Read Angguruk Yali YEREMIA 28 Bible Online

YEREMIA 28 - Angguruk Yali bible

YEREMIA 28

¹Ap suwon Zedekia Yehuda inap inikni unduhuk ferusa li mo uhan atisimu pikalem fuwabon fam ap wene hiyag isarukon o Gibeon ahun Azur amloho nabi Hananya inowen Allah ibamen hubu lahaptuk inap imam men ap anggolo welatuson onolohotman an Yeremia nubam ele uruk lit,

²”Israel ninap NINIKNI Allah pohol ha kinang ha senehon inowen ele urukon tu, ’Ap suwon o Babel inap inikniyen e paleg angginon henenduhunmu emberisiyon ino Anden kong toho hik isaruk lahi.

³Mo ilig am wirig am turukmen piren eneg lahumu olohokangge An nibam welatisiyon Nebukadnezaren huhulangge hilalug o Babel larisiyon arimano obog toho Anden suhuloho o aru imbik waruhuk.

⁴Yoyakim amloho ap suwon Yoyakhin Yehuda hinap hinikni ino men umalikisi ininggik hele waroho o Babel imbisik laruson arimano oho Anden suhuloho o aru hondog eneplug waruhuk. Yet homok, ap suwon o Babel werehonen e paleg angginon henenduhunmu emberisiyon ino kong toho hik isaruk lahi. An HINIKNI Allahn nele aru ihi,’ ” irisi.

⁵Irisimu an Yeremian imam inap men ap Allah ibam unduhuk latuson arimano obog toho onolohotma nabi Hananya ubam nele uruk lit,

⁶”Haren ehenon hikit toho NINIKNI Allahn tukag ulug heng turuk lahi. Amin! NINIKNI Allahn olohokangge ibam welatisiyon arimano men ap o Babel imbisik laruson obog toho suhuloho o aru hondog eneplug waharuk lit sali embehenon hikit toho telep fano.

⁷We anden iminon te hat men ap aruma werehon menen fano roho holiyek:

⁸Hat men an men elegma indam oho wene hiyag isaruk inap nabi arimanowen ap ununggul unuk anggolo men o pumbuk humon men unubam, ’Tog aptuk ane men alem angginon eke hag eke hag men ouk suwon oho hunubam aruhu,’ ulug hiyag isaruk latfag.

⁹Nabi misihen hinindi yuwag toho welamuhup ulug sali emberuk ane hikit toho teko laruk halug eneg we tem ap aru NINIKNI Allahn monde ferisimu hiyag nisarisi puhup,” ulug anden hiyag itikik.

¹⁰Hiyag itikikmu Hananya inowen e paleg angginon an Yeremia nanduhunmu enehangge hag toho ha reg latikikon ino warisireg kong toho hik isarisi.

¹¹Hik isarisireg Hananya inowen ap welatuson arimano obog toho onolohotman ele uruk lit, ”NINIKNI Allah ele urukon tu, ’Nebukadnezaren e paleg angginon ap unubam imbil larisiyon arimano ap o pumbuk obog toho enenduhunmuwen wahukteg kong toho hik isahuk,’ ehek,” ulug hiyag isarisimu an Yeremia wilip atug larikik.

¹²Hananya inowen e paleg angginon ino paloho hik isarisimu NINIKNI Allah ele nubam uruk lit,

¹³”Hananya ambeg lamihinteg NINIKNI Allah ele ti roho irisi ulug hiyag itmihinon tu, ’Haren e paleg angginon ari kong tebeserikinmu Anden e ubalma helep simbuk angginon hit hunubam umbuhuk.

¹⁴An Allah Israel hinap HINIKNI pohol ha kinang ha seneg lahiyonen nele uruk lahiyon tu: Helep simbuk angginon Anden ap o pumbuk obog toho enenduhunmu umbuhukmu ap suwon o Babel werehon Nebukadnezar apma wereg lit amingmingangge welamuhup. Mene wam farema werehon oho ngi reg lamag ulug at inggikmu umbuhuk,” ulug hiyag nitisimu

¹⁵anden Hananya fam uruk lit, ”Hananya nare, holeg lamin! NINIKNI Allahn hat mon haptisi fug angge famen ap arimano unubam hele si ane hiyag isaruk lahen ane fahet iren tem toho hiyag nisarisi peruk.

¹⁶Ari fahet NINIKNI Allahn hiyag hutuk lit, ’Anden kinang aru famen wilip aruhun ulug yanggal haptuk lahi. Allah ele sobir esemek ulug ap milal eneptuk latikinmu mo aru uwan la fugmu war arik lahun,’ ehek,” ulug komo yig itikik.

¹⁷Komo yig itikik ane ino hikit toho mo ino uwan la fugmu pikalem sabiron fam Hananya ino war atisi.