Read Angguruk Yali YEREMIA 25 Bible Online

YEREMIA 25 - Angguruk Yali bible

YEREMIA 25

¹Hun Yosia amloho Yoyakim inowen Yehuda inap fet enesugmen eneg mo uhan atisimu hun Nebukadnezar o Babilonia inap onowe suwon ket laharisi amo ino fam Allahn o Yehuda inap obog toho fahet an Yeremia At amingmingangge nabi welahiyon nubam ele hiyag nitisi.

²Hiyag nitisi ane ino hikit toho anden Yehuda inap men Yerusalem inap obog toho men unubam nele uruk lit,

³”Hun Amon amloho ap suwon Yosia inowen kinang Yehuda seneg latfag li itano mo nuwalen atfagma NINIKNI Allahn an nubam ele urukmen eneg mo ilig am wirig am turuk lit fuwap fimahen larisimu ketiya oho ele hiyag nutuk. Hiyag nutuk ane ino anden likiya hupmu hit hiyag hisaruk lahi angge famen hiren holtuk lahep fug.

⁴NINIKNI Allahn amingmingangge nabi hundig-hundig henembeg mon eneptuk latisiyon arimanowen oho awene hiyag hisaruk latusa angge famen holtuk latikip fug.

⁵Nabi arimanowen hiyag hisaruk lit, ’Hit obog toho kebunggalem hareyon laruk lit siyag ane turuk lahebon embeselug suhuloho Allah ambeg wamuhup! Wamuhup halug kinang NINIKNI Allahn hit hunumbasi og isibahon fam weregman eneg welamuhup.

⁶Ap winonen tu Allah hag toho wereg ulug wel eneptuk angge hiren oho wel eneptuk lit it unubam sembahyang uruk lamuhup fug. Hit hininggiken ninikni tu ulug laltuk lahep angge fam An nindi siyahap nabuk fug! Anden alem siyahon hit hunubam umbuhuk tohon!’ ulug hiyag hisaruk latusa.

⁷Hiyag hisaruk latusa ane ari fahet NINIKNI Allahn ele uruk lit, ’Hiren An nele holuk fug angge hit hininggiken laltuk latikip angge wel eneptuk lit An nindi siyahap naptuk latikip. Siyahap naptikip ane ariyen hininggareg oho alem angginon umbat taruk latikip.

⁸Ari fahet An HINIKNI Allah pohol ha kinang ha seneg lahiyonen nele uruk lahiyon tu: Hiren An nele holtikip fugmu

⁹An namingmingangge Nebukadnezar o Babilonia inap onowe suwon ino men ap o pumbuk iliko fil werehon obog toho men wol enebuhukmu wamuhupteg hit Yehuda hinap men o pumbuk hit walinggoho werehon men elehap heneptuk lit hit henengginanget it enengginanget mondabi siyahap tuhup. Siyahap tuhup ambeg arimano aben yet hahupteg enekolen yuk lagmag uruk lit wasubag sup isaruk lamuhup.

¹⁰Hit sehelimu aben yunggultuk ane men inda yatuk ane men aben hiyap ket hilalug enehiyeg toho wereg ane men roti anggen lilibug turuk lit aplohok turuk ane men iral umbagpag fanowon oho eleha fusuhuk.

¹¹Eleha fusuhukmu kinang aru atogman atogma ohi fare lahakumu hit men o pumbuk hit walinggoho werehon menen o Babilonia inap onowe suwon apma weregman eneg mo ilig am wirig am turukmu teng pirenman nubam hilag nisanggo fimahen 70 aruhu.

¹²Aruhumu Nebukadnezar umalikisi menen siyag ane turukon fahet Anden ayeg waroho unusuruk lit enengginang mondabi siyahap tuhuk ulug An HINIKNI Allahn uruk lahi.

¹³Anden o pumbuk wal taneg alem angginon unubam umbuhuk ulug hun Yeremia hiyag itikik ane hikit toho aren suwesingga fam haharoho emberisi ane Anden o Babilonia kinangman hikirap tuhuk.

¹⁴Babilonia inaben onolok ane turukon fahet Anden ayeg wat isahukmu ir oho ap o pumbuk suwon onowesi enemingmingangge amuhup,’ uruk,” ulug an Yeremian Yehuda inap men Yerusalem inap obog toho men hiyag isarikik.

¹⁵Israel ninap NINIKNI Allahn an Yeremia nubam ele uruk lit, ”An nindimu nolok haruk lit ik olokon kubag fam hinang isaruk lahiyon tu wamihinteg ap o pumbuk Anden mon hapmin ambeg werehon obog toho nawag ulug hinang isil lahun.

¹⁶Hinang isil lahunmu nahupteg ap seliyon Anden enembeg mon enebuhukon enelukeman nenek turuk lit fuk toho ying atuk lamuhup,” ulug hiyag nitisi.

¹⁷Hiyag nitisi ane hikit toho NINIKNI Allahn kubag ino an og nitisimu warikikteg ap o pumbuk NIKNIYEN mon naptisi ambeg werehon obog toho nawag ulug hinang isil larikik.

¹⁸Hinang isil larikikmu atamtam Yerusalem inap men o Yehuda pumbuk men onowesiyet onotsi at let eneptukonet ik olokon ino narusama inibam halog turusa ambeg ketiya oho wereg. Halog turusa ambeg arimano iraham ke larukon enekolen unum uwag yinggiloho larukmu ap san eke huluwap timin peruk halug o Yerusalem men Yehuda pumbuk men mondabi siyag atusa hag toho ar oho siyag amag uruk.

