Read Angguruk Yali YEREMIA 32 Bible Online

YEREMIA 32 - Angguruk Yali bible

YEREMIA 32

¹Hun Nebukadnezar ino Babilonia inap onowe suwon lahibag sambilen mo ilig am wirig am turukmen num fimag atisimu hun Zedekia ino Yehuda inap onowe suwon lahibag sambilen mo numenam larisimu NINIKNI Allahn an Yeremia nubam ele hiyag nitisi.

²O itano li Babilonia inap arimanowen o Yerusalem pin kuhuk ulug walinggig lit weregma Yehuda inap onowe suwon ibam owahalma an ninggik hele waroho fet nasug latusa.

³Hun Zedekia inowen an ninggik hele waroho fet hasug latmin ulug hiyag nutuk lit, ”Nungge fahet haren, ’NINIKNI Allahn ele urukon tu: Anden o aru Babilonia inap onowe suwon inggikmu umbuhukmu pin halog toho kuhu.

⁴Kuhumu ap suwon Zedekia inowen Babilonia inap enepma aruhuk fug peruk angge famen Babilonia inap onowe inggikmu aruhureg onorohole misigmu atuk lit enele uhup.

⁵Hun inowen Zedekia ino hondoholug o Babilonia kinangma lahumu amusun toho weregman eneg war aruhu ulug An HINIKNI Allahn uruk lahi. Ari fahet Babilonia inap men tog abuhup fug. Palimu amuhup fug,’ ulug nungge fahet hat Yeremian ari roho irikin?” ulug hiyag nitisireg at ibam owahalma ninggik hele waroho fet nasug latisi.

⁶Fet nasug lit weregma NINIKNI Allahn an nubam ele uruk lit,

⁷”Hat hami Salum amloho Hanameel hambeg waruhureg hat hubam, ’Paleg angge an nubam werehen an nangginang o Anatot werehon ino ayeg waroho ap eke og uruhuk peruk lahi angge famen kinang ino ap winon inggikmu aruhu rohon ulug Allahn imbibag ane hikit toho hat an namlohowen hilahun ulug wenggel haruk lahi,’ ulug hiyag hirik waruhu,” irisi.

⁸Irisi ane ino hikit toho nami Hanameel ino an ap suwon ibam owahalma weregma waharisireg hiyag nutuk lit, ”An nangginang Benyamin kinangma o Anatot werehon ino ayeg waroho ap eke og uruhuk peruk lahi. Kinang ino hilawon we hat eneg welahen angge re hat namlohowen hilahun,” ulug hiyag nitisi. Ari ulug hiyag nutukmu NINIKNI Allahn perisi ane hikit toho hiyag nerehek ulug noluk atisi.

⁹Noluk atisimu anden kinang ino ayeg waroho hilamin ulug Hanameel uang anggen ili ruruk angge perak fam wirihon nanggolop fiman og itikik.

¹⁰Ap iniline og itmin ulug ap wol eneptikikteg it onolohotman kinang ino hilamin ulug suwesingga fam haharoho embelug tem toho imbihi ulug enehangge emberikik. Emberikikteg uang perak ino anggin emberuk angge fam embelug winag harikikteg Hanameel og itikik.

¹¹Og itikikteg kinang ino og nerehek ahun men hilihi nahun menen tu men ari men turuk lamuhuk ulug suwesingga fam haharoho emberikikon ino men, hahatikik ane ino wirim toho suwesingga eke haharoho emberikikon men

¹²Hanameel iline hun Mahseya amloho Neria inowen endetfahon Barukh og itikik. Ap anggolo iniline og itmin ulug wol eneptikik inap suwesingga ino fam ininggik tum emberuson arimano men, Yehuda inap ap suwon ibam owahalma luhaloho welatuson men onolohotman og itikik.

¹³Og itikikteg anden ap arimano obog toho enelukeman Barukh hiyag utuk lit,

¹⁴”Israel ninap NINIKNI Allah pohol ha kinang ha senehon inowen ele urukon tu holeg lamin: Suwesingga piren ariya wamihinteg siyag am fug angge welaruhuwen kubag kinang huluwon fam wirihon elma kilapmihin.

