Read Angguruk Yali YEREMIA 27 Bible Online

YEREMIA 27 - Angguruk Yali bible

YEREMIA 27

¹Ap suwon Yosia amloho Zedekia o Yehuda inap onowe suwon ket laharisimu NINIKNI Allahn an Yeremia nubam ele uruk lit,

²”E paleg angginon hele fam ililoho handuhunmu embemihin!

³O Edom inap, Moab inap, Amon inap, Tirus inap, Sidon inap onowesiyen Yehuda inap onowe Zedekia ambeg o Yerusalem lalihip ulug mon eneptusa inap arimano hiyag isaruk lit,

⁴’Honowesi enembeg suhuloho lalihipteg hiyag isahubon tu: Israel ninap NINIKNI Allah pohol ha kinang ha senehon inowen hit hiyag hisaruk lit,

⁵’An ninggik ineyonen kinang men ap men wam pak mene men wal eneptik iyag. Wal eneptik iyag angge arimano Anden ap fano peruk lahiyon og um teg lahi.

⁶Ketiya Anden hit henengginang obog toho An namingmingangge o Babilonia inap onowe suwon Nebukadnezar og utuk lahi. Og utuk lit pak mene farema werehon oho at apma welamuhup ulug inggikmu emberuk lahi.

⁷Ap o pumbuk obog toho inggikmu emberuk lahiyon arimano Nebukadnezar men amloho men umbusag men enepma weregman eneg Babilonia inap arimano ap o pumbuk suwon winon onowesi ininggikmu amuhup.

⁸Babilonia inap onowe inowen e paleg angginon o pumbuk eke inap enenduhunmu emberukmu nit ha ruruk lamuhuk fug puhup halug Anden hun Nebukadnezar ino enembeg monde fuhukmu ap unusil larukmen eneg o pumbuk ino tog men suburu obok men ouk alem suwon menen mondabi eleg aruhu ulug An HINIKNI Allahn uruk lahi.

⁹Hit honori An nawene hiyag hisaruk inap nabi men, nei fulu roho waruk inap men, ap warehon enehime wol eneptukon men, pamongge unusuruk inap men enele holtuk lamuhup fug. Iren enele uruk lit, ’O Babilonia inap onowe suwon apma welamuhup fug,’ ulug hiyag hisaruk.

¹⁰Enele si ane hiyag hisaruk ane ari holtuk lamuhup halug Anden hit henengginangman yanggaloho pilili-palala hisahukmu mondabi siyag amuhup.

¹¹Ap o pumbuk san e paleg angginon nenenduhunmu ha ruruk lit Nebukadnezar apma welamuhuk puhup halug Anden ap arimano fet enesugmu inindi yuwag toho enengginangma wereg lit iniyabuk wit taruk lamuhup,’ ehek,’ imihin. An HINIKNI Allahn nele aru onowesi wal taneg hiyag isa lahuben hiyag isamihin,” ulug Allahn hiyag nitisi.

¹²Allahn hiyag nitisi ane ari hikit toho Yehuda ninap nonowe suwon Zedekia fam oho nele uruk lit, ”Hat humalikisi men honoluk welamuhuben e paleg angginon henenduhunmu ha reg lit Babilonia inap onowe Nebukadnezar apma welamuhup.

¹³Ap o pumbuk ekeyen Babilonia inap onowe apma welamuhuk fug puhup halug NINIKNI Allahn ap arimano fahet ele uruk lit tog men suburu obok men ouk alem suwon menen war amuhup irisi ane unubam aruhu rohon!

¹⁴Allah wene hiyag hisaruk inap nabiyen, ’O Babilonia inap onowe suwon apma welamuhup fug,’ ulug hiyag hisarukon fahet enele si ane uruk ulug holtuk lamuhup fug.

¹⁵NINIKNI Allahn ele uruk lit, ’Nabi arimano Anden mon enebuk fugmen Allah ele tu ulug enele si ane hiyag hisaruk. Hiyag hisaruk ane ari holuhup halug Anden hit henengginangman yanggal henebuhukmu hiret nabi enele si ane hiyag hisarukonet mondabi siyag amuhup,’ irisi,” ulug hiyag itikik.

¹⁶Hiyag itikikteg Allah olohotma unduhukon imam men Yehuda inap men anden hiyag isaruk lit, ”NINIKNI Allahn ele urukon tu holeg lamek: Hit honori nabi arimanowen enele uruk lit, ’Olohokangge NINIKNI Allah ibam foroho latuson hun Nebukadnezaren huhulangge hilalug o Babel larisiyon arimano folo-folo suhuloho walug wamuhup,’ ulug hiyag hisarukmu hiren tem toho hiyag nisaruk ulug holtuk lamuhup fug.

¹⁷Nabi arimano enele holuk fug angge Babilonia inap onowe suwon apma welamuhup halug eneg honoluk welamuhup. At apma welamuhup fug halug hun ariyen o aru olunap tik waruhu ane fahet fano peruk lahep ano?

¹⁸Nabi arimanowen enele si ane uk fug angge An HINIKNI Allahn hiyag isaruk lahi ane hikit toho hiyag hisaruk lalep halug iren An pohol ha kinang ha seneg lahiyon nubam sembahyang elebon tu, ’Nebukadnezar inowen olohokangge Hat hibam men ap suwon ibam men forohowon minggiroho winon huhulangge hilalug o Babilonia kinangma walug larisireg nin hebeloho waharuk lit olohokangge tot embeserisiyon hilalug lahu rohon let nenebik ma,’ ulug heng naplep.

¹⁹Nebukadnezaren hun Yoyakim amloho Yoyakhin o Yehuda inap fet enesuhon men Yehuda inap onowesi men Yerusalem inap onowesi obog toho men ininggik hele waroho og eneplug o Babilonia imbisik larisi sambil ino uwag piren An nibam werehon men, kou walu warehon humon unuk Ik Ahum men, kereta lisoho walug laruk angge arimano men olohokangge tot werehon men embeselug larisimu ketiya oho wereg angge famen

²¹An Israel hinap HINIKNI Allah pohol ha kinang ha seneg lahiyonen nele uruk lahiyon tu: Olohokangge tot forohowon arimano obog toho

²²ap seliyonen hilalug lahupteg amusun toho forohoman eneg Anden fano puhuk sambil horog aruhumu suhuloho walug waruhuk. An HINIKNI Allahn nele aru uruk lahi,’ irisi,” ulug hiyag isarikik.