Read Angguruk Yali YEREMIA 3 Bible Online

YEREMIA 3 - Angguruk Yali bible

YEREMIA 3

¹NINIKNI Allahn Israel inap unubam ele uruk lit, ”Ap ekeyen uhe umbusuhumu lahureg ap winon hilahu angge famen ap tamon inowen hiyap ino nin hila hag teg laruhu ano? Hebeloho hilaruk lit kinang obog toho siyahap tuhu rohon! Hat yaying turuk lit ap hindimuwen narukon anggolo men laruk latikin angge re nungge fahet Allah ambeg hebeloho lamin peruk lahen?

²Punu ke walinggoho werehon arima yet himin! Punu eke famen eke famen ap anggolo men ambi atuk latikin. Ap ke norukon ekeyen aben angge huhulangge hilamin ulug kema kahaleg hag toho har oho kalemma heriyeg lit ap men ambi amul ulug kahal enesug latikin. Ari roho hat yaying turuk lit holok ane eneg turuk latikinonen kinang obog toho siyahap tirikin.

³Ari fahet suburu ei uwan yabuk fugmu osit narisi fug. Yahoma oho wambik waharisi fug angge famen hat yaying turuk hiyap indi arikon hag toho wereg lit hinggali eleg toho welatikin.

⁴Ketiya eneg haren An nubam hele uruk lit, ’Niyon, an nebe totma Haren hindi nasugmen eneg welatikin.

⁵Haren an fahet holok harukmen eneg welaruhun fug,’ uruk lahen angge famen siyag ane til-wil noruk lahen,” irisi.

⁶Ap suwon Yosia inowen Yehuda inap fet enesug latisi li NINIKNI Allahn an nubam ele uruk lit, ”He Israel An numbahalug larisiyon inowen turukmu yet harikin ano? O kema-kema tom yaron fam lahalug e alma sakoman yaying turuk.

⁷Yaying turukmu yet harikikteg An nindimuwen wenggel haruk lit, ’Amusun toho yaying turukmen eneg indi yuwag aruhumu An nambeg hebeloho waruhu,’ perikik angge famen hebeloho waharisi fug. Ari roho turukmu erek Yehuda An nele ying naptukon inowen yet haruk latisi.

⁸He Israel inowen An numbahalug yaying turuken umbusuhuk perikikteg Anden suwesingga fam, ’Hiyap tu imbisihi,’ ulug haharoho hiyap ino og utuk lit embeserikik. Embeserikik ane ari oho Yehuda inowen yet harisi angge famen akol ha fug anggeyen anden oho ari hag toho timin ulug yaying turuk ane ak tirisi.

⁹Ak tirisireg helep men e men wel turuk lit yaying til eneg noruk latisi. Indimu ahiyehen yaying turuk lit kinang obog toho siyahap tirisi.

¹⁰Ari obog toho turukmu erek Yehuda An nele ying naptukon inowen yet harisireg indimu amu ane wenggel haruk anggeyen ambilik fam eneg Allah ambeg hebeloho waruhuk irisi,” ulug NINIKNI Allahn hiyag nitisi.

¹¹Hiyag nitisireg NINIKNI Allahn an nubam nin eke ele uruk lit, ”He Yehuda An nele ying naptukon inowen siyag ane hum toho turuk ane men he Israel An numbahalug siyag ane turuk latisiyon men wirim teg eleg.

¹²Ari fahet lamihinteg ik eleruk fil hele hi roho imihinon tu, ’He Israel Allah embeselug larikinonen NINIKNI Allahn ele urukon tu holeg lamin: An nambeg hebeloho waruhun! An ap nindi enesug lahiyonen hat fahet nolok harukmen eneg welam fug teg lahi. An norohole olok toho yet hiyaruk latikik ane embeselug hebeloho nindi hiyaruk laruhuk.

