Read Angguruk Yali YEREMIA 23 Bible Online

YEREMIA 23 - Angguruk Yali bible

YEREMIA 23

¹Allah Israel ninap NINIKNI inowen ele uruk lit, ”An nambohom foroho hinaben wam arimano lin-lan isarukmu linggik-longgo urukon fahet hinindi anggin toho welamuhup!

²Hiren An numalikisi fano roho fet enesug lam fug angge lin-lan isaruk latikipmu linggik-longgo urusa. Ari fahet honoluk toho welamuk: Hiren hare ane turuk lahebon fahet Anden ayeg waroho alem angginon hunubam umbuhuk.

³Wam Anden o kema-kema hik isarikik ambohom arimano longgo urusareg we tot werehon itano Anden o ekeman-ekeman andog enebuhukteg tam welatusa ambeg inibam yugmu hondog eneplug lahukmu malik endetil larukmen anggolo amuhup.

⁴An nambohom fano roho fet enesug lamuhup ulug ap in enebuhukmu iren fet enesugmu wam arimano enekolen yuk la fug angge misig oho longgo uhup fug,” ulug NINIKNI Allahn hiyag isarisireg

⁵nin eke uruk lit, ”We tot welamuhupmu Anden Daud ubalmangge ahanuk fanowon eke wilip amag uhukmu wilip aruhu. At ap suwon raja in aruhureg indi anggat teg lit unggum fano roho haltuk lit ap o pumbuk obog toho let eneptuk laruhu.

⁶At welaruhu li itano Yehuda inap fano amuhupmu Israel inap oho inindi yuwag toho welamuhup. At fahet unuk te ”Allahn ili og neneptukon” suwaluhup.

⁷Fobik welamuhup li aben ap sa unuk fam tik-tem toho imin peruk halug Allah oluk werehon inowen Israel inap o Mesiren hondog eneplug wilip atfahon unuk fam tik-tem toho uruk lahi uruk lamuhup fug angge famen

⁸Allah oluk werehon inowen Israel inaben ondohowon arimano ik eleruk fil o ekema-ekema hik-hak nisarisireg nin suhuloho nenengginang yugmu welamag ulug hondog neneplug waharisiyon ino unuk fam tik-tem toho uruk lahi uruk lamuhup,” ulug Allahn sali emberisi.

⁹An Yeremian Allah wene hiyag isaruk inap fahet nele uruk lahiyon tu: An nindi pulung-palang isarukmu nakolen nuwag elek-elek angge turuk lit welahi. An NIKNI Allah ebe usa fulu reg ahun olohotma unduhuk lit ele ineyon ariyen an ap ik olokon anggolo nalug fanowon wenggeluk fug angge turuk ahun hag toho welahi.

¹⁰Allah ele ineyon tu, ”Ap An numbahalug larukon o aru fam keleg toho wereg. Iren siyahon eneg mutug laruk lit ap siyahap eneptukon ariyen kal oko kinang lilog atikim hoholangge eleg atisimu lekma hag atisi.

¹¹Wene hiyag isaruk inap nabi oho An nibam foroho inap imamen oho Allah eleg peruk lit hare ane turuk. An nibam oho Anden yet harukmen iren onolok ane turuk lit wereg.

¹²Siyag ane turukon ari famen it laruk abunggalem pi reg ke eneg laruk lamuhup. Hik tegma laruk lit enembilan fiyog toho wat tahup. Anden puhuk sambil alem angginon unubam umbuhuk ulug An HINIKNI Allahn uruk lahi.

¹³Anden yet harukmen nabi o Samaria werehon arimano unubabut we tot haleg eleg angge wereg: Iren nunumba Baal unuk fam uruk lahe ulug enele hiyag isaruk lit Israel inap unubam kalem hareyon milal eneptuk angge famen

¹⁴nabi o Yerusalem werehon arimanowen amben siyahon anggolo roho turuk: Iren hiyap paltuk lit enele si ane urukmen warukmen onolok ane turuk inap unubam fano turuk lahep ulug inindi enehiyehap enebil larukmu ap misihen oho siyag ane tirikik ulug wenggel haruk eleg. It obog toho fahet Anden o Sodom Gomora inap welatfag hag toho wereg peruk lahi.

¹⁵An HINIKNI Allah pohol ha kinang ha seneg lahiyonen it fahet uruk lahiyon tu: Wene hiyag isaruk inap o Yerusalem werehonen Allah eleg ulug siyag ane eneg turukmu o pumbuk kema-kema werehonen wel naptuk eleg. Ari fahet Anden wam amiye sihon men nali humu aben nalug war atuk angge nahuben og isahuk,” irisi.

¹⁶NINIKNI Allah pohol ha kinang ha senehon inowen Yerusalem inap unubam ele urukon tu, ”An nawene hiyag hisaruk inap nabi enele holtuk lamuhup fug! Iren we enele si ane uruk lit fulu roho yet hihi ulug An nambilikmuwen wilip atuk elehon inindimuwen wenggel harukon eneg hiyag hisaruk.

¹⁷Aben An nawene sabelepma sobit-sabar isarukon unubam, ’Henehiyeg toho welamuhup,’ uruk lit ap inindi arikonen wenggeltuk ane mug eneplug larukon unubam, ’Alem siyahon hit hunubam aruhu fug!’ ulug inindi kahal eneptuk,” irisi.

