Read Angguruk Yali YEREMIA 30 Bible Online

YEREMIA 30 - Angguruk Yali bible

YEREMIA 30

¹NINIKNI Allahn an Yeremia nubam ele uruk lit,

²”Israel hinap HINIKNI Allahn nele iminon tu holeg lamin: Anden hat hiyag hutuk latikik ane obog toho suwesingga fam haharoho embemihin.

³An numalikisi Israel inap men Yehuda inap men hebeloho fanowap enebuhuk li horog aruhumu Anden suhuloho kinang unumbasi og isarik iyahon fam hondog eneplug waruhukmu yug toho welamuhup. An HINIKNI Allahn nele aru uruk lahi,” ulug hiyag nitisi.

⁴Hiyag nitisireg NINIKNI Allahn Israel inap men Yehuda inap men unubahet ele uruk lit,

⁵”An nele iminon tu holeg lamek! Aben ninindi yuwag toho welamuhuk perukmen alem angginon unubam atuken enele ya nga urukmu holeg lahi.

⁶Nungge fahet ap obog toho onorohole hilik teg lit hiyap malik indag tarukon hag toho ininggiken enehum senegma yet isaruk lahi? Ap anggeyen malik indag taruk lit enele uruk ano ulug hinilen kim isalug honoluk atmisiyen aliyek!

⁷Ap asengseng toho welamuhup sambil horog tehen henekolen yuk lagmag uruk lamek! O ino sambil teko lahu ane men wina sambil turuk ane men wirim teg elehen hun Yakuben ondohowonen ondohowon arimano enemelmel toho welamuhup angge famen Anden windat enebuhuk.

⁸An HINIKNI Allah pohol ha kinang ha seneg lahiyonen nele uruk lahiyon tu: O ino sambil Anden e paleg angginon enenduhunmu ha unubaharuson fala roho hik isahukteg hele ininggik pug tehon lol enebuhukmu ap o winamonen enemingminganggeyap eneptuk ane eleg aruhu.

⁹Eleg aruhumu it arimano An INIKNI Allah men Daud umba Anden ap suwon lahabuhukon men nenemingmingangge welamuhup.

¹⁰Hit Yakuben ondohowonen ondohowon welahebon henekolen yuk la fug! An HINIKNI Allahn nele aru uruk lahi. Anden hit hunumalikisi men hininggik lisoho o yatma hondog heneplug larusa ambehen hininggik hele loloho wilip henebuhukteg henengginangma suhuloho waruhukmu ap misihen oho siyahap henebuk fug angge weregman eneg hinindi yuwag toho welamuhup.

¹¹Hit hik-hak hisarikik ambehen An hit men wereg lit windat henebuhukteg it mingming heneptuk inap arimano obog toho elehap enebuhuk. Hit eneg elehap henebuk fug angge siyag ane hiren turuk lahebon wirim toho unggum angginon hunubam umbuhuk,” irisi.

¹²NINIKNI Allahn o Yerusalem inap unubam ele uruk lit, ”Yowilangge hunubam werehen ouk warukmen eneg welamuhup.

¹³Hit hihit heneptukon misig oho wereg eleg. Yowil ahambut wa fug angge weregman eneg fano amuhup fug.

¹⁴Ap hit inindi henesug latuson arimano obog tohowen enepeleg atisimu hit fahet wenggel haruk eleg. Hiren siyag ane anggolo turuk latikibon fahet Anden hit nindi henesug lam fug angge ap seliyonen ap unusuruk hag toho hunusirikik.

¹⁵Yowil angge nunubam werehon ahambut waruk eleg ulug henele ya nga uk fug! Hiren siyag ane hum toho turuk latikibon fahet Anden ari obog toho hunubam tirikik angge famen

¹⁶olomeneyen pak mag-mag naruk hag toho hit hum heheg hinaruk latusa inap arimano obog toho aben nahup. Ap seliyon hit siyahap heneptuson obog toho ininggik lisoho og eneplug lahup. Henenggengge huhulangge hilarusa inap arimano obog toho Anden ap ininggikmu umbuhukmu mun angge man angge iren tohon aben hilahup.

¹⁷Aben hit hinibam Yerusalem fahet abug uruk lit, ’IKNI Allahn irimen embeserisimu ap misihen oho wenggel haruk eleg,’ uruk angge famen Anden yowil hit hunubam werehon tag angge heneptuk lit hihit henebuhuk ulug An HINIKNI Allahn uruk lahi.

¹⁸Yakuben ondohowonen ondohowon arimano Anden hebeloho nindi isahukmu o Yerusalem halog toho lin isarusa ambeg hebeloho wiri feruk lit ap suwon ibam oho nin fanowap tuhup ulug An HINIKNI Allahn uruk lahi.

¹⁹An numalikisi enebe anggolowap enebuhukmu nin hebeloho tor amuhup fug. Anden palimuwap enebuhukmu aben nin hebeloho ininggaliyap enebuhup fug. An numalikisiyen nin hebeloho enehiyeg haruk lit An wel naptuk asini yunggultuk lamuhup.

²⁰It apmayap eneptuk inap obog toho Anden alem angginon unubam umbuhukmu An numalikisi arimano iniknisi tam fano welatfag hag toho welamuhup. Anden fet enesugmu inindi yuwag toho welamuhup.

²¹An numalikisi sehelimuwen it fet enesuhon eke in aruhureg ine roho sen enesug laruhu. Anden at ino wol turukmu akol eleg toho An nolohotma waharuk laruhu. Ap sa Anden wol tuk fugmen An nolohotma walep halug war alep ulug An HINIKNI Allahn nele uruk lahi.

²²Hit An numalikisi weregma An hit Hinikni aruhuk,” uruk.

²³Yet teg lamok: Allah indimu ahe laharukon ino siyelu humon hag toho wilip atuk! Mase ril waharuk lit ap Allah wene fahet ninirim peruk inap arimano fuk-fak isaruk lit ilkal isahu.

²⁴Allah indimu tuhuk perisiyon obog toho mondabi tibihi puhureg eneg olok perukon eleg aruhu. Fobik obog arik ohoma alem tu fahet ulug hinindi anggar aruhu.