Read Angguruk Yali YEREMIA 33 Bible Online

YEREMIA 33 - Angguruk Yali bible

YEREMIA 33

¹An Yeremia ninggik hele waroho ap suwon ibam owahalma weregma NINIKNI Allahn inggik pireneg angge an nubam ele uruk lit,

²”An kinang wal tiyareg ineyap tiyahon nunuk HINIKNI Allah suwaleg lahiyonen nele uruk lahi ane tu holeg lamin:

³Haren let nabin ulug An nubam heng naptuk laruhun halug Anden hat hele holtuk lit alem suwon hapelehon aben wenggel haruk eleg ane hiyag hutuk laruhuk.

⁴Ap seliyonen o aru pin kuhuk ulug elehet o Yerusalem huk toho ohowon walinggoho kinang fam hop til laharusama Yehuda inap onowesi suwon inibam men unumalikisi inibam men halog turusa ahalep fam elehet ineyap turusa angge famen An hit Israel hinap HINIKNI Allahn nele uruk lahiyon tu:

⁵Yerusalem inaben siyag ane eneg turuk latusa ane fahet Anden o pumbuk aru yet hamin fug ulug norohole saloho wereg lit noloken Yerusalem inap unusuhuk. Iren tog abul ulug turukmen Babilonia inaben unusuhupmu ap warehen o aru keleg aruhu.

⁶Ari roho tuhu angge famen fobik yowilangge Yerusalem inap unubam werehon Anden tag angge roho hihir enebuhukmu mun angge man angge enesehet teg angge eleg lam fug angge weregma amusun toho inindi yuwag toho welamuhup.

⁷Anden Yehuda inap men Israel inap indam welatfag hag toho nin hebeloho fanowap enebuhuk.

⁸Iren siyag-siyag ane eneg turuk lit An nele ying naptuk latusa ane ari Anden nambolmaya feseruk lit puhunap enebuhuk.

⁹Allahn o Yerusalem fam fano ane anggolo turuk latisimu ap arimano inindi yuwag toho wereg urukmu ap o pumbuk obog tohowen hol haruk lit enekol haruk lamuhup. O kema-keman enehiyehen o Yerusalem unuk uruk lit o ino fanowap turuk ahun palimu wereg ulug An wel naptuk lamuhup,” ulug hiyag nitisi.

¹⁰Hiyag nitisireg NINIKNI Allahn nin ele uruk lit, ”Hiren henele uruk lahebon tu, ’O Yerusalem pumbukmu owahalem ke men Yehuda pumbuk kema-keman ap men wam men eleg amuhupmu lekma hag aruhu,’ uruk lahep.

¹¹Ari roho uruk lahep ambeg aru fobik ap enehiyehen yunggultukon men inda yatukon men aben hiyap ket hilalug enehiyeg toho werehon oho hol haruk lamuhup. O itano li aben enele uruk lit, ’NINIKNI Allah pohol ha kinang ha senehon ubabut fano regma indi nenesug lit eneg werehen At wel turuk lamul,’ ulug An nibam waharuk lamuhup. Anden o aru fano welatfag hag toho nin hebeloho fanowap tuhuken An HINIKNI Allahn nele uruk lahi,” irisi.

¹²Irisireg NINIKNI Allah pohol ha kinang ha senehon inowen nin ele uruk lit, ”Kinang aru ap men wam men eleg amuhupmu lekma hag aruhu angge famen fobik o Yehuda pumbuk obog toho walinggoho aben enembohom indag taruk lamuhup.

¹³Kinang atogman atogma wam endetuk lit tom fam oho, punumu oho, ik ambut fil lekma oho, o Benyamin kinang fam, kinang Yerusalem walinggoho werehon fam, Yehuda pumbuk arimano fam wam anggolo amuhupmu iniknisi wal tanehen winag isaruk lamuhup,” ulug NINIKNI Allahn hiyag nitisi.

¹⁴ NINIKNI Allahn nin ele uruk lit, ”Anden Israel inap men Yehuda inap men unubam sali emberikikon hikirap tuhuk li horog aruhu.

¹⁵Horog aruhumu Anden Daud ubalmangge ahanuk fanowon eke wilip amag uhukmu wilip aruhu. At ap suwon in aruhureg unggum fano roho haltuk lit ap o pumbuk obog toho let eneptuk laruhu.

¹⁶At welaruhu li itano Yehuda inap fano amuhupmu Yerusalem inap oho inindi yuwag toho welamuhup. Ari roho weregma o Yerusalem ino unuk ’NINIKNI Allahn ili og neneptuk ambeg’ suwaluhup.

¹⁷Dauren ondohowonen endebuhubon arimanowen Israel inap fet enesugmen eneg welamuhup ulug An HINIKNI Allahn uruk lahi.

¹⁸Hun Lewi inowen ondohowonen endebuhubon arimano oho An nolohotma watlug wam esetuk lit wam waroho hubu lahaptuk lit suburu yaltuk lit weregman eneg welamuhup,” irisi.

¹⁹Ari irisireg NINIKNI Allahn an Yeremia nin hiyag nutuk lit,

²⁰”Anden hup aheg sakan teheg turuk laruhu ulug sali imbiyag ane ari hiren elehap tuk teg lalep halug

²¹Anden namingmingangge Daud ubam sali imbiyahon oho uwag oko helele. Helele halug aren ondohowonen endebuhubon arimanowen Israel inap fet enesug ane eleg alep. Ari hag toho Lewi inowen ondohowonen endebuhubon imam arimanowen oho An niyabuk turuk ane eleg alep.

²²Suhal men ik yinggi men aben wirim toho winag ha fug teg hag toho Anden namingmingangge Daud umbasi men Lewi umbasi An niyabuk warukon arimano men Anden anggolowap enebuhuk,” ulug hiyag nitisi.

²³Hiyag nitisireg NINIKNI Allahn an Yeremia nubam nin ele uruk lit,

²⁴”Aben enele urukon tu, ’Yehuda inap men Israel inap men NINIKNI Allahn mumal enepfag angge famen ketiya numalikisi welamuhup fug ulug embeserisi,’ urukmu holtikin ano? An numalikisi arimano ununggul unuk suwon welatusa ane eleg atisi ulug enebug uruk.

²⁵Ari fahet An HINIKNI Allahn nele uruk lahiyon tu holeg lamin: Anden hup aheg sakan teheg turuk laruhu ulug sali emberuk lit mun ane man ane poholman kinangman turuk ane imbiyahon ari eleg alep halug eneg

²⁶Yakuben ondohowonen endebuhubon men namingmingangge Daud inowen ondohowonen indag enebuhubon men embesele. Embesele halug Daud umbusagsiyen Abraham Ishak Yakub unumbusagsi fet enesug ane eleg alep. An numalikisi we tem toho nindi enesug lit nin hebeloho fanowap enebuhuk,” ulug hiyag nitisi.