¹⁸NINIKNI Allah otsi poholmon arimano men enele sahaltuk lit palu roho weregma nabi arimano ap sa eke it sehelimu wereg lit Allah ele urukon ino holtisi ano? It arimano misihen Allahn peruk ane tem toho onolukon wereg ano?

¹⁹Yet teg lamok: NINIKNI Allah indimu ahe laharukon ino siyelu humon hag toho wilip atuk! Mase ril waharuk lit ap Allah wene fahet ninirim peruk inap arimano fuk-fak isaruk lit ilkal isahu.

²⁰Allah indimu tuhuk perisiyon obog toho arat tibihi puhureg eneg olok ane perukon eleg aruhu. Fobik obog arik ohoma alem tu fahet tik-tem toho honoluk aruhu.

²¹NINIKNI Allah ele urukon tu, ”Anden nabi arimano unubam An nawene hiyag isa lalihip ulug mon eneptikik fug angge famen enemuwen laruk. An nele hiyag isarikik fugmen it ininggarehen milal heheg Allah ele ti roho ehek ulug hiyag isil laruk.

²²An notsi poholmon men nenele sahaltuk lit palu roho weregma it eke welalep halug An nele hikit toho numalikisi hiyag isaruk lit kalem hareyon laruk inap fano lawag ulug suhuloho hondog eneplep.

²³Hiren Allah nit men horog toho wereg peruk lahep angge famen An hit men hili roho welahi ha reg.

²⁴Ap misihen mapmumu hirag ahi hama Allahn niyaruk eleg peruk lahep? Pohol atogman kinang atogma o kema-kema An welahi.

²⁵Nabi arimanowen, ’Nei wihi, nei wihi,’ ulug An nunuk fam enele si ane urukon Anden holtuk latikik.

²⁶Hup noenam welaruhukmu it ininggarehen milal heheg hiyag isaruk lit enele si ane urukon eleg aruhu?

²⁷Unumbusagsiyen An nunuk enepeleg atuk lit Baal fam wenggeltuk latfag hag toho ketiya oho An numalikisi Allah fahet enepeleg amag ulug nabi arimanowen nei waruk ane tintil til laruk.

²⁸Nabi ekeyen nei waruk halug nei warukon ino fahet eneg hiyag isa reg. We Anden nabi eke fam nele hiyag utuk laruhuk halug eneg at inowen An nele fuki roho hol halug Allah ele tu ulug ap hiyag isaruk lamag! Ahap men anggen men ambi reg ano?

²⁹An nawene indok ambulpul hag toho wereg, helep simbuk kik angge ineyon fam kik turukmu helep humon miyaloho lilibug turuk hag toho turuk.

³⁰Wene hiyag isaruk inaben it-it onoriyen uruk ane taluk-taluk angge hilaruk lit, ’Allah ele ti roho ehek,’ ulug hiyag isaruk ane ari fahet An it men hili roho welamuhuk.

³¹Enembilik fam yuhun angge Allah wene tu, Allah wene tu ulug hiyag isaruk ane fahet suwahal yig isahuk.

³²Iren nei wihi ulug awelwel taruk lit An numalikisi un ane hiyag isarukmu kebunggalem hareyon laruk. Alem ari fahet Anden nabi arimano wal isahuk. Nawene hiyag isaruk lamuhup ulug Anden mon eneptikik fug. It An numalikisi aruma fahet let enebuk fug teg inap wereg,” irisi.

³³NINIKNI Allahn an nubam ele uruk lit, ”An numalikisi sehelimuwon ekeyen ano namingmingangge nabiyen ano imamen ano hat kapal hiyaruk lit, ’Alem angginon ke hahon numalikisi unubam umbuhuk ulug NINIKNI Allahn hiyag herehek?’ uhup halug haren hebeloho hiyag isaruk lit, ’NINIKNI Allahn ele urukon tu: Anggin angge An numaloma ha reg lahiyon hit welahepma Anden hik hisahuk.

³⁴Nabi ano imam ano ap winon san ele uruk lit, ’NINIKNI Allahn angginon unubam umbuhuk ehek,’ uhu halug Anden ap ino umalikisi men alem siyahon unubam umbuhuk.

³⁵Ari fahet ap ekeyen eke fam henele fano roho uruk lamuhubon tu, ’NINIKNI Allahn nungge ane hiyag nesehek? Nungge ulug hebeloho ehek?’ uruk lamuhup angge famen,

³⁶’Angginon unubam umbuhuk ehek,’ uruk lamuhup fug. Ap san ari hag toho uruk halug An IKNI Allah noluk wereg lit pohol ha kinang ha seneg lahiyonen nele uruk lahi ane indi nonghong uruken hareyap turuk lit inggarehen angginon ubamap taruk.

³⁷Ari fahet hiren nabi arimano eke kapal haruk lit, ”NINIKNI Allahn nungge ane hiyag herehek? Nungge ulug hebeloho ehek?” uruk lamuhup.

³⁸Hiren Anden ihiyon ari sobir isalug, ’Angginon ke hahon NINIKNI Allahn numalikisi unubam umbuhuk ehek?’ ulug kapal haruk lamuhup halug

³⁹Anden hit sen henebuhukteg hiret hinibam hunumbasi og isarik iyahonet An nolohotman hik hisahuk.

⁴⁰Hik hisahukon fahet hit hininggali roho weregman eneg welamuhupmu aben enepeleg amuhup fug,’ ehek imihin,” ulug hiyag nitisi.