Read Angguruk Yali YEREMIA 18 Bible Online

YEREMIA 18 - Angguruk Yali bible

YEREMIA 18

¹NINIKNI Allahn an Yeremia nubam ele uruk lit,

²”Hat lamihinteg ap kinang fam kubag wituk ahun ambeg lamihin. Lamihinteg weregma Anden hat hubam nele iminon holmihin!” irisi.

³Irisimu an larikikteg kubag wituk ahun ibam kurukmen aren kubag eke wituk latisi.

⁴Kubag kinang puwa fam inggiken tag turukmen fano atisi fugmu nin eke fano roho witmin ulug kubag winon eke wituk latisi.

⁵Anden kilap harukmen NINIKNI Allah ele Israel inap fahet an nubam hiyag nutuk lit,

⁶”Israel hinap numalikisi, kinang fam wituk ahun inowen turuk hag toho Anden hit hunubam tuk fug teg peruk lahep? Kinang fam kubag wituk ahun inggikmu werehon hag toho hir oho An ninggikmu welahepma honoluk toho welamek!

⁷Misihim sambil o pumbuk eke fahet Anden nele uruk lit, ’Anden hinibam pin kuruk lit siyahap henebuhuk,’ uruk lahi angge famen

⁸ap unusuhuk peruk lahi inap arimanowen siyag ane turuk latukuk ulug inindi yuwag atuk halug Anden alem angginon unubam umbuhuk peruk ane embeselug yihi peruk laruhuk.

⁹Misihim sambil o pumbuk eke fahet Anden nele uruk lit, ’Umanggen yag heneptuk lit suwap henebuhuk,’ uruk lahi angge famen

¹⁰iren An nele holuk fug angge nolohotman siyag ane eneg turuk lamuhup halug Anden fano ane it unubam tuhuk ulug sali emberikik ane fahet yihi peruk lit umbusuhuk.

¹¹Ari fahet haren Yehuda inap men Yerusalem inap men fahet iminon tu hiyag isa lahun, ’Allah ele urukon tu, ’An nindimuwen alem angginon hit hunubam umbuhuk ulug wep toho foroho lahi. Ari fahet hit henebe man-man kalem hareyon embeselug kalem pikiron laruk lit we fano ane eneg turuk lamuhup,’ ulug hiyag isahun angge famen

¹²iren hebeloho hiyag hutuk lit, ’Alem elegma nit komo nenebuk fug! Nit nenemuwen peruk lahe ane eneg turuk lit nununggul uwag arik toho wereg lit siyag ane eneg turuk lamul,’ ulug hiyag humuhup lit teg,” ulug hiyag nitisi.

¹³NINIKNI Allah ele uruk lit, ”O pumbuk kinangma werehon obog toho lalihipteg unubam kapal isaruk lit, ’Israel inaben amben siyahon pabi-pabi ane turuk latusa. Ap san o pumbuk winaman ari hahon turukon hol harikip?’ ulug hinog og isahup!

¹⁴Hina tom fam hililip tohon eleg am teg? Ik sunon tom famen wilip atukon firig am teg?

¹⁵Eleg-o, we An numalikisiyen An fahet enepeleg toho wereg lit usangge alem elehon fahet wam yaltuk. It indam funggalem yatfag ke fano roho lelep angge famen usangge fam wenggeltuk ane ariyen unuyug kik toho mako wamburusareg farema funggalem yaho eleg ke laruk.

¹⁶Iren o aru siyahap turusama ap winonen yet haruk lit me napeyen nahap alto ulug wasubag sup isalug ininggaliyap turukmen eneg welamuhup. O pumbuk yet hil laruk inaben enekolen homhombuk ilik uruk lit siyag ulug ununggul kaya ruruk lit laruk lamuhup.

¹⁷Siyelu ineyon yali filen waharuk lit inggila fu roho walug laruk hag toho Anden oho it arimano ap seliyon onolohotma hik-hak isahuk. Siyag amuhup sambil ino An nambol yig isaruk lit yet isahuk fug,” irisi.

¹⁸Israel inaben enele uruk lit, ”Yeremia wabuhuk ane fahet nenele ulen maniyek! At eleg aruhu halug hayen! Allah olohotma unduhuk inap imam arimanowen milal neneptukon eleg aruhu fug, alem onoluk inaben komo neneptukon oho eleg aruhu fug, Allah wene hiyag nisaruk inap nabi arimanowen hiyag nisarukon obog toho eleg aruhu fug. Inggareg Yeremian hiyag nisarukon hebeloho hiyag utuk lit wabulen maniyek! Aren urukon holtuk lamuhuk fug!” uruk latusama anden Allah fam sembahyang uruk lit,

¹⁹”NIKNI, an kim niyaruk lamin! An fahet ninirim peruk inaben enele nabug urukon hol himin!

²⁰Fano ane turukon fahet siyag ane fam ayeg wabuk teg? Holuk toho welamin: Anden it arimano fahet heng haptuk lit, ’Hat holok ane it unubam tuhun fug,’ ulug Hat holohotman ili og eneptuk latikik angge famen iren an mako wambukag ulug kinang habuloho yebangge yep teberusa.

²¹Ari turukon ari fahet it unumalikisi suburu oboken war amag ulug hik isahun! Winon karohen kong toho lin ukag ulug umbusuhun! Enehunsi unumalikisi men waroho lin uhupmu hiyap yuwog eneg welamuhup. Ap arimano ouk alem suwonen war amuhupmu kabiniyon tog elman karog fam unusuhup.

²²Haren huhulangge hilaruk inap mon enebuhunmu it enepelegma luhaloho enembeg wamuhupteg unusurukmu o ele keyen enele hum toho ya nga ukag! Anden uruk lahiyon te alem tu: Iren Yeremia mako wambukag ulug kinang habultuk lit an nuyug yebangge elma kukag ulug yep turuk.

²³Iren an nuwabul ulug turuk ane ari Hat holuk toho wereg lit iren siyag ane turukon hondo ruhun fug, hare ane turukon ari Hat holohotman eleha fusuhun fug! Hat halukeman fuk toho unusukag! Haren puhun sambil holok haruk lahen ane unubam tuhun!” ulug heng tirikik.