Read Angguruk Yali YEREMIA 36 Bible Online

YEREMIA 36 - Angguruk Yali bible

YEREMIA 36

¹Yosia amloho Yoyakim ino Yehuda inap fahet ap suwon atfagma mo uhanehon fam NINIKNI Allahn Yeremia fam ele uruk lit,

²”Suwesingga hahareg elehon eke wamihinteg Anden Israel inap, Yehuda inap, o pumbuk obog toho fahet indam Yosia welatfag liyen hiyag hitil waharukmen ketiya oho hiyag hutuk lahiyon obog toho suwesingga ino fam haharoho embemihin.

³Anden Yehuda inap unubam alem angginon ekeyon-ekeyon umbuhuk peruk lahiyon ino iren hol hahupteg enebe wal-wal unubabut siyahon haltuk lamuhup ano. Haltuk lamuhup halug iren onolok haruk lit siyag ane turukon arimano Anden elehap tuhuk,” ulug hiyag itfag.

⁴Hiyag itfagma Yeremia inowen hun Neria amloho Barukh wol tibareg NINIKNI Allahn ubam ele uruk latfahon obog toho hiyag utukmu Barukh inowen suwesingga fam paloho imbibag.

⁵Paloho imbibagma Yeremia inowen Barukh fam hiyag utuk lit, ”Alem an nubam werehen Allah ibam la fug teg lahi.

⁶Ari fahet aben wene ul ulug suburu na fug angge hiyang welamuhup sambil hat Allah ibam lahunteg NINIKNI Allahn uruk ane anden hiyag hutukmu suwesingga paloho emberikinon aru ap anggolo onolohotman hiyag isahun. Yehuda inap o pumbuk walinggoho werehon wamuhubon arimano oho hiyag isahun.

⁷Hiyag isahunmu iren holuhupteg enebe wal tanehen onolok ane embeselug unubabut haltuk lit NINIKNI fam sembahyang uruk lamuhup ano. NINIKNIYEN it fahet ahum ke het haruk lit nolok ane it unubam umbuhuk irisi,” ulug hiyag itfag.

⁸Weregman Yoyakim ino Yehuda inap onowe atfag li mo uhan libagma pikalem sohowon fam Allah fam sembahyang ul ulug o Yerusalem inap men o Yehuda pumbuk walinggoho wereg inap watfahon men suburu na fug angge hiyang angge welatfag. Weregma Yeremian hiyag itfag ane hikit toho Barukh ino NINIKNI Allahn uruk ane paloho emberikikon ino ap hiyag isamin ulug Allah ibam libag.

¹⁰Libareg Barukh ino Allah ibam ambol fil owahalma sok keron horogma suwesingga hahatuk ahun Safan amloho Gemarya wereg ambeg unduhuk lit Yeremian hiyag utukmu hahatfahon ino ap obog toho hiyag isibag.

¹¹Barukh inowen Allah wene suwesingga fam hahatfahon ino obog toho hiyag isarukmu Safan amloho Gemaryan endetfahon Mikhaya inowen hol hibareg

¹²ap suwon ibam suwesingga hahatuk ahun hur atuk fil libag. Onowesi suwon obog toho, suwesingga hahatuk ahun Elisama, hun Semaya amloho Delaya, Akhbor amloho Elnatan, Safan amloho Gemarya, Hananya amloho Zedekia onowesi winon inim heriyegma Mikhaya ino enembeg kibareg

¹³Barukh inowen Allah ibamen ibag ane obog toho hiyag isibag.

¹⁴Hiyag isibagma onowesi arimanowen hol hibareg Barukh inowen suwesingga ap anggolo onolohotman hiyag esehekon ino walug watmisi ulug Kusyi amloho Selemyan endetfahon Netanyan indag tibag ahun Yehudi ino Barukh welatfag ambeg monde fibag. Hondohik libagma Barukh inowen suwesingga ino walug enembeg watfag.

¹⁵Watfagma iren, ”Nare, hur atmihinteg suwesingga aru fam haharehon hiyag nisimin,” ulug mingming tibagma Barukh inowen hiyag isibag.