¹⁵Hit Israel hinap HINIKNI Allah pohol ha kinang ha seneg lahiyonen nele uruk lahiyon tu, ’Fobik ap kinang tu fam werehonen nin hebeloho o men suburu yabuk men anggur yabuk men ayeg waroho hilaruk lamuhup,’” ulug hiyag itikik.

¹⁶Ari ulug Barukh hiyag utuk lit suwesingga piren itano og itikikteg anden NINIKNI Allah ubam sembahyang uruk lit,

¹⁷”Allah NIKNI suwon, Hat hinggik ineyonen pohol ha kinang ha wal tinag. Mun ane man ane aben tuk fug tohon Haren tuk hag teg lit welahen.

¹⁸Haren ap teng obog sehelet obog hindi enesugmen eneg welahen angge famen aben siyag ane turuk halug iret unumalikisiyet alem angginon unubam emberuk lahen. Hat eneg hebe suwon hine reg lit hunuk NINIKNI Allah pohol ha kinang ha senehon suwaleg lahen.

¹⁹Haren alem obog toho holuk teg lit hinggik ineyonen su ane turuk lahen. Hat hilen mun ane man ane aben turukon kim isaruk lit iren turuk ane hikit toho ayeg wat isaruk lahen.

²⁰Haren o Mesir kinang famen enehangge eke hag eke hag wal haruk lit aben tuk fug tohon turuk latnag hag toho ketiya oho nit Israel ninap men ap o pumbuk winon men nunubam turuk lahenma Hat hunuk o kema-kema su atisi.

²¹Haren enehangge aben tuk fug tohon anggolo wal harukmu ap seliyonen yet hiyaruk lit enekol anggolo harikim Hat hinggik ineyonen humalikisi Israel inap arimano o Mesir kinang famen hondog eneplug wilip atik inag.

²²Wilip atik inareg Haren it unumbasi kinang ag owe men kin ahaluwe men eleg am fug angge mondabi anggolo wereg ambeg og hisahuk ulug sali imbinag ane hikit toho kinang welahe ambeg tu og isinag.

²³Og isinag angginang ino fam Israel inap arimano ilmig toho kibareg yug toho welatfag angge famen Hat hele sobir isaruk lit Haren tu men ari men turuk lamuhup ulug komo eneptik inag ane hikit toho turuk latfag fug. Ari fahet Haren alem angginon aruma obog toho unubam monde feruk latikin.

²⁴Monde feruk latikinmu Babilonia inap waharusareg elehet o aru huk toho ohowon walinggoho kinang fam hop til lahalug pin kul ulug turuk. Pin kuhup halug nit Yerusalem ninap aruma tog men suburu obok men ouk alem suwon menen war amuhukmu o pumbuk aru Babilonia inap ininggikmu aruhu. Ari obog toho Haren tam irikin ane hikit toho teko larukmu hilen yet haruk lahen.

²⁵NIKNI suwon Allah, Haren te, ’Ap wol enepmihinteg it iniline kinang eke ayeg waroho hilamihin,’ ulug hiyag nerehen angge famen o aru Babilonia inap ininggikmu arik oho reg!” ulug sembahyang irikik.

²⁶Irikikmu NINIKNI Allahn an Yeremia nubam ele uruk lit,

²⁷”Mun angge man angge lebe rurukon INIKNI Allah An welahireg Anden tuk fug teg ane eke wereg peruk lahen ano?

²⁸An HIKNI Allahn nele iminon tu holeg lamin: We tem toho o Yerusalem aru Nebukadnezar men umalikisi Babilonia inap men ininggikmu emberuk lahi.

²⁹Emberuk lahireg Babilonia inap arimano o aru pin halog toho kuhupteg harep pisako oluna fusuhup. Yerusalem inaben An nindi siyahap tul ulug o unggaman Baal fahet hubu lahaptuk lit nunumbasi ulug wel eneptuk angge winon fahet ik hilili feruk latusa ambeg arimano oho siyahap tuhup.

