Read Angguruk Yali YEREMIA 16 Bible Online

YEREMIA 16 - Angguruk Yali bible

YEREMIA 16

¹NINIKNI Allahn an nubam ele uruk lit,

²”Kinang tu famen hiyap wahunteg malik indag enebuhun fug.

³Kinang tu famen malik indag atukonet inisingasi iniknisiyet unubam teko lahu ane fahet An HINIKNI Allahn nele uruk lahiyon tu:

⁴It obog toho ouk alem suwon ekeyon-ekeyon men suburu obok men tog aptuk ane men unubam aruhumu war amuhup. War amuhupmu aben it fahet piya sini uruk lit kinangma sal enebuk fug angge umbusuhupmu filik turuk lit kinang amug war atukmu suwe men wam mene menen naruk lamuhup.

⁵An HIKNI Allahn nele uruk lahiyon tu: Aben fong watukmu hat it inibam laruk laruhun fug. Inindi seyap eneptuk lit it men piya sini uruk laruhun fug. Anden ap arimano nindi enesug laruhuk fug ulug embeserikik angge re nin hebeloho mangno atuk lit let eneptuk laruhuk fug. An HINIKNI Allahn nele aru uruk lahi.

⁶Ap suwonet toronet war amuhupmu fong watuk lamuhup fug, inindi siyahen enehap ke kiriring heheg wat taruk lamuhup fug, onoruk paloho welamuhup fug, kinangma sal enebuhup fug.

⁷Inindi yuwahap enebul ulug ap fong watukon fahet seni isag isaruk lamuhup fug. Inisingasi iniknisi war amuhup halug oho unumalikisi ik hinang isaruk lamuhup fug.

⁸Ap enehiyehen seni esetukmu it men ambiyeg heriyeg lit suburu naruk laruhun fug.

⁹Hit welamuhup li Anden o Yehuda pumbuk ke ap yunggultukon men inda yatukon men eleha fusuhukmu aben hiyap ket hilalug enehiyeg toho enele urukon oho hol isaruk lamuhup fug. An hit Israel hinap HINIKNI Allah pohol ha kinang ha seneg lahiyonen nele aru uruk lahi.

¹⁰Anden ihiyon ari An numalikisi hiyag isahunmu iren hat hubam enele uruk lit, ’Nungge fahet NINIKNI Allahn alem angginon arimano obog toho unubam umbuhuk irisi? Niren siyag ane nungge turuk lit At ele ying turukuk?’ ulug kapal hiyahup halug

¹¹haren hiyag isahunon tu, ’NINIKNI Allahn ele urukon tu holeg lamek! Hit hunumbasiyen Anden tu men ari men turuk lamuhup ulug komo eneptik iyag ane holtuk lamuhuk fug ulug An numbahibareg ap winonen tu Allah hag toho wereg ulug wel eneptukon onombolim laruk lit it unubam sembahyang uruk latfag.

¹²Siyag ane iren turuk latfahon men ketiya hiren siyag ane turuk lahebon men wirim teg eleg. Hit hununggul uwag haro reg lit Allah ele holuk fug angge hinindimuwen henemu-henemu wenggeltuk lahebon hikit toho turuk lahep.

¹³Ari fahet Anden kinang tu famen o pumbuk hit hunumbasi menen harikip fug ambeg hik hisahukmu hiren likiya hupmu ap winonen tu Allah hag toho wereg ulug wel eneptukon fahet yabuk lisag toho turuk lamuhup. Ari roho turuk lamuhup li Anden hit nindi henesug laruhuk fug.

¹⁴An HINIKNI Allahn nele uruk lahiyon tu: Fobik welamuhup li aben ap sa unuk fam tik-tem toho imin peruk halug Allah oluk werehon inowen Israel inap o Mesiren hondog eneplug wilip atfahon unuk fam tik-tem toho ihi uruk lamuhup fug.

¹⁵Iren uruk lamuhubon tu: Allah oluk werehon inowen Israel ninap ik eleruk fil o kema-kema hik-hak nisarisireg nin suhuloho hondog neneplug waharisiyon ino unuk fam tik-tem toho ihi uruk lamuhup. We tem toho Anden kinang unumbasi og isiyahon fam hondog eneplug waruhuk,” irisi.

¹⁶Irisireg NINIKNI Allahn nin ele uruk lit, ”Aben ikan yami roho watuk hag toho Yehuda inap yami roho sen enebukag ulug Anden ikan watuk inap anggolo mon enebuhuk. Mon enebuhukteg nin fobik tom fene, punumu, kiling ele ke hirahoma welamuhubon arimano oho pak watuk hag toho hiyag enebik lalihip ulug ap anggolo mon enebik waruhuk.

¹⁷An numalikisi nolohotman o kema-o kema-o hirag arik lul ulug laruk angge famen Anden fuki roho yet isaruk lahi. Siyag ane iren turukon oho Anden fag turuk lahi.

¹⁸Iren tu Allah hag toho wereg ulug wel eneptuk angge arimano ap warehon hag toho wereg lit An nangginang siyahap turusa. Amben siyahon turuk ane ariyen Anden ngi reg lahi ambeg atogman atogma keleg atisi. Ari roho An nolohotman siyag ane eneg turuk lit nele ying naptukon fahet Anden alem angginon ninggik pirenam unubam umbuhuk,” irisi.

¹⁹NIKNI Allah, alem angginon nubam atuk halug an Hat hapma hirag arik larukmu Haren mapmu nasug lit nineyap naptuk lahen. Fobik ap o pumbuk munon-manon kinang atogman atogma Hat hambeg wamuhupteg enele uruk lit, ”Nunumbasiyen tu Allah hag toho wereg ulug wel eneptuk angge arimanowen ap let enebuk fug angge enele ying eneptuk.

²⁰Ap ekeyen tu Allah hag toho wereg ulug wit ta reg ano? Wit taruk angge arimano alem wereg eleg,” uruk lamuhup.

²¹NINIKNI Allahn ele uruk lit, ”Ari fahet ketiya ap o pumbuk munon-manon arimanowen An ninggik ineyonen turuk lahi ane yet niyawag ulug inam aruhukmu An nunuk HINIKNI Allah suwaleg lahiyon onoluk aruhu,” uruk.