Read Angguruk Yali YEREMIA 31 Bible Online

YEREMIA 31 - Angguruk Yali bible

YEREMIA 31

¹NINIKNI Allah ele urukon tu, ”Obog aruhu li Israel inap ununggul unuk obog toho Inikni An aruhukmu it An numalikisi amuhup.

²Indam Israel inap arimano tog elman unuselep angge famen Anden nindiyen ulug ili og eneptuk lit lekman hondog eneptik iyag. Iren kel taruk ambeg yami ril larukmen

³An yatman waharuk lit it onolohotman inam arik waharik iyag. Israel hinap nori, Anden indamen tulug ketiya oho hit fahet nindi henesug lahireg nindiyen ulug let heneptuk lit eneg welaruhuk.

⁴Anden hit Israel hinap suhuloho unduhuk hunubahakukmu henemu in amuhup. Hiren heneliliyangge lahaboho waruk tel til laruk lit nin suhuloho henehiyeg toho tei alem wiliptuk inap inim kelem sini yunggultuk lamuhup.

⁵Nin hebeloho tom o Samaria werehon fene yabuk wit tahupteg hininggarehen anggen paloho hilaruk lamuhup.

⁶Fobik welamuhup li hit honolohotma unduhuk inaben tom Efraim famen enele ine roho uruk lit, ’Nori, o Sion NINIKNI Allah wereg ambeg lahulen maniyek!’ ulug wol heneptuk lamuhup.

⁷Henehiyehen Yakub umalikisi fahet kelem sini yunggultuk lit o pumbuk obog toho palimu werehon arimano enebene suleng uruk lamuhup! Allahn umalikisi Israel inap longgo urusama we tot werehon itano fanowap eneptisi ulug wel turuk lit ap hiyag isaruk lamuhup!

⁸Anden numalikisi arimano kinang atogman wol enebuhukteg ik eleruk filen hondog eneplug waruhuk. It arimano sehelimuwon il hupnihon, unuyug siyahon men hiyap malik fet taluhon, ket indag tarukon inim enebe su roho o aru suhuloho wamuhup.

⁹It uba yatil waharukmu Anden enehiyehap eneptuk lit hondog eneplug waruhuk. Anden ik eleruk hiyag isil waharuk lit kalem fano halegma salog malog angge unusuk fug toho hondog eneplug waruhuk. Israel inap Inikni An weregma hit Efraim hinap numalikisi wandabon hag toho welahep.

¹⁰Hit o pumbuk obog tohowen An HINIKNI Allah nele iminon hol halihipteg ik ayeg ke yatma werehon arimanowen oho holukag ulug hiyag isa lahubon tu, ’Allahn umalikisi hik-hak isarisi angge famen suhuloho palu enebuhureg wam domba inikniyen foroho hag toho fet enesug laruhu.’

¹¹Anden Yakub umalikisi windat eneptuk lit ap mondabi inine werehon ininggikmuwen teloho wilip enebuhuk.

¹²Tom Sion fam lahul ulug enehiyehen lem-lem angge ril waharuk lit Allahn fanowap neneptisi ulug onorohole seleg toho wamuhup. Anden roti anggen men hele anggur anggen men sak tirik men wam sapi domba oho og isarukmu it wereg ane ik elerukmu e inggila yum-yam uruk ambeg hag toho wereg lit fobik oho siyag toho welamuhup fug.

¹³Ari roho tuhu sambil hiyap tuhumon arimanowen enewonog toho si roho yunggultukmu ap sabalonet kabiniyonet enehiyeg toho welamuhup. Iren uba yatukon eleg amag ulug Anden hebel isahukmu inindi se roho welamuhup. Iren fong watuk latusa angge famen Anden inindi yuwahap turuk lit onggon enebuhuk.

¹⁴An nolohotma unduhuk inap imam arimano Anden sebe roho og isarukmu enehum ouk toho naruk lamuhup. An numalikisi unubam fano ane anggolo tuhukmu inindi yuwag aruhu,” irisi.

¹⁵ NINIKNI Allahn ele uruk lit, ”O Rama piya sini uruk lit uba lil-lil toho yatukon holeg lamok! He Rahel inowen umalikisi indiyen uba anggolo yatukmu hindi yuwag toho welamin ulug hiyag utuk angge famen numalikisi mondabi longgo ehesa ulug uba embeseruk eleg.

¹⁶Henele uba yatuk lahebon embeselihipteg uba yatukmen hinil filik atisiyon sum atlihip! Hunumalikisi fet enesug lit sat haruk latikibon fahet onggo hilahubon wep toho wereg. Hunumalikisi ap seliyon wereg ambehen suhuloho hinibam wamuhup.

¹⁷Fobik teko lahu ane fahet hinindi anggin toho welamuhup fug, hit hunumalikisi inibam yugmu hebeloho wamuhup.

¹⁸Anden hol harukmen Israel inap inindi angginen hunu sini uruk lit, ’Allah, nit wam il wareg elehon hag toho welatukukmu fano nunusirikin. Hat Allah NINIKNI wereg lit hondog nenebuhunmu hambeg suhuloho wamuhuk.

¹⁹Nit nenembol yig hutuk latukukon fahet nenembiken peruk lahe. Siyag ane turuk latukuk ane fahet wenggeltuk lit ninindi wat taruk lahe. Niren kabinimu siyag ane turuk latukukon sing angge hag toho nunubam tag tehen nininggali roho welahe,’ urukmu

²⁰An Allahn nele uruk lahiyon tu: Israel hinap An numalikisi nindi henesug lahiyon welahepma nindi pulmu welahep. Anden hundig-hundig pet heneptuk lahi angge famen[2] nin nindiyen ulug wenggel hisaruk lahi. Hit fahet nindi narukmu welahireg nindi hisaruk laruhuk.

