Read Angguruk Yali YEREMIA 35 Bible Online

YEREMIA 35 - Angguruk Yali bible

YEREMIA 35

¹Hun Yosia amloho Yoyakim inowen Yehuda inap fet enesug latisi li NINIKNI Allahn an Yeremia nubam ele uruk lit,

²”Ununggul unuk Rekhab inap enembeg lamihinteg Allah ibam ambiyeg lul ulug hondog eneplug lalug hili An nibam men ahandip toho wirihon fam kilihipteg hele anggur ahaluwe olokon nalusan hinang isamihin,” ulug hiyag nitisi.

³Hiyag nitisi ane hikit toho an hun Habazinya amloho Yeremian endetfahon Yaazanya ambeg larikikteg at ori umalikisi Rekhab inap arimano obog toho hondog eneplug Allah ibam larukuk.

⁴Larukukteg hili hun Yigdalya amloho Allah amingmingangge Hanan umalikisiyen tohon elma kurukuk. Hili kurukukon ino apma hili hun Salum amloho Maaseya Allah ibam sok foroho ahunen tohon wereg, hili ino iraham hili ap ununuk suwonen tohon wereg.

⁵Hili ino kurukukteg anden anggur ahaluwe olokon kubag fam hinanggowon men ik naruk anggubag men Rekhab inap onolohotma emberikikteg nalihip ulug hiyag isarikik.

⁶Hiyag isarikikmu iren hebeloho hiyag nutuk lit, ”Ik aru nul fug. Nunumba Yonadab hun Rekhab amloho inowen hiyag nisaruk lit, ’Hit men hiren endebuhubonen endebuhubon arimano menen anggur ahaluwe naruk lamuhup fug.

⁷O men yabuk men wit taruk lamuhup fug. Anggur yabuk oho wit tahup fug, yabuk ari hahon ngi reg lamuhup fug. Hit honoluk wereg lit o sabo wiroho welamuhup. Ari roho ap pohon hag toho wereg lit kinang tu fam amusun toho welamuhup,’ ulug hiyag nisibag.

⁸Nunumban hiyag nisibag ane ari obog toho seneg lit nit nunuhesi nunumalikisi ap angge hiyap angge men nonoluk wereg li misihim oho anggur ahaluwe olokon naruk lamuhuk fug.

⁹O won wit ta fug angge o sabo wiroho welatukuk. Anggur yabuk men suburu yabuk men ei yatukon men ngi reg latukuk fug. Ari obog toho nunumba Yonadab inowen hiyag nisibag ane hikit toho turuk lit il misig oho embeserukuk fug.

¹¹Ketiya eneg Babilonia inap onowe suwon Nebukadnezar men Siria inap menen Israel inap men tog abuhuk ulug nit nenengginangma kik waharusama nit nunusuhup tohon ulug o Yerusalem hirag arik waharukukteg welahe,” ulug hiyag nutusa.

¹²Hiyag nutusama NINIKNI Allahn an Yeremia nubam ele uruk lit,

¹³”An Israel hinap HINIKNI Allah pohol ha kinang ha seneg lahiyonen nele iminon tu holeg lamin! Lamihinteg Yehuda inap men Yerusalem inap men hiyag isamihinon tu: NINIKNI Allahn ele uruk lit, ’Hiren An nele sobir isarukmen eneg welamuhup ano, hunubabut haltuk lit An nele holtuk lit hunubabut haltuk lamuhup ano?

¹⁴Hun Rekhab amloho Yonadab inowen umalikisi hiyag isaruk lit, ’Hele anggur ahaluwe olokon naruk lamuhup fug,’ ulug hiyag isibag ane ino aren ondohowonen ondohowon arimanowen senegman eneg ketiya oho unumban hiyag isibahon holtuk lit anggur ahaluwe naruk eleg angge famen Anden hit hunubam nele irikik warikikmu hiren holtuk latikip fug.

¹⁵Anden namingmingangge nabi arimano hundig-hundig hit henembeg mon eneptukmu it obog tohowen hiyag hisaruk lit, ’Hiren siyag ane turuk lahebon embeselug hunubabut hal amuhup. Ap winonen tu Allah hag toho wereg ulug wel eneptuk angge fam wenggel haruk lit it fahet hubu lahaptuk lamuhup fug halug hit kinang Anden hit men hunumbasi men og hisiyahon fam weregman eneg welamuhup,’ ulug hiyag hisaruk latusa angge famen hit hinisanggo laroho wereg lit An nele holtuk latikip fug.

¹⁶Yonadab umbusagsi arimanowen unumban hiyag isibag ane holtuk angge famen hiren An nele holtuk lahep fug.

¹⁷Anden hit wol heneptukmu hiren wo uruk latikip fug. Anden komo heneptukmu hiren An nele sobir isaruk latikip. Ari fahet hit Israel hinap HINIKNI Allah pohol ha kinang ha seneg lahiyonen nele uruk lahiyon tu: Anden Yehuda hinap men Yerusalem hinap men alem angginon eke hag eke hag hunubam umbuhuk irikik ane ketiya hikirap tuhuk,’ ehek imihin,” ulug hiyag nitisi.

¹⁸Ari ulug hiyag nitisimu an Yeremian Rekhab inap hiyag isaruk lit, ”Nit Israel ninap NINIKNI Allah pohol ha kinang ha senehon inowen ele urukon tu, ’Hit hunumba Yonadab inowen hiyag hisibag ane hinine roho seneg lit aren komo henepfahon hikit toho turuk lahepma

¹⁹hun Rekhab amloho Yonadab inowen ondohowonen endebuhubon arimano An nolohotma unduhuk lit niyabuk turuk ane eleg aruhu fug. An hit Israel hinap HINIKNI Allah pohol ha kinang ha seneg lahiyonen nele aru uruk lahi,’ ehek,” ulug hiyag isarikik.