Read Angguruk Yali YEREMIA 15 Bible Online

YEREMIA 15 - Angguruk Yali bible

YEREMIA 15

¹ NINIKNI Allah ele an nubam hiyag nutuk lit, ”Musa men Samuel menen An nolohotman ap aruma fahet fanowap enebin elepma oho An nindimuwen hebeloho it fahet wenggel hele fug. Wilip amag ulug An nolohotman yanggal enepmihin!

²Iren nit kema lul ulug hinog og hiyahupmu haren NINIKNI Allah ele urukon tu ulug hiyag isaruk lit, ’Ouk fam war atuk ambeg larukon halug ouk fam war atuk ambeg lawag! Karog sap tegma larukon halug karog sap tegma war arik lawag! Suburu obok ambeg larukon halug suburu obok ambeg war arik lawag! Hik isaruk ambeg larukon halug hik isaruk ambeg linggik-longgo ik lawag,’ ulug hiyag isamihin,”

³il laruk lit, ”Anden alem angginon uhan unubam umbuhukon tu: Tamon tog elma it unusurukon fahet, pirenon meneyen ap wareg saluk toho ilig-ilig wirig-wirig turukon fahet, hinahanehon te suwe pohol keyen watlug ap warehon narukon fahet, uhanehon wam eliyen fuluk mag-mag naruk lit elehap eneptukon fahet umbuhuk.

⁴Hizkia amloho ap suwon Manasye Yehuda kinang seneg lit o Yerusalem welatisiyon inowen siyag ane turuk latisiyon fahet Anden alem angginon aruma unubam umbuhukmu ap kinangma werehon obog tohowen yet hahupteg enekolen yuk lagmag uhup,” irisi.

⁵NINIKNI Allahn nin ele uruk lit, ”Yerusalem hinap fahet ap san yihi, nindiyen-e uhup? Ap san hit uba yatukmu let henebuhup? Ap san henembeg kik watlug ke roho welahep ulug kapal hisahup?

⁶Hit henemuwen An henembol yig nutug larikip. Ari fahet Anden hit pinggi hunusimin ulug ninggik legmeg harikikteg hunusirikik. Hinilaheg ulug nindi imbik wamburukmen eneg amusun toho welatikikteg

⁷nambilik ahe fu isarikikmu indok abulolo hag toho Yehuda inap o pumbuk walinggoho werehon arimano linggik-longgo urusa. An numalikisi unubabut hal am fug angge An nambeg suhuloho waharuk elehen iniknisiyet unumalikisiyet unusirikik.

⁸It obog toho unusirikikmu hiyap yuwog lin isaruson arimano anggolo winag isa fug tegma ik yinggi tot teg. Ap kabiniyon unusukag ulug o unukoho pik-pul ap naruk angge monde ferikik. Keman wahileg keman wahileg unumalikisi enesehelimu inam atukmu inisingasi enekolen yuk lagmag urusa.

⁹Hiyap ekeyen umaliki sabiren itano obog toho war atusama hol haruk lit il fulug tirisireg sat eleg atisi. Mo lahik waharisireg unukoho anum pulmu weregma hiyap ino uban il hubun atisimu mo ino yet haruk latisi fug. Inggali atisireg orohole ta umbuk ya umbuk turuk latisi. Lin isaruson arimano ap seliyonen karog fam unusukag ulug ininggikmu og isahuk,” irisi.

¹⁰Yeremian ele uruk lit, ”Yihi nisinga, nungge fahet haren indag naptikin, war ale fano. Ap aruma werehon obog toho men suwahal uruk lit yik aptukmen eneg welahireg nirim peruk lahi. An aben angge paleg lahi fug, iren oho anden angge paleg eleg angge famen ap obog tohowen huluwap naptuk.

¹¹Allah NIKNI, Hat hiyabuk fano roho wituk latikik. An men seli roho wereg inap alem angginon unubam atuk lit war am hag toho turukmu anden let enebin ulug Hat hubam heng haptuk latikik angge famen

¹²ketiya e mur ineyon ap ininggiken fala ruk fug teg hag toho ik ambut filen siyahap nenebik waharuken an nakolen nele uk fug teg lahi,” irikikmu

¹³NINIKNI Allah ele nubam uruk lit, ”Israel inap o pumbuk walinggoho werehon obog tohowen siyag ane turukon onggo re enengge obog toho ap seliyon unubam hininggik tomok helemek ulug Anden hiyag isahuk.

¹⁴Anden it o harusa fug ambeg imbisik lahukmu ap enemingmingangge welamuhup. An nundama ahe laharukon ino indok ambulpul hag angge it unubam hik isahuk,” irisimu

¹⁵anden Allah fam hiyag utuk lit, ”NIKNI, mun ane man ane Hat holuk teg lahen. An fahet hapeleg am fug angge let naptuk laruhun! Hat nibil atuk lit an mug naplug waharuk inap arimano ayeg waruhun! An nuwabuk nowen iren siyag ane turukon yet isa fug angge hindi imbik wamburukmen eneg welaruhun fug! Hat hawene fahet an nele ying naptuken holuk toho welamin!

¹⁶Allah NIKNI pohol ha kinang ha seneg lahenon, an Hat hunuk fam suwaleg umalik welahi. Hat hele an nubam uruk lahenma nahummu yuhar atuk. Hat hele holtuk lit nahiyeg toho welahi. Hat hele nundama kurukmu nindi se roho welahi.

¹⁷Misihim oho ap inda yatuk inap sehelimu nahiyeg toho heriyeg lit welatikik fug. Haren hinggik ine roho sen nasug lahenma Haren pet eneptuk lahen inap men nenehiyeg toho nenele ul fug ulug namu welatikik.

¹⁸Nungge fahet ouk anggolo waruk lit fano am fug angge amusun toho welahi? Nungge fahet salukangge aru eleg am fug angge fato naptukmu welahi? Ik fanowon famen firig atukon hag toho welahenma an nindi siyag atuk,” ulug an Yeremian Allah fam hiyag itikikmu

¹⁹Allahn hebeloho hiyag nutuk lit, ”Haren An nambeg suhuloho watmin peruk lahen halug An nolohotma niyabuk wituk laruhun ulug nin eke humbahakuk. Hat hele uluwet-fuluwet wilibuk fug angge fano ane eneg uruk laruhun halug An nele hat hambilikmu emberuk laruhuk. Ari roho tuhukmu hat it onombolim lahun fug, it eneg hat hambeg wamuhup.

²⁰Iren hat huwabul ulug turuk lamuhup angge famen Anden hat hibil atuk lit elehet ubule ineyon ying aruhun ulug hineyap habuhukmu ap seliyonen oho apmayap habuhup fug. An hat men wereg lit ap seliyon ininggikmuwen windat habuhukteg og habuhuk ulug An Allahn nele uruk lahi.

²¹Anden onolok inap ininggikmuwen tel haptuk lit ap inindi enesug eleg inap ininggikmu yinggil hasug angge lol habuhuk,” ulug hiyag nitisi.