¹⁶Obog toho hiyag isibagma hol hibareg ap suwon-suwon arimano yuk libareg it-it enele sahaltuk lit, ”Hiyag nesehekon fahet folo-folo ap suwon hiyag irik lul,” ibareg

¹⁷Barukh fam kapal haruk lit, ”Ke roho suwesingga aru haharoho emberikin? Hiyag nisimin!” ulug kapal hibagma

¹⁸Barukh inowen hebeloho hiyag isaruk lit, ”Hiren holehebon obog toho aru Yeremia inowen hiyag nutukmu anden hahatuk angge fam suwesingga aru paloho emberikik,” irikim itano

¹⁹onowesi arimanowen, ”Lamihinteg hat Yeremia men hirag arik lalihip. It kema lahasa ulug ap onoluk amuhup tohon!” ulug hiyag itfag.

²⁰Hiyag itfareg suwesingga ino hun Elisama welatfag ambeg embelug ap suwon hiyag umul ulug owahalma libareg suwesingga ino fahet hiyag itfag.

²¹Hiyag itfagma ap suwonen suwesingga ino wak lamihin ulug hun Yehudi monde fibagma libareg Elisama welatfag ambehen wibareg walug watfag. Walug watfareg Yehudi inowen ap suwon men otsi iraham unduhuk latfahon obog toho onolohotman wene suwesingga ino fam hahatfahon hikit toho hiyag isibag.

²²Ari sambil pikalem sohowon inam atfagma ap suwon ino sun fahet wirig ibam heriyeg lit weregma aluke fil indok munggaltuk ambeg ambulpul turuk latfag.

²³Hun Yehudi inowen suwesingga ino inggila misig-misig kim harikim ap suwonen fili fam pal heheg indok ambulpul turukon ino fam hik-hak isarukmen eneg indoken suwesingga inggila arimano obog toho nibag.

²⁴Ap suwonen oho otsi arimanowen oho suwesingga ino fam hahatfahon hol hibag angge famen enekol ha fug angge nenembiken turukuk ulug enesum wan teg latfahon tararag isibag fug.

²⁵Elnatan men Delaya men Gemarya men itanowen enele ine roho suwesingga aru yalmihin fug ulug ap suwon fam heng tibag angge famen enele holfag fug.

²⁶Enele holuk fug angge suwesingga hahatisiyon Barukh men wene hiyag isaruk ahun nabi Yeremia men sen enebik lalihip ulug amloho Yerahmeel men Azriel amloho Seraya men Abdeel amloho Selemya men mon enepfag angge famen NINIKNI Allahn ap piren itano hirag enepfag.

²⁷Yeremia inowen Barukh hiyag utukmu hahatfahon ino ap suwonen indokma yale fisibagma itano NINIKNI Allahn Yeremia fam hiyag utuk lit,

²⁸”Suwesingga hahareg elehon eke wamihinteg suwesingga ap suwonen yale feserisiyon ino ubalmangge ambi roho haharoho embemihin.

²⁹Yehuda hinap hinikni Yoyakim fahet ari roho hiyag itmihin, ’Haren te nungge fahet ap suwon o Babel werehon inowen o aru siyahap turuk lit abet wamet elehap nenebuhuwen waruhu ulug hahareg latisi? ulug suwesingga tamon ino indokma yale feserikin.

³⁰Ari fahet An HIKNI Allahn hat ap suwon hubam nele hiyag hitminon tu: Hat humalikisiyen ondohowonen endebuhubon misig oho Daud ubalmangge ap suwon lahaku fug. Hat wareg angge anggenma hik hiyahupmu unukoho inahan hubam atukmu hubanggo sun hubam atuk laruhu.

³¹Hiren siyag ane turuk lahebon fahet Anden hat humalikisi men hamingmingangge men hunubam alem angginon umbuhuk. Hit men o Yerusalem hinap, Yehuda hinap obog toho siyahap henebuhuk irikik ane holtikip fug angge famen Anden perikik ane hikit toho tuhuk,’ ulug hiyag itmihin,” ibag.

³²Allahn ibag ane roho Yeremia inowen suwesingga hahareg elehon eke wibareg suwesingga hahatuk ahun Barukh og itfag. Og itfareg Yeremian hiyag utukmu Barukh inowen suwesingga atamon ap suwon Yoyakim inowen indokma yalfahon ino ubalmangge haharoho imbibag. Wene atam hahatfahon ino wirim toho emberuk lit wene winon eke ari hahon anggolo sebe roho paloho imbibag.