Read Angguruk Yali YEREMIA 22 Bible Online

YEREMIA 22 - Angguruk Yali bible

YEREMIA 22

¹NINIKNI Allahn an nubam ele uruk lit, ”Yehuda hinap honowe suwon ibam lamihinteg Anden iminon tu hiyag isamihin:

²Hat ap suwon humba Daud ubalma wereg lit Yehuda inap fet enesug lahenon men, hotsi men, humalikisi Yerusalem inap menen NINIKNI Allahn ele urukon tu holeg lamek!

³Hit hunumalikisi fano roho fet enesug lit alem unubam werehon haltuk lamuhup. Ap pohon men malik suwarehon men hiyap yuwohon men unubam honolok ane turuk lit apmayap enebuk fug angge onolok inaben siyahap eneptukmu it ininggikmuwen tel eneptuk lamuhup. Ap alem unubam elehon o aruman unusuhup fug!

⁴Hiren Anden ihiyon ari hikit toho turuk lamuhup halug ap suwon hunumba Daud ubalma Yehuda hinap fet henesuhon onotsi suwon-suwon men kereta wam kudan lisoho walug laruk angge fam lahalug larukon arimano men unumalikisi men ap suwon ibam sok aru ele ke kuk wilip am turuk lamuhup.

⁵Anden ihiyon ari holuhup fug halug o fanowon aru halog toho lin uhu ulug An HINIKNI Allahn nele wirik toho nayeg umen uruk lahi ehek imihin,” ulug hiyag nitisi.

⁶NINIKNI Allahn Yehuda inap onowe ibam fanowon fahet ele uruk lit, ”O aru kinang fanoma o Gilead men tom Libanon e sahi ineyon wereg ambeg men hag toho wereg perikik angge famen Anden olunap tuhukmu lekma hag atuk lit ap enele teng uhup.

⁷O aru siyahap tukag ulug Anden ap mumal enebuhukon mon enebuhukmu yaha unumaloma hubaloho wamuhupteg e sahi fam wirig ibam aru halog toho indokma yaluhup.

⁸O Yerusalem aru halog toho lin uhumu ap o pumbuk ke aru pisan isalug larukonen yet haruk lit ap ekeyen eke fam, ’Nungge fahet NINIKNI Allahn o suwon aru siyahap tirisi?’ urukmu

⁹aben it hiyag isaruk lit, ’It INIKNI Allahn an numalikisi welamuhup ulug sali imbibahon sobir isalug ap winonen wel eneptuk angge fam ninikni uruk lit sembahyang uruk latusa ane fahet INIKNI Allahn alem siyahon tu unubam emberisi,’ uruk lamuhup,” irisi.

¹⁰Hit Yehuda hinaben honowe suwon Yosia ware feseruson fahet yi hunu roho uba yabuk fug. At amloho inggik hele waroho o winama imbisik larusa ambehen fobik suhuloho waharuk lit indag atisi ambeg yet hahu fuhon fahet uba yatuk lamek!

¹¹Ap suwon Salum ikni Yosia ubalma wereg lit Yehuda inap fet enesuhon o aruwen inggik lisoho o winama imbisik laruson fahet NINIKNI Allahn ele urukon tu, ”At ino suhuloho waharuk lit

¹²o aru nin hebeloho ilen yet ha fug angge imbisik larusa ambehen war aruhu.”

¹³Ap san olok ane turukon palimu o fanowon witukon siyag aruhu! Ap san hare ane turukon emberimu hinawi wiri ferukon war aruhu! Ap san are eke mingming turuk angge famen onggo og utuk elehon mondabi siyag.

¹⁴Hat ap suwonen hele uruk lit, ”Anden o suwon eke wituk lit hinawi hiyaloho wiri fuhuk,” uruk lahen. O ino ubahat fene keyenteg fo rebelug hondongge e sahi fam wiroho mut ka lahaptuk lahen.

