Read Angguruk Yali YEREMIA 17 Bible Online

YEREMIA 17 - Angguruk Yali bible

YEREMIA 17

¹NINIKNI Allahn Yehuda inap unubam ele uruk lit, ”Hiren siyag ane turuk latikibon hahatuk angge besi ineyon ambiyang arikon fam hit hinindimu hahareg. An nubahet hubu lahaptuk ambeg ambiyang fene oho hahareg.

²Hiren o kema-kema punu ke men hu reg ambeg men tu Allah hag toho wereg ulug wel eneptuk lahebon fahet hubu lahaptuk lit e alma sakoman ninisinga poholmon wereg perukon unuk Asyera fahet hutuk teg ahen wel turuk lahep. Hit henengginang atogman atogma siyag ane eneg turuk lahebon fahet henenggengge obog toho men mun angge man angge hubu lahaptuk lahep ambeg walinggoho wereg angge men ap seliyonen huhulangge hilawag ulug ininggikmu umbuhuk.

⁴Hiren turuk lahep ane fahet nolok haruk lahi ane ari indok ambulpul hag toho ulog turuk lit fobik oho war aruhu fug. Noloken yanggal henebuhukmu kinang seneg lamuhup ulug og hisarik iyahon ino hininggik kobog isalug wilip amuhup. Wilip atug kinang harikip fug ambeg lahupteg ap seliyon enemingmingangge amag ulug ininggikmu hunumbahakuk,” uruk.

⁵NINIKNI Allahn nin ele uruk lit, ”Ap san An HINIKNI Allah numbahalug ap kinangmonen let nabusa ulug wenggel harukon siyag amag.

⁶At ino yawe lekma werehon hag toho aruhureg mondabi siyagma ap welam fug teg ambeg welaruhu. Welaruhumu fano ane ubam aruhu fug.

⁷Ap san An HINIKNI Allahn let napmisi ulug wenggel harukon ino fano aruhu.

⁸At ino ik elerukmu kinang fanoman wilip atuk ahen hag toho welaruhu. Umanggen ikma larukmu mowen halo uhu fug. Inggila ilim am fug angge weregman eneg o hibi fam oho ubam se roho welaruhu. Ari roho wereg lit anggen yihik ferukmen eneg welaruhu.

⁹Ap inindi anggat teg angge famen onori enele ying eneptukmen eneg wereg. Ap enele ying eneptuk ane ari hahon winon wereg eleg. Ap inindi ari roho wereg lit fano am fug teg. Inindi hirako wenggeltuk ane ap san oluk am teg?

¹⁰An HINIKNI Allahn ap wal isaruk lit inindi inirahe apma werehon noluk teg lahi. Noluk teg lit ap wal tanehen siyag ane fano ane turukon hikit toho ayeg wat isahuk.

¹¹Ap san ori enele ying eneptuk lit enenggengge hilarukon arimano suwe anggen endebuk fug anggeyen winonen endetukon walingguruk hag toho wereg. It arimano sabal am fugmu enenggengge obog toho eleg atuken ap obog tohowen inda yako ininggaliyap enebuhup.

¹²NINIKNI Allah wel turuk lahe ibam ino At lehoma hur atuk ambeg mondabi fanowon wereg. Amukasi At heriyeg ambeg ino mun angge man angge emberimu welatfag hag toho ketiya oho wereg.

¹³NINIKNI Allah, nit Israel ninap fanowap neneptuk lahenon, ap san Hat humbahalug larukon arimano siyag amuhup. Hat ik eleruk mondabi welahenon ino humbaharuk lit ununuk kinang alinlan fam hahatukmu longgo uruk hag toho tuhup.

¹⁴NIKNI Allah, anden Hat eneg wel haptuk lahireg an fano aruhuken hihit napmihin! An siyag ahi ha nowen ulug windat nabik ma!

¹⁵Ap aruman an nubam enele uruk lit, ”NINIKNI Allahn alem angginon hunubam umbuhu ulug hiyag nisarikinon nungge fahet teko laruk eleg? Aren kong toho emberisiyon ino folo-folo nunubam amag,” uruk.

¹⁶Anden te ap aruma folo-folo siyahap enepmihin ulug heng haptikik fug. Siyag amuhup sambil fili-folo horog alep ulug wenggel harikik fug. Anden mun ane man ane Hat holohotman ap hiyag isaruk latikikon obog toho Hat holuk.

¹⁷Haren an nakolap nabuk fug! Alem angginon nubam atukmu Haren eneg nahap hirag naptuk lahen.

¹⁸An ninggaliyap nabul ulug mug naplug laruk inap arimano ininggareg ininggali hawag. Nakolap nabul perukon arimano ininggareg enekol hawag. It siyag amuhup sambil folo-folo horog aruhumu Haren ilahal waroho unusuhun.

¹⁹NINIKNI Allahn an nubam ele uruk lit, ”Lamihinteg elehet o Yerusalem walinggoho ohowon sok Yehuda inap onowesiyet kuruk ke lamihinteg nin sok winon kuruk ke lalug

²⁰ap hiyag isamihinon tu, ’Hit Yehuda inap onowesi suwon welahebon men, unumalikisi Yehuda hinap men, Yerusalem hinap men, hit sok aruma fene kuk wilip am turuk lahebon obog tohowen NINIKNI Allahn ele urukon tu holeg lamek!

²¹Hit war ahep ha nowen o sabir angge nungge-nungge ha rulug sok aruma ele keyen kuruk lamuhup fug.

²²O ino sambil hit hinibamen oho nungge-nungge walug wilip atuk lit yabuk wibuk fug angge welamuhup. O sabir angge An wenggel niyaruk lit kel taruk lamuhup ulug hit hunumbasi hiyag isarik iyag ane hikit toho turuk lamuhup.

²³Hit hunumbasiyen At ele holtul fug ulug inisanggo lare felug inindi haro roho wereg lit Anden komo eneptik iyag ane hikit toho turuk latfag fug.

²⁴Iren turuk latfag fug ane ino fahet An HINIKNI Allahn nele uruk lahiyon tu: Hit it onombolim la fug angge An nele holtuk lit o sabir angge fahet hiyag hisarik iyahon hikit toho turuk lamuhup. Anden imbiyag ane roho nungge-nungge ha rulug sok aruma ele keyen kuk fug angge yabuk oho wituk lamuhup fug.

²⁵Ari roho welamuhup halug fobik oho ap suwon hunumba Daud ubalma Yehuda hinap fet henesuhon onotsi suwon-suwon men kereta wam kudan lisoho walug laruk angge fam lahalug larukon arimano men hit Yehuda hinap men Yerusalem hinap men sok aruma ele keyen kuk wilip am turuk lit o aru fam mondabi yug toho welamuhup.

²⁶Ap o Yehuda pumbuk men o Yerusalem walinggoho werehon men, Benyamin inap men, tom fene werehon, punu ke werehon, ik ambut fil lekma werehon obog toho waharuk lit wam An nolohotman esetukonet indokma yaltukonet An nubahet emberukon suburu men amben fano angge men An HINIKNI Allah nibam walug waharuk lamuhup.

²⁷Hiren An nele sobir isalug o sabir angge fahet imbiyahon hikit toho tuk fug angge o ino sambil nungge-nungge ha rulug sok aruma ele keyen kuruk lamuhup halug Anden sok aruma harep pisaho fusuhukmu aben wabuk fug tehen nil larukmen eneg ap suwon inibam o fanowon obog toho elehap tuhu,’ ulug hiyag isamihin,” irisi.