Read Angguruk Yali YEREMIA 2 Bible Online

YEREMIA 2 - Angguruk Yali bible

YEREMIA 2

²”Lahunteg o Yerusalem inap unubam NINIKNI Allahn ele ti roho irisi ulug hiyag isa lahunon tu, ’Hat tuhum wereg lit An hindi nasug latikin. An nahun ulug hindi niyaruk latikin. Anggenma suburu eleg ke An nombolim laruk latikinon ari obog toho An noluk teg lahi.

³Itano li Israel inap suburu tamon Allah fahet emberukon hag toho An it INIKNI Allah nanggengge welatusa. Ap san An Allah fahet emberukon arimano naruk latusa inap arimano siyag ane turukon ariyen alem angginon unubam atusa,” ulug NINIKNI Allahn ele nubam irisi.

⁴NINIKNI Allah ele iminon aru Yakub umalikisi welahebon men Israel hinap hununggul unuk wal-wal welahebon menen holiyek:

⁵”An Allahn siyag ane nungge tirikikmu hiniknisi hunumbusagsiyen yet harusa? Iren An numbahalug tu Allah hag toho wereg ulug wel eneptukon siyahon arimano onombolim laruk lit ininggareg siyag atusa.

⁶Lekma mun angge man angge eleg ambeg punu fanggong teg ke og eneplug laruk latikik. Kinang lilog teg ambeg hik teg ke aben unuyug soptuk eleg ke ap welam fug teg ke hondog eneptuk latikik angge famen Ninikni Allah nit o Mesiren hondog neneplug wilip atisiyon ino kema wereg ulug hinog og niyaruk latusa fug.

⁷Anden kinang fanoma hondoko hunumbaharikikteg kinang ino famen mun angge man angge fanowon wilip atukon hiren nawag ulug og hisaruk latikik angge famen hiren kinang Anden og hisarikikon ino fam kik waharikipteg itano siyahap tirikip. An nangginang ino pabiyap turuk hag toho tebeserikip.

⁸An nolohotma unduhuk inap imam arimanowen oho NINIKNI Allah kema wereg ulug hinog og niyaruk eleg. Ap unggum kong turuk inaben oho An fahet wenggel haruk elegma ap fet enesug inaben oho An enembol yig nutuk. Allah wene hiyag isaruk inap nabi arimanowen oho Baal fahet ninikni ulug at unuk fam ap hiyag isaruk lit ap fanowap enebuk fug tohon onombolim mug eneplug laruk.”

⁹”Alem hit hunubam werehen Anden hit pet heneptuk lahi ane aru hir oho hunumalikisiyen ondohowonen endebuhubon oho pet heneptuk laruhuk ulug An Allahn sali uruk lahi.

¹⁰Ik suwon paloho nindig amuhupteg Siprus inap ik ayegma werehon arimano pen isa lahup! Kedar inap wereg ambeg oho lalihipteg hinilen fuki roho kim isa lalihip ulug ap mon enebuhup! It kim isa lahupteg tuma welahep ane aru hag toho ir oho wereg ano ulug hinindi anggar aruhu!

¹¹Ap o pumbuk winamonen tu Allah hag toho wereg ulug wel eneptukon unubalma ap winonen nunumba ulug wel eneptukon alem elehon kilaptukmu yet harikip ano? We An numalikisiyen Inikni Allah it palimuwap eneptuk lahiyon nubalma ap let enebuk fug tehon fahet tu Allah hag toho wereg ulug kilaptusa.

¹²Ari fahet numalikisi poholma welahebon arimano henekolen hinindi yuk toho hunuwag elek turuk lit welamek! ulug An HINIKNI Allahn uruk lahi.

¹³An numalikisiyen pirenam siyag ane turuk lit An ik eleruk mondabi werehon ino numbaharusareg it enemuwen ik sene yenggel am fuhon firig atukon habul tarusa.”

¹⁴”Israel inap ap enemingmingangge men enemingminganggeyen ondohowon men wereg eleg. Nungge fahet ap seliyon arimanowen it unusuruk lit wereg?

¹⁵Mene singa olokonen ap namin ulug hilak turuk hag toho ap seliyonen Israel inap unubam ngik-ngog turuk lit o pumbuk harep pisako unusurukmu olun atisireg fare ingga laharisi.

¹⁶Memfis inap men Tahpanes inap menen hunusuruk lit hininggaliyap heneptuk latusa.

¹⁷An Allah HINIKNI fanoma hondog heneptuk lahiyon ino numbaharuk lahebon ari famen hininggarehen alem angginon aru hunubam umbat taruk latikip.

¹⁸Hit o Mesir laruk lahep angge famen sehen seneg inaben windat henebuhup fug. We ik Nil nuk oho laruk lahep. Hit o Asyur laruk lahep angge famen let henebuhup fug. We ik Efrat nuk oho laruk lahep.

¹⁹Siyag ane turuk lit hininggarehen siyahap taruk lahep. An henembolmayap naptuk lahebon ariyen kal oko alem angginon hunubam aruhu. An Allah HINIKNI henepeleg atuk lit henekol niyaruk lahep fugmu amben siyahon anggolo hunubam atisiyon hinindimu honoluk toho yet haruk lamek!” ulug NINIKNI Allah pohol kinang senehonen ele uruk latisi.

²⁰Allah ele uruk lit, ”Anden sum fanowon hunggulmu sukni feruk latikik angge famen indamen tulug ketiya oho sum keroho hik isaruk lahen. An hat men nininggik ahandip toho wereg lit ahun uhe hag toho welatukuk angge famen haren An ninggik kobog isaruk lit, ’Haren an ninggik lisoho apmayap nabuhun fug,’ uruk lahen. Punumu usa ane turuk ambeg men e usa ahen alma sakoma kulug ying atlug pabi-pabi ane turuk lahen.

