Read Angguruk Yali YEREMIA 29 Bible Online

YEREMIA 29 - Angguruk Yali bible

YEREMIA 29

¹Yehuda ninap nonowesi men Allah fahet hubu lahaptuk inap imam oho wene hiyag isaruk inap nabi oho ap obog toho Nebukadnezar inowen o Yerusalemen hondoko o Babilonia imbisik laruson unubahet an Yeremia o Yerusalem wereg lit suwesingga eke haharoho emberikik.

²Ap suwon Yoyakhin isinga men otsi oho kinang Yehuda seneg inap, Yerusalem inap onowesi oho, o wituk inap, besi laltuk inap arimano obog toho o Yerusalemen wilip atusa li an Yeremian suwesingga ino haharoho emberikikmu

³hun Safan amloho Elasa men Hilkia amloho Gemarya men ap suwon Yehuda ninap ninikni Zedekia inowen ap suwon Nebukadnezar ambeg mon eneptuson larikim ininggikmu emberikikmu o Babel walug larusa.

⁴Suwesingga ino fam haharoho emberikikon tu, ”Allah Israel ninap NINIKNI pohol ha kinang ha senehon inowen ap o Yerusalemen hininggik hele waroho o Babilonia hunumbahik laruson hunubam urukon tu,

⁵’O Babilonia inowen o wit tahupteg yabuk wiroho yabuhup angge arimano naruk lit hinindi yuwag toho welamuhup!

⁶Hiyap hilahupteg malik indag tahup! Hunumalikisi fahet oho unuhesi yami ruruk lamuhup, heneholani fahet oho enehunsi og isahup! Ap eleg angge welamuhup tohon anggolo amag ulug iren oho ap umalik hilani umalik indag enebil laruk lamuhup!

⁷O pumbuk hik hisarikik ambeg arimano wereg inap fano roho welamag ulug let eneptuk lamuhup! Ap o pumbuk arimano fahet An nubam sembahyang uruk lamuhup! It fano roho welamuhup halug eneg hir oho fano welamuhup.

⁸An pohol ha kinang ha seneg lahiyon Israel hinap HINIKNI inowen nele uruk lahiyon tu: Wene hiyag isaruk inap nabi men fulu ane turuk inap hit sehelimu werehon arimanowen henele yong henebuhup tohon iren nei waruk ane hiyag hisarukmu holuk fug!

⁹Anden it mon enebuk fugmen iren Allah ele tu ulug enele si ane hiyag hisaruk ulug An HINIKNI Allahn nele aru uruk lahi.

¹⁰Mo ilig am wirig am turukmen teng pirenman nubam hilag 70 aruhumu Babilonia inap inine roho werehon eleg aruhu halug Anden hit fahet wenggel hahukteg hiyag hisarikikon hikit toho suhuloho o Yerusalem hondog heneplug waruhuk.

¹¹Anden hit hunubam tuhuk peruk lahi ane An nindi nonghong uk fug angge welahi. Alem angginon hit hunubam am fug angge fano roho welamuhup ulug wenggeltuk lahimu fobik teko lahu ane fahet hinindi se roho welamuhup.

¹²Hiren let nenebin ulug An nubam heng nabik waharuk lamuhup halug Anden hit henele holtuk laruhuk.

¹³Hiren An yami nabik waharuk lamuhup halug hiyag naptuk lamuhup. Hinindi handuhal teg eleg angge hira nabuhupmu

¹⁴hit hinilmu inam aruhuk. Anden hit siyag toho welahep ane hebel isaruk lit o kema-kema hik-hak hisarikik ambehen andog henebuhukteg hininggik lisoho wilip heneptikik ambeg nin suhuloho hondog heneplug waruhuken uruk lahi,’ ehek.

¹⁵Hiren henele uruk lit, ’Nit o Babilonia weregma NINIKNI Allahn wene hiyag nisaruk inap nabi og nisarisi,’ uruk lahep angge famen iren enele si ane hiyag hisaruk.

¹⁶Hun Dauren ondohowonen ondohowon ap suwon o Yerusalem werehon ino men, honori Yerusalem inap o Babilonia hondog eneplug larusa fuhon obog toho fahet NINIKNI Allahn ele urukon tu, ’Anden tog men suburu obok men ouk alem suwon men it enesehelimu monde fuhukmu e sawe anggen mondabi filik tehen na fug tehon hag toho amuhup.