¹³Siyag ane tirikik ulug hindi anggat toho welamin! Haren An HIKNI Allah hambol yig nutuk lit ap winonen nunumbasi ulug wel eneptuk angge onombolim laruk lit la wam turuk latikin. O kema-kema e alma sakoman it men yaying turuk lit An nele holtuk latikin fug,” ulug NINIKNI Allahn ele irisi.

¹⁴NINIKNI Allahn ele uruk lit, ”Numalikisi An numbahalug larikibon, An hit Hinikni welahireg nambeg hebeloho wamuhup! Anden hit o kema-kema welahebon men hununggul unuk wal-wal welahebon men henesehelimuwon ap misig ano piren ano hondog heneplug tom Sion fam waruhuk.

¹⁵Waruhukteg An nambohom fano roho fet enesug lamuhup ulug Anden ap tu fano puhukon in enebuhukmu inindi anggat teg lit hit fano roho fet henesug lamuhup.

¹⁶Fet henesugmu henebe anggolo amuhupteg hit henengginang atogman atogma hondo reg lamuhup halug. Hondo reg lit aben peti elma Wene Numen haharehon kilabeg angge fahet henele uruk lamuhup fug. Ap misihen oho peti ino kema wereg ulug yami ruruk lit peti keron eke witmin puhu fug ulug An HINIKNI Allahn nele uruk lahi.

¹⁷O itano li o Yerusalem unuk keron ”NINIKNI Allah Heriyeg Ambeg” suwaleg lamuhup. Suwaleg lamuhupmu NINIKNI Allah unuk palimuwap tul ulug ap o pumbuk obog toho o Yerusalem palu arik waharuk lamuhup. Waharukmu inindi arik teg lit siyag ane turukon eleg aruhu.

¹⁸Eleg aruhumu Yehuda inap arimano Israel inap men ambiyeg kinang ik elerukmu werehon ino famen wilip amuhupteg kinang Anden unumbasi ngi reg lamuhup ulug og isiyahon fam wamuhup.

¹⁹Indam An nindimuwen wenggel haruk lit, ’Anden hit numalikisiyap henebuhukteg kinang mondabi fanowon o winama angginang men wirim teg elehon eke og hisahuk. Og hisahukmu hiren An nubam, ’Niyon,’ uruk lit nin hebeloho henembol yig numuhup fug,’ perikik angge famen

²⁰hiyap eke ap indi rehon embeselug laruk hag toho hit Israel hinaben oho An numbahalug larikipmu An HINIKNI Allahn nele uruk lahi.

²¹Holiyek! Israel inap arimano INIKNI Allah enepeleg atusareg inindi nonghong uruken punu ke la wam turuk lit san let nenebik watmisi ulug ya nga uruk.

²²Ya nga urukmu hol isihireg, ’Numalikisi An numbahalug larikibon, An nambeg hebeloho watihip. Anden hihit henepminmu hiren nin eke An numbahakup fug,’ uruk lahi. Ari urukmu iren enele uruk lit, ’Hat nit NINIKNI Allah welahenma wamul.

²³Punumuwen usangge arimano wel eneptuk lit nenehiyehen ngik-ngog turuk latukukon ino saplangge uruk latukuk. Nit Israel ninap windat neneptukon we Hat NINIKNI Allah eneg welahen.

²⁴Indam nunumbasiyen lisag toho yabuk turukmu ininggikmu atuk latfag angge obog toho usangge nininggaliyap neneptukon inowen narukmen eneg ketiya oho nit nenembohom sapi men domba men nunumalikisi ap anggeyet hiyap anggeyet obog toho elehap eneptuk latisi.

²⁵Amben siyahon turuk latukuk aneyen hondo nenesugmu nininggaliyen kinangma yinggig lahe. Nit nunumbasiyen hat NINIKNI Allah hele ying haptukmen eneg welatfag hag toho ketiya oho niren Hat hele holuk fug angge holohotman siyag ane eneg turuk latukuk,’ uruk.