²¹E anggen fanowon yihik fuhu ulug An ninggiken eneko yag haptikik angge famen e anggen loloho wambulug filik turuk lit e ino mondabi siyag ahen atuk hag toho hat hubabut oho siyag atikin.

²²Hahap musan fam ho ruruk lit sabun fam anggoloenam umatuk lahen angge famen Anden yet hiyaruk lahimu siyag ane hubam somug hag toho tag teg lahen ulug An HINIKNI Allahn uruk lahi.

²³Haren, ’An ap winon iniknisi Baal onombolim laruk lit ninggarehen siyahap tarikik fug,’ uruk lahenon ari nangginoho hele ine roho uk teg lahen? Haren kiling elman siyag ane turuk lahenon yet hamihin. Haren turuk lahen ane fahet holuk toho welamin: Nare, wam olombik fitlug uwali yami ruruk lit elehet halog isalug amben paltil sat toho anggen ke la wam turuk hag toho turuk lahen. Wam olombik fitlug larukmu ap san senebuk teg? Wam ino inggarehen watmisi ulug wam uwaliyon inowen sat toho yami ruk fug angge we wereg.

²⁴

²⁵Uwali fahet laruk lit huyug siyag aruhu rohon hubam anggat toho welamin! Ap winonen tu Allah hag toho wereg perukon hele ine roho wel eneptukmen helemahuwe wilip atuk lit hanggolop halo roho ik obok hehen ha nowen! Ari roho hiyag hutuk lahi angge famen haren nele pisan isalug, ’Komo naptuk lahenon ari saplangge uruk lahenma anden ap o winamon nindi enesug lit it onombolim laruk lahi,’ ulug hiyag nutuk lahen,” ulug NINIKNI Allah ele irisi.

²⁶NINIKNI Allah ele uruk lit, ”Israel hinap ap suwon kinang seneg lahebon men onowesi suwon welahebon men An Allah nolohotma unduhuk hinap imam oho nawene hiyag isaruk hinap nabi oho hit obog tohowen e fam ninikni ulug wel turuk lit helep fam haren indag neneptikin ulug An Allah men wirim turuk lahep. Ari turuken ap yoholiyangge waruk inap aben sen eneptukmu ininggali atuk hag toho hir oho sen heneptukmu hininggali hahup. Hit heneluke yig num fug angge An henembolmayap naptuk lahep angge famen alem angginon hunubam atukmu hiren te, ’In atlug let nenebin, let nenebin!’ ulug mingming naptuk lahep.

²⁷

²⁸Hiniknisi hininggik fam laltuk latikibon arimano kema wereg? Alem angginon hunubam atukmu hiniknisi hiren wel eneptuk lahebon in amuhupteg windat henebuk teg ano ulug Anden yet hisahuk. Yehuda hinap nori, hinibam o pumbuk anggolo weregma hiniknisi hiren wel eneptuk lahebon o wal toho anggolo foroho lahep.

²⁹An HINIKNI Allahn nele uruk lahiyon tu: Alem keyon An nubam weregma hiren An nele ying naptuk lahep? Hit obog tohowen An nele sobir isaruk lahep.

³⁰Hit hunumalikisi holukag ulug unusirikik angge famen An nele holtuk latusa fug. Mene singa olokon inowen unusuruk hag toho hiren oho namingmingangge hit hunubahet mon eneptikikon nabi arimano karog fam unusuruk latikip.

³¹Hit ap sa umalikisi hag toho welahep? Hit An nele fuki roho holtuk lamuhup! Hiren An fahet inggik elehon, mun angge man angge fanowon og nisaruk elehon, hik tegma hik nisaruk ahun peruk lahep? Nungge fahet hit An numalikisiyen henele uruk lit, ’Nit nenemu in ahereg NINIKNI Allah ambeg lul fug,’ uruk lahep?

³²Hiyap misihen sum ambol mapmu eleg angge la reg? Hiyap tuhumonen ap enembeg wing kimin ulug sum keron ambol mapmu rohon embeselug ambol abiye la reg? Eleg-o nori, we hit An numalikisiyen indamen tulug hup winag ha fug angge amusun toho An fahet henepeleg atisireg ketiya oho henepeleg toho welahep.

³³Hat lamin peruk ke laruk lit hindimuwen ap hilamin perukon fano roho hilahun! Yaying turuk hiyap arimanowen oho haren turuk lahen ane yet hiyaruk lit siyag ane milal ta reg.

³⁴Ari hag toho til-wil larukmu ap enengge elehon siyag ane turusa fuhon enemep feteng toho hasum fam tag atuk latisi. Iren ap enenggengge hilarusa fug angge famen haren it arimano saplangge sen eneptuk latikinteg enemep hinang eneptuk latikin angge famen

³⁵haren uruk lit, ’Anden siyag ane tirikik fuhon ariyen Allahn olok ane nubam tuk fug angge numbaharisi,’ uruk lahen. Haren an siyag ane turuk eleg nahun uruk lahenon ari fahet Anden alem hubam umbuhuk.

³⁶Hat kalem pikiron embeselug hare ke laruk lahen ane fahet hayen peruk lahen? Asyur inaben windat nabuhup ulug enembeg laruk lahen angge famen windat haptusa fugmu hinggali atisi hag toho Mesir inaben let nabuhup ulug enembeg lahun angge famen let habuhup fugmu hinggali aruhu.

³⁷Haren an nibil amuhup peruk lahen inap arimano Anden nirim ulug apmayap eneptikikmu iren hat ili og habuhup fug. Ari fahet o Mesir ariman oho wilip atuk lit hindi angginen hinggik mahabol pug toho suhuloho hibam waruhun,” ulug Allahn ele irisi.