¹⁸Amuhupmu Anden unusimin ulug mug eneplug laruk lit o pumbuk kema-kema hik-hak isahuk. Hik-hak isahukmu ap kinangma werehon obog tohowen yet isahupteg enekolen yuk lagmag uruk lit wasubag sup isalug ininggaliyap eneptuk lamuhup. Ari roho turuk lamuhupmu ap ekeyen eke huluwap timin peruk halug o Yerusalem mondabi siyag atisi hag toho ar oho siyag amag uruk lamuhup.

¹⁹An namingmingangge nabi hundig-hundig enembeg mon eneptuk latikikon arimanowen nawene hiyag isaruk latusa angge famen holtuk latusa fug. Holtuk latusa fug ane ino fahet Anden alem angginon unubam umbuhuk ulug An HINIKNI Allahn nele uruk lahi.

²⁰Ari fahet hit o Yerusalemen hininggik lisoho o Babilonia og heneplug larikikonen An HINIKNI Allah nele holtuk lamuhup!’ uruk.

²¹Nit Israel ninap NINIKNI Allah pohol ha kinang ha senehon inowen hun Kolaya amloho Ahab men Maaseya amloho Zedekia men unubahet ele uruk lit, ’Iren Allah ele tu ulug enele si ane hiyag hisaruk. Anden it piren itano Nebukadnezar inggikmu umbuhukmu aren hit hiniline unusuhu.

²²Unusurukmu fobik hit Yehuda hinap o Babilonia kinangma hondog heneplug laruson ekeyen eke huluwap timin peruk laruhu halug ele uruk lit, ’Babilonia inap onowe suwon inowen hun Zedekia men Ahab men indokma wirag eneptisi hag toho NINIKNI Allahn hat hubam tuhu,’ ulug huluwap turuk laruhu.

²³It piren itanowen onori unuhesi pal taruk lit Anden nele hiyag isa fugmen Allah ele tu ulug Israel inap hiyag isaruk lit it sehelimuwen amben siyahon turuk latusa ane An nilen yet isarikikteg noluk teg lahi. An HINIKNI Allahn nele aru uruk lahi,’ ehek,” ulug suwesingga fam haharoho emberikik.

²⁴NINIKNI Allah pohol ha kinang ha senehon inowen o Nehelam ahun Semaya fahet an nubam ele hiyag nitisi.

²⁵Semaya inowen ap winonen hiyag um fugmu at unuk fam hun Maaseya amloho Zefanya Allah amingmingangge imam ino men ori imam winon obog toho men Yerusalem inap obog toho fahet suwesingga eke haharoho emberuk lit,

²⁶”Zefanya, nare, NINIKNI Allahn imam Yoyada ubalmangge imam welaruhun ulug hat lahap haptisi. Lahap haptisi angge re nenek turuk ahun eke Allah ibam waharuk lit nabi welahi ulug ap enele ying eneptuk halug ap ino senetug anggolopma hele waroho foroho ane hat hubam wereg.

²⁷Ari regma ketiya o Anatot ahun Yeremia inowen nabi welahi ulug hit hiniline winik-wonog angge ruruk angge famen nungge fahet senetuk lahen fug?

²⁸Hun ariyen nit o Babilonia welaheyon fahet suwesingga eke haharoho emberisiyon tu, ’Hit amusun toho o Babilonia welamuhup. Ari fahet o Babilonia inowen o wit tahupteg yabuk wiroho yabuhup angge arimano naruk lit hinindi yuwag toho welamuhup,’” ulug haharoho emberisi.

²⁹Suwesingga hun Semaya inowen haharoho emberisiyon ino imam Zefanya inowen kim halug hiyag nutukmu holtikik.

³⁰Holtikikmu NINIKNI Allahn an nubam ele uruk lit,

³¹”Ap eke monde feruk lit, ’Lamihinteg ap ininggik hele waroho o Babilonia imbisik laruson obog tohowen holukag ulug hiyag isahunon tu, ’NINIKNI Allahn o Nehelam ahun Semaya fahet kong toho emberisiyon tu holeg lamek! Anden hun ari monde ferikik fug angge famen aren Allah ele tu ulug ele si ane urukmu hiren tem toho uruk peruk lahep.

³²Aren NINIKNI Allah henembol yig utuk lamuhup ulug hiyag hisaruk latisi ane fahet Anden alem angginon ubam umbuhukmu aren ondohowonen ondohowon misig oho An numalikisi sehelimu wereg lit Anden it fanowap enebuhuk ane yet hahu fug. An HINIKNI Allahn nele aru uruk lahi,’ ulug hiyag isa lahuwen monde femihin,” irisi.