Read Angguruk Yali YEREMIA 26 Bible Online

YEREMIA 26 - Angguruk Yali bible

YEREMIA 26

¹Yosia amloho Yoyakim Yehuda ninap fahet ap suwon raja ket laharisi li NINIKNI Allahn an Yeremia nubam irisi ane tu,

²”Hat lamihinteg An nibam owahalma unduhuk lit ap o pumbuk Yehuda walinggoho werehon sembahyang ul ulug waharukon unubam hiyag hitmin ane il misig oho umbusuk fug angge obog toho hiyag isamihin.

³Iren holuhupteg unubabut siyahon wal taneg haltuk lamuhup lit teg. Haltuk lamuhup halug iren siyag ane turukon fahet alem angginon unubam umbuhuk perikik ane fahet yihi peruk lit unusuhuk fug.

⁴It unubam hiyag isamihin ane tu, ’An Allah nele holtuk lit atam ari-ari turuk lamuhup ulug komo heneptik iyag ane suwesingga fam hahatfahon hit honolohotma imbiyahon ino hikit toho turuk lamuhup uruk latikik.

⁵Nin An namingmingangge nabi hundig-hundig henembeg mon eneptuk latikikon arimanowen An nawene hiyag hisarukmu holtuk lamuhup uruk latikik angge famen hiren holtuk latikip fug.

⁶An nele ying naptukmen eneg welamuhup halug atam An nibam o Silo welatfahon ino olunap tiyag hag toho An nibam tuma werehon oho siyaha fusuhukmu fobik ap o kema-kema werehon arimanowen ap eke huluwap timin peruk halug o Yerusalem mondabi siyag atfag hag toho ar oho siyag amag uruk lamuhup,’ ulug hiyag isa lamihin,” irisimu hiyag isa larikik.

⁷An Yeremian Allah ibamen ap komo eneptukmu o ino foroho inap imam men wene hiyag isaruk inap nabi men Yehuda inap obog tohowen hol harusa.

⁸NIKNI Allahn ele hiyag nitisiyon obog toho anden ap arimano hiyag isarikikmu itano it arimano obog tohowen an nubam, ”Hat pinggi huwabul,” ulug sen naptusa.

⁹Iren te, ”Nungge fahet haren NINIKNI Allah unuk fam hiyag nisaruk lit, ’O Silo siyag atfag hag toho Allah ibam tu fam oho teko lahumu o pumbuk aru halog toho siyag aruhureg ap o pumbuk aru werehon eleg amuhup,’ ehen?” ulug walinggoho kilap nasug lit pet naptuk latusa.

¹⁰Yehuda inap onowesi ap suwon ibam wereg lit alem ari fahet hol harusareg Allah ibam larusareg sok unuk Keron horogma heriyegma

¹¹imam inap men nabi inap men arimanowen onowesi men ap welatuson obog toho unubam hiyag isaruk lit, ”Ap aruwen o pumbuk aru fahet hiyag nisaruk ane hit hininggareg hinisanggo fam holtuk lahep! Ari fahet ware fusul ulug kong tilihip!” ulug heng turusa.

¹²Heng turusama an Yeremia inowen nele uruk lit, ”NIKNI Allahn mon naptuk lit Allah ibam tu men o pumbuk aru men fahet hiyag nerehekon hikit toho hiyag hisihimu hiren holehep.

¹³Ari fahet kalem hareyon embeselug hunubabut puhun toho wereg lit Hinikni Allah ele eneg holtuk lamuhup! Holtuk lamuhup halug Allahn alem angginon hunubam umbuhuk irisiyon ari fahet nambiken irikik ulug hunusuhu fug.

¹⁴An nebe hit hininggikmu ahi angge re hit hinilmu fano peruk lahebon hiren an nubam tilihip.

¹⁵Nuwatlihip halug siyag ane turuk lahi fug nahun namep hililoho hit hunubam oho ap o pumbuk aru werehon fene oho feteng toho tag aruhumu siyag amuhup. NIKNI Allahn we tik-tem toho mon naptuk lit hiyag nerehek ane roho obog toho hiyag hisihi,” ulug hiyag isarikik.

¹⁶Anden ari roho irikikmu ap suwon otsi men ap welatuson obog tohowen imam inap men nabi inap men unubam hiyag isaruk lit, ”Hun aruwen ehekon ari Allah NINIKNI unuk fam hiyag nesehek. Ari fahet ware fusul ulug alem kong tuk fug teg lahe,” ulug an ili og naptusa.

¹⁷Ili og naptuk lit Israel ninap nonowesi winon oho in atusareg ap arimano palu roho weregma unubam enele uruk lit,

¹⁸”Hun Hizkia inowen Yehuda kinang seneg latfag li o Moresyet ahun nabi Mikha inowen Yehuda inap obog toho unubam hiyag isaruk lit, ’NINIKNI Allah pohol ha kinang ha wal tibahon inowen ele urukon iminon tu, ’Aben yabuk wituk lit kinang hebeltuk hag toho o Sion hebel isahupmu olun aruhu. O Yerusalem oho harep pisako pin kuruk lit unusuhup. Allah ibam wereg ambeg tom aru fam oho fare ingga lahaku,’ ulug hiyag isibag.

¹⁹Mikha inowen hiyag isibag ane ari ap suwon Hizkia men umalikisi obog tohowen hol hibareg Mikha ino ware fisibag ano? Eleg-o, Hizkia ino NINIKNI Allah fahet akol toho wereg lit hindi nisimin ulug heng turuk latfagma NINIKNI Allahn alem angginon unubam umbuhuk pibag ane fahet nambiken ulug unusibag fug. Niren alem angginon e kanti lisoho nit nunubam umbat taruk lamuhukon ari fano peruk lahep?” ulug ap arimano komo eneptusa.

²⁰Ap eke winon oho o Kiryat-Yearim ahun Semaya amloho Uria inowen an Yeremia uruk latikik ane hag toho aren oho NINIKNI Allah unuk fam o Yerusalem men pumbuk walinggoho werehon fahet ele olok toho hiyag isaruk latisi.

²¹Hun inowen Allah ele hiyag isarukmu ap suwon Yoyakim, sehen seneg inap onowesi, alem seneg inap arimano menen hol harusareg ap suwon inowen Mikha ino ware fusuhuk ulug indimu wenggeltuk latisi. Waruhuk urukon oluk atisireg hun Uria ino akol tulug hirag-hirag o Mesir larisi.

²²Larisimu ap suwon Yoyakim inowen Uria yami rik lalihip ulug hun Akhbor amloho Elnatan ori winon men o Mesir mon eneptisimu

²³larusareg Uria o Mesiren hondoko ap suwon Yoyakim inggikmu imbik waharusa. Imbik waharusama Yoyakim inowen ware feselihipteg olma inap warehon sal eneptuk ambeg hik isalihip irisi ane hikit toho ware feserusa angge famen

²⁴an Yeremia ino hun Safan amloho Ahikam inowen ili og naptisireg wat tawag ulug Yehuda inap ininggikmu numbaharisi fug.