Read Angguruk Yali YEREMIA 21 Bible Online

YEREMIA 21 - Angguruk Yali bible

YEREMIA 21

¹Ap suwon Zedekia inowen hun Malkia amloho Paskur men hun Maaseya amloho Allah amingmingangge imam Zefanya men Yeremia ambeg lalihip ulug mon eneptisimu nambeg waharusareg hiyag nutuk lit,

²”O Babilonia inap onowe suwon Nebukadnezar umalikisi menen nit nunusul ulug waharusama NINIKNI Allahn nit nunubam teko lahu ane fahet kapal hamihin. Nebukadnezar ino nit nunumbahalug ibam lawag ulug NINIKNI Allahn indam aben tuk fug teg ane turuk latfag hag toho turuk lit windat nenebuhu ano?” ulug hiyag nutusa.

³Hiyag nutusama anden hebeloho hiyag isaruk lit, ”Honowe Zedekia hiyag irik lalihibon tu:

⁴Nit Israel ninap NINIKNI Allahn ele urukon tu holeg lamin! Babilonia inap onowe suwon umalikisi menen waling henebik waharusama hat humalikisi it unusul ulug o pumbukmuwen wilip atusareg ketiya elehet sel ke tog aptuk lit wereg angge famen Anden it inine elehap enebuhukmu ap seliyonen nunusuk nowen ulug suhuloho elehet undama kik wamuhup.

⁵Kik wamuhupmu An nundama ahe laharukmu nindimu indok ambulpul hag toho ulog turuken ninggik ineyon fam hit men tog aptuk lit nolok ane hunubam tuhuk.

⁶Nolok ane hunubam tuhukmu hit o aruma welahebon abet wamet obog toho ouk alem suwonen war amuhup.

⁷Yerusalem inap ouk men ap seliyon men suburu obok menen hunusurukmu we tor angge welamuhubon men hat Zedekia hotsi men Anden Nebukadnezar umalikisi men ininggikmu hunumbahakuk. Hunumbahakukmu inilaheg ulug inindi hisa fug angge pinggi hunusuhup. An HINIKNI Allahn nele aru uruk lahi ilihip,” ulug hiyag isarikik.

⁸Hiyag isarikikteg Allahn hiyag nitisi ane hikit toho Yerusalem inap unubam nele uruk lit, ”NINIKNI Allahn ele urukon tu holeg lamek: Anden hit fano welamuhup ane men war amuhup ane men fahet hiyag hisamin ane hit hininggarehen fanowon ke siyahon ke ulug wenggel homok.

⁹Ap sa-o sa-o pumbuk aruwen wilip am fug angge pok amuhup halug winon ap seliyonen hunusurukmu winon suburu obok men ouk suwon menen war atuk lamuhup. Ap sa Babilonia inap enepma aruhuk ulug o aruwen wilip amuhup inap arimanowen eneg, ’Nunuselep angge famen nonoluk welahe,’ peruk lamuhup.

¹⁰Ari peruk lamuhup angge famen o Yerusalem aru Anden Babilonia inap onowe inggikmu umbuhukmu harep pisako oluna fusuhu. Anden o aru nindi reg lam fug angge mondabi siyahap tuhuk. An HINIKNI Allahn nele aru uruk lahi,” ulug hiyag nitisi ane hikit toho hiyag isarikik.

¹¹NINIKNI Allahn an Yeremia hiyag nitisi ane hikit toho Yehuda inap onowe umalikisi men unubam nele uruk lit, ”Hit hunumba Dauren ondohowonen ondohowon welahebonen NINIKNI Allahn ele urukon tu holeg lamek: Hiren likiya hupmu alem obog toho haloho emberuk lit onolok inaben siyahap eneptukon arimano it ininggikmuwen tel eneptuk lamuhup. Hiren amben siyahon turuk lahebon fahet An nolok haruk lit nindimu indok ambulpul aben wabuk fug tohon lahuk nowen.

¹³Hit hinibam helep ineyon palimu welahebon, Anden hit siyahap henebuhuk ulug waharuk lahi. An HINIKNI Allahn nele aru uruk lahi. Hiren henele uruk lit, ’Ap seliyon sa nit ninibam aru kik wam teg?’ uruk lahep angge famen

¹⁴hiren amben siyahon eneg turuk lahebon fahet Anden ayeg wat hisaruk lit hit hinibam fanowon e ineyon fam wirig lahebon ino harep pisaho fusuhukmu mun angge man angge walinggoho werehon obog toho indoken nahu. An HINIKNI Allahn nele aru uruk lahi ehek,” ulug hiyag isarikik.