ane Hat hubam turukuk. Siyag ane turuk latukukon ariyen nunubabut siyahon inam atisimu nenele uk fug teg lahe angge famen Haren tam sali imbinag ane hikit toho let nenebin ulug heng haptuk lahe.

⁸Israel ninap fanowap neneptuk hahun, alem angginon nunubam atukmu windat neneptukon we Hat eneg welahen angge famen nungge fahet o pumbuk aru ap pohon watug hup misig eneg noholug likiyamon laruk ahun hag toho Haren kim nisa fug angge welahen?

⁹Nungge fahet ap sohuwon hag toho welahen? Ap ahako ahun hag toho welahen angge famen hakolen let nenebuk fug teg lahen? Nit nonolukon te: Hat NINIKNI nit sehelimu welahen peruk lahe. Hat hunuk fam suwaleg ninap welahe angge re nunumbahalug lahun fug!’ ulug Yehuda inaben urukmu

¹⁰An HINIKNI Allahn nele hebeloho ap arimano fahet uruk lahiyon tu: It arimano enehiyehen la wam turuk lit unuyug ouk ha fug angge unuwag norukon fahet Anden nambit peruk lahi. Iren siyag ane turuk latuson Anden napeleg atisi fugmu ketiya alem siyahon it unubam umbuhuk peruk lahi,” irisireg

¹¹nin an Yeremia nubam hiyag nutuk lit, ”Haren ap aruma let enebin ulug An nubam sembahyang uruk lam fug!

¹²Iren hiyang angge wereg lit enele ine roho An nubam heng nabuhup halug oho holuhuk fug! An fahet wam men suburu men yaltuk lamuhup halug oho An nolohotma amben siyag atuk laruhu. Anden karog fam unusil laruk lit suburu oboket ouk alem suwonet monde fuhukmu mondabi waroho lin uhup,” ulug hiyag nitisi.

¹³Hiyag nitisimu anden hebeloho Allah fam nele uruk lit, ”Yihi, Nikni suwon! Wene hiyag isaruk inap nabi arimanowen enele uruk lit, ’Tog aptuk ane hunubam aruhu fug, suburu obok hahup fug. Allahn fet henesugmu o aru hinindi mondabi yuwag toho welamuhup,’ ulug hiyag isaruk ane ari Hat holuk,” ulug ari roho hiyag itikikmen

¹⁴NINIKNI Allahn an nubam ele uruk lit, ”Wene hiyag isaruk inap arimanowen An nunuk fam un ane uruk. Nawene hiyag isil laruk lamuhup ulug Anden ap arimano mon eneptikik fug, An nele it unubam emberikik fug. It arimanowen fulu ane turuk nahun ulug enele si ane eneg hiyag isaruk lit fobik teko lahu ane fahet tem toho hiyag isarikik uruk anggeyen enembilik fam milaloho uruk inap wereg.

¹⁵Ap arimano Anden mon eneptikik fug angge famen iren An nunuk fam uruk lit, ’Tog aptuk ane men suburu obok men o aru fam aruhu fug,’ ulug enele si ane hiyag isarukon ari fahet Anden it unubahet nele uruk lahiyon tu: Ap arimano tog aptuk ane men suburu obok men unubam aruhumu war amuhup.

¹⁶Ap arimano enele holtuk inap oho suburu obok fam, sehen fam unusurukmu it unuhesiyet unumalikisiyet o Yerusalem kalem keyen waroho hik-hak isahupmu aben andog toho kinangma sal enebuk fug teg lamuhup. Ari roho unusuruk lit siyag ane it ininggarehen turukon ino Anden hebeloho it unubam hilil isahuk,” ulug NINIKNI Allahn nin nubam uruk lit,

¹⁷”Anden iminon te hiyag isa lamihin, ’An nori aben asenggep-pasenggep toho unusurusa ke arimano salukangge humon eleg am fug tohon unubam atisimu an hubanggo unukoho kel ta fug angge uba yatukmen eneg uban nil ahaluwe eleg atisi.

¹⁸An wilip atug yabukmu laruk lit yet harukmen ap karog fam paloho unusuruson wereg. Nin eke o pumbukmu kurukmen oho ap suburu oboken war am hag toho weregma yet isaruk lahi. Wene hiyag isaruk inap nabiyet Allah fahet hubu lahaptuk inap imamet inindi nonghong uruk lit o aru mase roho la wam turuk,” ulug hiyag nitisi.

¹⁹Israel inaben NINIKNI Allah fam enele uruk lit, ”Haren nit Yehuda ninap fahet nirim ulug hambol yig nisarikin ano? O Sion fahet me hape ruruk lahen? Nungge fahet hine roho nit nunusuruk lahenma fano am fug teg lahe? Niren fano welamuhuk peruk latukuk angge famen fanowon nunubam atuk eleg. Nit ouk elegma welamuhuk peruk latukuk angge famen ouk nunubam werehon ino anggin atisimu lagmag uruk lahe.

²⁰NINIKNI, Hat hele nale feserukuk ane men nunumbusagsiyen oho hubam siyag ane turuk latusa ane men nit nonoluk. We tik-tem toho niren Hat hindi siyahap haptukuk.

²¹Anden let henebuhuk ulug sali imbinag ane hikit toho Hat holohotman nit hik nisa fug! Nit nunubam sali imbinahon ino elehap tuhun fug! Hat o Yerusalem ngi reg lahenon fahet aben fanoma Allah heriyeg ambeg wereg uruk angge re Yerusalem ninap nunusuruk lit hinggarehen siyahap tahun fug!

²²Ap kema-kema werehonen nunumbasi ulug wel eneptukon misihen oho osit kinangma pilabik wam teg ano? Pohol amuwen osit kinangma og isa reg ano? We Haren eneg mun ane man ane wal haruk lahenma let nenebuhu ahun NINIKNI Allah wereg ulug ninindi Hat hubam eneg wereg,” ulug Israel inaben Allah fam enele urusa.