²¹Israel hinap nori, funggalem laruk lit nonghong uhup tohon ke handuhalma enehangge hutuk tubuhup! Kalem hareyon lahep ha nowen siye angge emberuk lamuhup! Kalem suwon waharikip ke fuki roho yet halug laruk lit hinibam yugmu aruma suhuloho wamuhup!

²²Israel hinap, An nele holtuk lahep fuhon, hup noenam wereg lit lul ano pok amul ano ulug hinindi piren-paren uruk lit welamuhup? O aru fam An Allahn alem aben yet harusa fuhon wal turuk lahi. Hit Israel hinap hiyap hag toho wereg lit An Allah fahet nahun ulug mako pug naptuk lamuhup,” ulug Allahn ele irisi.

²³Allah pohol ha kinang ha senehon Israel ninap NINIKNI inowen ele urukon tu, ”Indam aben enele uruk latfag ane iminon tu, ’Tom fanowon o Yerusalem werehon Allahn ili og neneptukon wereg ambeg At inggarehen foroho lamag!’ uruk latfag ane ari eleg latfag angge famen fobik Anden Israel inap hebeloho fanowap enebuhukmu o Yehuda pumbuk suwon toron fam wereg inap arimanowen uruk latfag ane ari nin uruk lamuhup.

²⁴Ap yabuk wituk inap men wam endetuk lit anggen ke werehon men o Yehuda inap obog toho tom Sion walinggoho welamuhup.

²⁵Ap inine elehon Anden inineyap eneptuk lit inindi siyag toho werehon oho enehiyehap eneptuk laruhuk.

²⁶Ari roho tuhuk li aben likiya in atug enele uruk lit, ’Fano nohokireg nubam se roho in ahi,’ uruk lamuhup.

²⁷An HINIKNI Allahn nele uruk lahiyon tu: Fobik welamuhup li Anden kinang Yehuda men Israel men abet wamet anggolowap tuhukmu keleg toho welamuhup.

²⁸Anden atam siyahon it unubam welatisiyon heneko hik isaruk lit siyahap eneptuk laruhuk ulug yet enesug latikik angge famen fobik unumanggen yag enebuhukteg suwap eneptuk laruhuk ulug yet enesug laruhuk.

²⁹Ari tuhuk li aben enele uruk ane, ’Iniknisiyen e anggen oluk narukmu unumalikisi eneyeg altowen homhombuk turuk lamuhup,’ uruk ane ari uruk lamuhup fug angge famen

³⁰ap san siyag ane turukon ariyen inggareg war aruhu. Ap san e anggen oluk nahu halug inggareg ayeg altowen homhombuk turuk laruhu.

³¹ An HINIKNI Allahn ari roho uruk lahi: Fobik welamuhup li Anden Israel inap men Yehuda inap men unubam let heneptuk laruhuk ulug sali keron umbuhuk.

³²Anden Israel inap unumbusagsi ininggik lisoho o Mesiren wilip eneptik iyag li An hit Hinikni welaruhuk ulug unubam sali imbiyag angge famen sali imbiyahon ino iren pisan isaruk latfag. Ari fahet Anden sali imbiyahon ino hag toho nin umbuk fug angge

³³Israel inap unubam sali keron umbuhukon tu: Anden ari-ari turuk lamuhup ulug komo eneptuk lahi ane unundama emberuk lit inindi fam hahare fuhuk. An it Inikni aruhukmu it An numalikisi welamuhup.

³⁴Ap misihen oho ori unubam Allah honoluk toho welamuhup ulug hiyag isaruk lamuhup fug. Ap suwon toron obog toho ininggarehen Anden peruk lahi ane onoluk aruhu. Iren siyag ane turukon elehap turuk lit hare ane turukon nambolmayap tebeseruk laruhuk,” irisi.

³⁵NINIKNI Allahn o unukoho kinangma seleg teg lamag ulug mo og nisaruk lit hubanggo yatukon fahet pikalem men suhal men imbibareg ik fu laruk lit aplohok tung turuk lamag ulug monde fik waharuk ahun unuk te Allah pohol ha kinang ha senehon suwaleg.

³⁶Aren ele uruk lit, ”Anden emberikikon mo pikalem laruk ane eleg alep halug eneg Israel inaben ondohowon An numalikisi amusun toho welamuhup ane eleg alep.

³⁷Sing pohol emberim fil werehon men helep tuwaliyen kinang ahongge apma fil werehon men wirim helep halug eneg Anden oho Israel inaben siyag ane anggolo turukon fahet embesele,” irisi.

³⁸NINIKNI Allah nin eke ele urukon tu, ”Fobik welamuhup li o Yerusalem Anden ngi reg laruhuken suhuloho wituk lit o yaron unuk Hananeel filen hili yat toho imbil elehet kurukon sok unuk Ambiyang fam hutuk tebelug

³⁹pikit laruk lit tom Gareb feneyen tulug o Goa imbik lahup.

⁴⁰Tonggo filik angge hik isaruk ke ap warehon sal eneptuk ambeg ino men ik Kidron ayegma angginang ino famen tulug sok unuk Kuda ino yali fil werehon obog toho arimano An Allahn ngi aruhukmu o Yerusalem ino aben harep pisako pin kuruk lit siyahap tuk fug angge mondabi welaruhu,” ulug Allahn sali emberisi.