³⁰Indamen tulug ketiya oho Israel inap men Yehuda inap menen Anden siyag peruk lahi ane eneg turuk lit nele ying naptuk ulug An HINIKNI Allahn nele uruk lahi.

³¹O aru wiri fibag sambilen tulug ketiya oho Yerusalem inaben An nele ying naptukmen eneg weregma nundama ahe laharukmu nolok haruk lit An nolohotman hik isahuk ulug wenggel haruk lahi.

³²Israel inap men Yehuda inap men onowesi suwon men ap suwon let eneptukon men An namingmingangge imam men nabi men Yerusalem inap obog tohowen onolok ane eneg turuk lit An nindi siyahap naptusa.

³³It eneluke yig num fug angge An enembolmayap naptuk latusa. Anden it unubam nele irikik warikikmu iren holuk fug angge ambi ane eneg til-wil laruk latusa.

³⁴Iren filik angge amben siyahon fahet ninikni ulug o An nunuk fam wirig ibamen unduhuk feruk lit nibam siyahap turuk.

³⁵Tonggo Hinom ino famen unumba Baal fahet helep sengget watil laharusareg tu Allah hag toho wereg ulug wel eneptukon Molokh fahet unumalikisi ap angge men hiyap angge men waroho indokma yal eneptuk. An nindimuwen peruk eleg ane hiyag isa fugmen it ininggarehen peruk ane hikit toho ininggali ane ari turukmu Yehuda inap obog toho it onombolim laruk lit An numbahalug siyag ane eneg turuk.

³⁶Ari roho turukmu hiren henele uruk lit, ’Nit Yerusalem ninap aruma tog men suburu obok men ouk alem suwon menen war amuhukmu o pumbuk aru Babilonia inap ininggikmu aruhu,’ uruk lahep angge famen An hit Israel hinap HINIKNIYEN hinibam pumbuk aru fahet nele uruk lahiyon tu:

³⁷An nundama ahe laharukmu nolok anggolo haruk lit o Yerusalem inap o kema-kema hik-hak isahukon arimano andog enebuhukteg hondog eneplug suhuloho o tu waruhukmu inindi yuwag toho welamuhup.

³⁸An Inikni Allah welaruhukmu it An numalikisi welamuhup.

³⁹Likiya hupmu An nubahet eneg enekol toho welamuhuben inindi misig toho wenggel haruk ane og isahuk. Og isahukmu it men iren ondohowonen endebuhubon men fano welamuhup.

⁴⁰Anden nambol yig isa fug angge fano ane eneg unubam turuk laruhuk ulug sali pisan tuk fug tehon umbuhuk. An nubahet enekol haruk ane inindimu umbuhukmu fobik hebeloho An numbahalug laruk lamuhup fug.

⁴¹An numalikisi arimano mondabi kinang tu fam welamuhuben yako suwap enebuhukteg nahiyehen let eneptuk laruhuk. An nine roho nindi misig toho fano ane eneg unubam turuk laruhuk.

⁴²Anden alem angginon aruma obog toho Yehuda inap unubam emberikik hag toho fano ane tuhuk ulug sali imbihi ane hikit toho unubam tuhuk ulug An HINIKNI Allahn uruk lahi.

⁴³Hiren henele uruk lit, ’O aru Babilonia inap ininggikmu aruhumu ap men wam men eleg amuhupmu lekma hag aruhu,’ uruk lahep angge famen o aru nin hebeloho fano aruhumu aben kinang ayeg waroho hilaruk lamuhup.

⁴⁴Ap iniline kinang hulul ulug ap wol eneplug it onolohotman suwesingga haharoho embelug ininggik tum emberuk lamuhup. Kinang atogman atogma ari roho turuk lamuhup: O Benyamin kinang fam, kinang Yerusalem walinggoho werehon fam, Yehuda pumbuk arimano fam, tom fam oho, punumu oho, ik ambut fil lekma oho aben uang perak fam kinang hilaruk lamuhup. Ari roho turuk lit Anden numalikisi nin hebeloho fanowap enebuhuk ulug An HINIKNI Allahn nele uruk lahi,” ulug hiyag nitisi.