¹⁹Yerusalem inap men Yehuda inap menen ik ino narusa hag toho ap o pumbuk winamonen naruson tu: O Mesir inap onowe suwon otsi umalikisi men,

²⁰ap pohon it sehelimu werehon men, ap suwon-suwon o Uz kinang senehon obog toho men, Filistin inap onowesi suwon obog toho o pumbuk Askelon senehon men, Gaza senehon men, Ekron senehon men, o Asdod inap tor angge onoluk werehon men,

²¹o Edom inap, Moab inap, Amon inap men,

²²o pumbuk Tirus inap onowesi suwon obog toho men, o Sidon inap onowesi suwon obog toho men, o pumbuk ik saho ahik fuma fil werehon onowesi suwon men,

²³o Dedan inap, Tema inap, Bus inap men, ap unuwal oruk herehon obog toho men,

²⁴Arab inap lekma werehon onowesi suwon obog toho men,

²⁵o Zimri inap onowesi suwon obog toho men, Elam inap onowesi suwon obog toho men, Madai inap onowesi suwon obog toho men,

²⁶ap suwon inibam iliko fil yatma werehonet horogma werehonet wal tanehen ik ino narusa. Ap o pumbuk kinang atogman atogma werehonen narusa hag toho fobik o Babilonia inap onowe suwon ino oho ik olokon ino nahu.

²⁷Ik ino hinang isil larikikmu NINIKNI Allahn an nubam ele uruk lit, ”Ap o pumbuk obog toho hiyag isamihinon tu: Israel ninap NINIKNI Allah pohol ha kinang ha senehon inowen ele urukon tu holeg lamek! Ik olokon aru nalug nenek turuk lit me witlihip! Ap seliyon Anden henembeg mon eneptuk lahiyon enelukeman fuk toho ying atlihibon nin hebeloho in atihip fug ehek imihin.

²⁸Imihin ane ari holtul fug ulug kubag hinggikmuwen oko walug ik ino nalusa fug halug haren it hiyag isamihinon tu: NINIKNI Allah pohol ha kinang ha senehon inowen ele urukon tu holeg lamek! Ninirimen nul fug pehep angge famen amiyek!

²⁹Anden o pumbuk kema-kema werehon obog toho siyahap tuhuk ulug o pumbuk An nunuk toho suwalehon fam ak tihi angge re hiren te nit siyahap nenebuhu fug peruk lahep ano? Anden hir oho siyahap henebuhukmu wilip amuhup fug. Ap kinang atogman atogma werehon obog toho unusuhup ulug ap seliyon mon enebik waruhuk. An HINIKNI Allah pohol ha kinang ha seneg lahiyonen nele aru uruk lahi ehek ulug hiyag isamihin.

³⁰Ari ulug hiyag isamihinteg ap o pumbuk obog toho nin eke hiyag isamihinon tu: NINIKNI Allah lehoman ele ululu sup turuk hag toho uruk. Ibam fanowonen ele hum toho uruk. Ap o pumbuk kema-kema werehon obog tohowen hol niyawag ulug wiramna waruk inaben enele hi roho uruk hag toho ele uruk.

³¹Ap kinang atogma werehonen oho ele hum toho uruk ane ino hol haruk. NINIKNI Allahn ap o pumbuk obog toho alem unubam werehon haloho emberuk lit ap siyag ane turukon karohen unusukag ulug embeseruk.

³²NINIKNI Allah pohol ha kinang ha senehon inowen ele urukon tu: Siyelu humon kinang atog filen waharuk lit o pumbuk ekeyon-ekeyon siyahap enebil larukmen eneg ap obog toho siyag amuhup.

³³O itano li ap NINIKNI Allahn unusuhuwon arimano kinang atogman atogma lin-lan uruk lamuhupmu aben andog eneptuk lit piya sini ulug kinangma sal enebuk fug angge umbusuhupmu kinang amug war aruhu.

³⁴Hit ap suwon-suwon hunumalikisi fet enesug lahebonen henele hi roho uba yatuk lamek! Hit hinine roho turuk lahebon hinindi siyahen sabelep ke imbiltuk lamek! Hit hunusuhup sambil horog teg. O ino sambil kubag fanowon halog toho lin urukon hag toho hit siyag amuhup. We tor angge honoluk welamuhubon o kema-kema hik-hak hisahup.

³⁵Hit henembohom fet enesug lit henehako roho turuk lahebon, nit nunusuhup tohon ulug hirag arik lahup ambeg wereg eleg.

³⁶Ap suwon-suwon enembohom fet enesuhonen enele hum toho ya nga urukon hol hemek! Indam ap misihen oho it elel enebuk fug angge weregma enembohom indag taruk latusa angge famen NINIKNI Allah undama ahe laharukon indok ambulpul hag toho turuk lit enembohom endetuk ambeg arimano harep pisako siyahap turuken enembohom mondabi eleg amuhup.

³⁸Olomene hirahoman wilip atuk hag toho NINIKNI Allah indi inahan toho ibamen wilip atuk. Indi olok haruken ap seliyonen umalikisi unusil larukmu enengginangma ohi fare lahaku ehek imihin,” ulug hiyag nitisi.