Read Angguruk Yali YEREMIA 37 Bible Online

YEREMIA 37 - Angguruk Yali bible

YEREMIA 37

¹Ap suwon o Babilonia inap inikni Nebukadnezar inowen Yoyakim amloho Yoyakhin ubalmangge Yehuda inap onowe raja welaruhun ulug Yosia amloho Zedekia lahapfag.

²Zedekia ino men amingmingangge arimanowet o Yehuda pumbuk werehonet NINIKNI Allahn Yeremia feneyen ele hiyag isarukmu holuk fug angge welatfag.

³Misihim ap suwon Zedekia inowen Selemya amloho Yukhal men Maaseya amloho Allah ibam foroho ahun Zefanya men unubam, ”Allah NINIKNI fam Israel ninap fahet sembahyang imisiyen hiyag irik lalihip,” ulug Yeremia wereg ambeg mon enepfag.

⁴Ino sambil Yeremia ino uwan inggik hele waroho o penjara fam kilabuk fugmu ap seheli ke laruk lit welatfag.

⁵Weregman o Babilonia inaben o Yerusalem inap unusul ulug waling enesug lit hol harukmen Mesir inaben o Yerusalem inap inibil amuhuk ulug waharuk urukmu hol isibareg o Babilonia inap enekolen wilip atfag.

⁶Wilip atfagma Israel inap INIKNI Allahn Yeremia hiyag utuk lit,

⁷”Zedekia inowen hinog og ha lalihip ulug hambeg mon eneptisi inap unubam ari roho hiyag isamihin, ’Suhuloho lalihipteg ap suwon Zedekia hiyag itlihibon te tu, ’Sehen seneg inap hinibil amuhuk ulug o Mesiren wilip atusa angge famen nin suhuloho inibam lahupmu

⁸o Babilonia inap hebeloho waharuk lit o Yerusalem aru pin kuruk lit indok unggama hik isahupmu o harep nahu.

⁹Hininggareg fahet henele si-si ane uruk lit, ’O Babilonia inap nit nunumbahalug mondabi larusa,’ uruk lahep angge famen mondabi larusa puk fug! ulug An HINIKNI Allahn uruk lahi.

¹⁰Hiren o Babilonia inap sehen senehon hunusul ulug waharuson obog toho unusuhupmu tog warehon tor angge welamuhup halug oho tog warehon arimano o saboman wal-wal in amuhupteg o aru harep pisako hunusuhup,’ ulusan hiyag isamihin,” ulug Allahn ibag.

¹¹Babilonia inap sehen senehonen o Yerusalem inap waling enesug lit hol harukmen o Mesir inap sehen senehon waharuk urukmu hol hibareg enekolen wilip atfagma

¹²Yeremia ino kinang numbusagsiyen lin isaruson ino nori men haloho umbuhuken kinang Benyamin fam lamin ulug o Yerusalemen wilip arik oho turuk latfag.

¹³Wilip arik oho lit o Benyamin larukon sok elma larukmen sok foroho ahun Hananya amloho Selemyan endetfahon unuk te Yeria inowen Yeremia senetfareg ngi hum uruk lit, ”Babilonia inap inibil aruhuk ulug laruk lahen!” irikim

¹⁴Yeremian hebeloho ap ino fam, ”Hele si ane uruk lahen! An o Babilonia inap inibil aruhuken laruk lahi fug,” ibag angge famen Yeria inowen holuk fug angge Yeremia senetfareg walug onowesi wereg ambeg watfag.

¹⁵Onowesi arimanowen Yeremia fahet onolok hibareg yik waroho suwesingga hahatuk ahun Yonatan welatfag ambeg famen ap hele waroho kilap eneptuk ambeg atfahon fam kilaptuk lit

¹⁶kinang habuligmu ik yenggeleg ambeg imbisik wambibagma amusun toho welatfag.

¹⁷Weregma ap suwon raja Zedekia inowen Yeremia hondoholug watlihip ulug ap mon enepfag. Ap suwon ibam hondoholug watfagma ap suwon inowen Yeremia hirako hinog og haruk lit, ”NINIKNI Allah ele hiyag nitmihinon wereg ano?” ulug kapal hibagma Yeremian, ”Wereg!” il laruk lit, ”Hat ap suwon Babel inap inikni inggikmu hik hiyahup,” ulug hiyag itfag.

¹⁸Hiyag itfareg nin ap suwon fam ele uruk lit, ”Anden hat men hamingmingangge men hunubam oho humalikisi unubam oho siyag ane nungge tirikikmu ninggik hele waroho o penjara fam kilap naptikip?

¹⁹Allah amingmingangge nabi arimanowen ap suwon o Babilonia inap inikni nunusik oho waruhu fug ulug hiyag hutuson arimano kema wereg?

²⁰Ketiya nikni, hat ap suwon, anden heng hapminon holeg lamin: An kilap naptikip ambeg war aruhuk tohon suhuloho numbahik lalihip fug,” ulug heng tibag.

²¹Heng tibagma ap suwon Zedekia inowen otsi fam, ”Hun aru an nibam owahalma foroho lamuhup,” ulug hiyag isibag. Hiyag isibag ane roho Yeremia ino ap suwon ibam owahalma foroho lit roti wiratuk inap enembeg roti wak lalug og irik waharukmen eneg o Yerusalem roti ino eleg atfag.