Read Angguruk Yali YEREMIA 34 Bible Online

YEREMIA 34 - Angguruk Yali bible

YEREMIA 34

¹O Yerusalem pumbuk walinggoho werehon men ilmig tahuk ulug Babilonia inap onowe suwon Nebukadnezar umalikisi men aren apmayap eneptisiyon ap o pumbuk kema-kema werehon onowesi men waharusama NINIKNI Allahn an Yeremia nubam ele uruk lit,

²”An Israel hinap HINIKNI Allahn hiyag hitminon tu: Yehuda inap onowe suwon Zedekia ambeg lamihinteg hiyag utuk lit, ’NINIKNI Allahn ele urukon tu holeg lamin! Haren Babilonia inap enepma welamuhuk fug peruk lahen angge famen o Yerusalem aru Babilonia inap onowe suwon inowen harep pisako oluna fusukag ulug Anden inggikmu umbuhuk. Umbuhuk sambil ino at otsiyen hat sen habuhupmu ininggikmu aruhunteg onowe suwon Nebukadnezar men honorohole misigmu atuk lit henele uhup. Uhupmu hat og haplug o Babilonia kinangma lahup angge famen

⁴hat Zedekia o Yehuda inap onowe suwon welahenonen An HIKNI Allahn hiyag hitminon tu holeg lamin: Hat o Babilonia lahunon karohen huwabuk fugmen

⁵hindi yuwag toho weregman eneg war aruhun. Hat humbasi o Yehuda inap onowesi suwon arimano war atuk latfagma unumalikisiyen amben fano angge indokma yaltuk latfag hag toho hat fahet oho amben fano angge yaltuk lit, ’Ninikni, yihi-yehe,’ ulug hunu sini uruk lamuhup. An HIKNI Allahn nele ihi ane ari hiyag irik lamihin,” ulug hiyag nitisi.

⁶Hiyag nitisi ane ari hikit toho an Yeremian ap suwon Zedekia o Yerusalem weregma hiyag irik larikik.

⁷Larikik li itano Babilonia inap onowe suwon umalikisi menen o Yerusalem pin kuhuk ulug turuk latusa. Turuk lit o Yehuda pumbuk piren elehet ineyon walinggoho ohowon Babilonia inaben apmayap eneptusa fuhon Lakhis men Aseka men oho ilmig toho kuhuk ulug waling enesug latusa.

⁸NINIKNI Allahn an Yeremia nin ele hiyag nitisi. Hiyag nitisi li itano ap suwon Zedekia inowen umalikisi Yerusalem inap men enele uruk lit, ”Nit nenemingmingangge saplangge lol enebuhuk,” ulug sali emberusa.

⁹Sali emberuk lit, ”Ap misihen oho are Yehuda ahun eke amingminganggeyap tuhu fug ulug nit obog tohowen nenemingmingangge abet hiyabet lol enebuhuk,” ulug enele misig ane urusa.

¹⁰Urusa ane ino hikit toho Yerusalem inap sali ino emberuson obog toho onowesi menen enemingmingangge lol eneptusa angge famen

¹¹fobik nenembiken turukuk peruk lit lol eneptuson arimano nin hebeloho ininggik lisoho enemingminganggeyap eneptusa.

¹²Ari roho turusama NINIKNI Allahn an Yeremia nubam ele uruk lit,

¹³”An Israel hinap HINIKNI Allah welahiyonen nele uruk lahiyon tu: Anden hit hunumbasi o Mesir inap enemingmingangge welatfag ambehen hondog eneplug wilip atik iyag sambil it unubam sali emberuk lit,

¹⁴’Ap ekeyen are Ibrani ahun eke ayeg waroho amingminganggeyap tahu halug amingmingangge inowen yabuk wit utukmen eneg mo ilig am wirig am turuk lit falfalikenam lahumu mo sabiron fam ikniyen saplangge lole fuhu,’ iyag angge famen hit hunumbasiyen An nele holfag fug.

¹⁵Hunumbasiyen nele holfag fug angge famen hiren Allahn fano perukon tul ulug ketiya eneg hit henemingmingangge obog toho lol eneptikip. We tem toho lol enebuhuk ulug An nunuk wel naptuk ibamen nolohotman sali emberikip.

¹⁶Sali emberikip angge famen fobik nenembiken turukuk peruk lit lol eneptikibon arimano nin hebeloho ininggik lisoho henemingminganggeyap eneptikip. Ari roho turuk lit An nunuk fanowon ino siyahap tirikip.

¹⁷Siyahap tirikipmu An HINIKNI Allahn nele iminon tu holeg lamek: Hiren An nele holtuk lit honori henemingminganggeyap eneptikibon arimano lol eneptikip fugmu hit tog men ouk alem suwon men suburu obok menen hunusukag ulug hit An ninggikmuwen lol henebuhuk. Lol henebuhukmu siyag amuhup ane fahet hol hahupteg ap o pumbuk kinang atogman atogma werehonen yuk lagmag uruk lamuhup ulug An HINIKNI Allahn nele uruk lahi.

¹⁸Yehuda inap onowesi men, Yerusalem inap onowesi men, ap suwon let eneptukon men, An namingmingangge imam arimano men, o pumbuk walinggoho werehon onowesi menen An nolohotman sali ino ineyap tul ulug wam sapi waroho pul ke pilang turusareg fima-fima embelug pul ke larusa angge famen sali ino sobir isarusama Anden it obog toho wam sapi ino fam turusa ane hikit toho unubam tuhuk.

²⁰Anden it arimano ap seliyonen unusukag ulug ininggikmu umbuhukmu it enebe wareg angge suwe pohol ke larukon men fare mene menen suburuwap enebuhup.

²¹Suburuwap eneptukmu Anden Yehuda inap onowe Zedekia otsi men oho it unusul ulug turukon Babilonia inap onowe suwon inggikmu umbuhuk. Hun ino otsi men ketiya eneg o Yerusalem embeselug larusa angge famen

²²An HINIKNI Allahn hebeloho maniyek ulug wol enebuhukmu wamuhupteg o Yerusalem aru pin halog toho kuruk lit harep pisako oluna fusuhup. Oluna feserukmu Anden o Yehuda pumbuk arimano oho lekma hag tubuhukmu ap enele teng uhup,” ulug hiyag nitisi.