Read Angguruk Yali YEREMIA 19 Bible Online

YEREMIA 19 - Angguruk Yali bible

YEREMIA 19

¹NINIKNI Allahn an nubam ele uruk lit, ”Hat lamihinteg kubag kinang fam wirihon eke onggo palmihinteg Israel inap onowesi winon men An nolohotma unduhuk inap imam sabalon winon men wol eneplug

²elehet pumbuk walinggoho ohowon sok ele unuk Beling keyen Hinom tonggoma lalihip! Lalihip ambeg ariman nele hiyag hitminon hikit toho hele ine roho hiyag isamihin.

³Haren hiyag isamihinon tu, ’Hit ap suwon raja Yehuda kinang seneg lahebon men o Yerusalem hinap menen Allah ele holeg lamok! Allah pohol ha kinang ha senehon Israel ninap NINIKNI inowen ele urukon tu, ’Anden o aru fam alem angginon umbuhukmu aben holuhupteg inisanggo tale nge ruhu.

⁴Israel inaben An numbahalug o aru ap winonen nunumbasi ulug wel eneptukon ininggikmu emberuk latusa. Ap winon unumbasi arimano inilen oho harusa fuhon, iniknisiyen oho hibag fuhon, Yehuda kinang seneg inaben oho harusa fuhon unubahet hubu lahaptuk latusa. Ari roho til laruk lit o aru fam ap siyag ane turusa fuhon enemep saplangge hinanggoho hilil-halal isarusama keleg irisi.

⁵Iren ap winon unumba Baal fahet nunumalikisi waroho yaltuk lamuhuk ulug helep sengget watil laharusa. An nindimuwen ari peruk eleg ane hiyag isarikik fuhon it ininggarehen turuk.

⁶Ari fahet we tot welamuhupmu o aru fahet ununuk Tofet men tonggo Hinom uk fug angge unuk keron ”Ap Watuk Ambeg” suwaluhup.

⁷Anden Yehuda inap men Yerusalem inap menen o aru fam ari roho tuhuk ulug enele uruson elehap turuk lit ap seliyonen tog elman unusukag ulug enehime og enebuhup inap ininggikmu umbusuhuk. Enebe waroho umbusuhukmu suwe pohol ke larukon men mene farema werehon menen naruk lamuhup.

⁸O aru Anden siyahap tuhukmu ap winonen yet haruk lit amben siyag ulug enembiyang lat taruk lit ininggaliyap eneptuk lamuhup. O pumbuk aru yet hil laruk inaben alem humon-hamon unubam atisiyon yet halug enekolen unum yinggiloho laruk lit wasubag sup isalug laruk lamuhup.

⁹Anden Yerusalem inap unusukag ulug ap seliyon mon enebuhukmu wamuhupteg walinggoho kilap enesugmu Yerusalem inap suburu oboken war am hag teg lit onori men unumalikisi men ununu naruk lamuhubon fahet hiyag isamihin.

¹⁰Hiyag isamihinteg onggo palmihin anggubag ino hat min lalihibon arimano onolohotman arap toho hik isamihin.

¹¹Hik isamihinteg hat hele hiyag isaruk lit, ’NINIKNI Allah pohol ha kinang ha senehon inowen ele urukon tu, ’Kubag tu arap toho hik isarukmu ahandip tuk fug teg hag toho Anden oho ap o pumbuk aru werehon men Israel inap obog toho unubam ari roho tuhuk. Ari roho turuk lit ap warehon sal eneptuk ambeg elehen o Tofet iren fanoma peruk ambeg ino ap warehon sal eneptuk ambeg aruhu.

¹²O Tofet fam tuhuk hag toho o pumbuk aru fam oho teko lahu.

¹³Yerusalem inap men onowesi Yehuda kinang seneg inap arimanowen hinawiyen suhal fahet amben fano angge yaltuk lit ap winon nunumbasi ulug wel eneptukon unubahet ik anggur ahaluwe hililtuk ambeg arimano fano amuhuk ambeg peruk angge famen ap siyag atuk ambeg aruhu,’ imihin,” ulug hiyag nitisi.

¹⁴An NINIKNI Allahn o Tofet hiyag isa lamihin ulug mon naptisi ambehen suhuloho waharikikteg Allah ibam owahalma ap anggolo luhaloho weregma nele hiyag isaruk lit,

¹⁵”Allah pohol ha kinang ha senehon Israel ninap NINIKNIYEN hiyag nerehekon tu, ’Ap aruma ununggul uwag arik teg lit nele holtuk elehen Anden irikik ane hikit toho o aru men pumbuk walinggoho werehon arimano men alem angginon unubam umbuhuk,’ ehek,” ulug hiyag isarikik.