¹⁵Hat hindimuwen peruk lit, ”E sahi anggolo fam o wituk lahi ane ariyen an palimu aruhukmu ap suwon winon apma amuhup,” peruk lahen ano? Hat hikniyen suburu men ik men naruk lit ebe fano welatfag fug ano? Aren ap let eneptuk lit fano ane eneg turuk latfag.

¹⁶Ap inine elehon men inilaheg toho werehon men alem unubam weregma hat hikniyen fano haloho emberuk latfag ane ariyen mun ane man ane fano atuk latfag. NINIKNI Allahn ele uruk lit, ”Anden peruk lahi ane onolukon arimanowen ari hag toho turuk lamuhup,” uruk.

¹⁷Hat hindimuwen mun angge man angge an ninggikmu welalep ulug humalikisi huyuhen sobir-sabar isaruk lit ap siyag ane turuk elehon unusuruk lahen.

¹⁸Ari fahet NINIKNI Allahn ap suwon Yosia amloho Yoyakim o Yehuda inap fet enesuhon fahet ele urukon tu, ”At war aruhu halug aben piya sini uruk lit, ’Yihi-yehe, ninikni war aha,’ uruk lamuhup fug.

¹⁹Wam keledai wareg angge kinangma saluk fug angge o pumbuk selma hik isaruk hag toho Yoyakim wareg angge oho kililim isil lahupteg elehet o Yerusalem walinggoho ohowon ambol fil hik isa lahup.”

²⁰NINIKNI Allahn ele urukon tu, ”Yerusalem hinap, nori, hit hinibil atuson obog toho waroho ilkal isarusama tom Libanon fam lahalug henele hi roho ya nga uruk lamek! O Basan punumuwen oho tom Abarim famen oho henele hum toho uba yatuk lamek!

²¹Hit hinindi henehiyeg toho welatikip li Anden hit komo heneptuk latikik angge famen hiren holtul fug uruk latikip. Hit henebe totman angge An nele apmayap naptukmen eneg welatikip.

²²Ari fahet hit honowesi fet henesuhon siyeluwen walug laruk hag toho longgo uhup. Hit hinibil atuk latuson arimano oho ininggik lisoho o winama imbisik lahup. Hiren siyag ane til-wil laruk latikibon fahet alem ari hunubam aruhumu hininggali haruk lamuhup.

²³Ketiya e sahi ineyon tom Libanon famen walug watug wirig ibam wereg lit hit hinindi henehiyeg toho welahep angge famen fobik hiyaben malik endebuk oho lit tanggusi naruken nenek turukon hag toho hunubam aruhumu henele ya nga uruk lamuhup.”

²⁴ NINIKNI Allahn hun Yoyakim amloho Yoyakhin o Yehuda inap fet enesuhon fam ele uruk lit, ”Hat sohomangge ninggikmu kilabehon welalen halug oho Anden hog toho hik heyele ulug An HIKNI Allah noluk welahiyonen nele tem toho uruk lahi.

²⁵O Babilonia inap onowe suwon Nebukadnezar umalikisi menen an nuwabuhup ulug hakol haruk lahen inap ininggikmu Anden hat humbahakuk.

²⁶Humbaharuk lit haret hisingat o winama hik hisahuk. Hik hisahuk ambeg wereg lit suhuloho ninibam lahuk ulug hinindi ouk toho wenggel haruk lamuhup angge famen hinibam la fug angge weregman eneg war amuhup,” irisi.

²⁸Hun Yoyakhin ino kubag lilibug turukmu aben hik usul perukon hag toho wereg ano? Nungge fahet at umalikisi men inilen yet harusa fug ambeg hik isahup?

²⁹Hit kinang tu fam welahebonen NINIKNI Allahn ele urukon tu holeg lamek:

³⁰”Suwesingga fam Yoyakhin unuk haharoho emberuk lit hun ari oluk wereg lit alem suwon toron fano roho haluk fug teg latisimu umalikisi oho siyag atusa ulug imbiyek! Umalikisiyen ondohowonen endebuhubon misig oho Daud ubalmangge ap suwon laharuk lit Yehuda inap fet enesug laruhu fug.”