Read Angguruk Yali YEREMIA 38 Bible Online

YEREMIA 38 - Angguruk Yali bible

YEREMIA 38

¹Yeremia inowen ap anggolo unubam hiyag isaruk lit, ”NINIKNI Allahn ele urukon tu, ’O pumbuk aru Babilonia inap sehen senehon ininggikmu amuhupmu waroho apmayap henebuhup. Ari fahet ap sa-o sa-o pumbuk aruwen wilip am fug angge pok amuhup halug winon ap seliyonen hunusurukmu winon suburu oboken oho ouk suwonen oho war atuk lamuhup. Ap sa Babilonia inap enepma aruhuk ulug o aruwen wilip amuhup inap arimanowen eneg, ’Nunuselep angge famen nonoluk welahe,’ peruk lamuhup,” ulug hiyag isaruk latfag. Ari roho hiyag isil larukmu ap suwon-suwon Matan amloho Sefaca, Paskur amloho Gedalya, Selemya amloho Yukhal, Malkia amloho Paskur arimanowen hol hibareg

⁴ap suwon hiyag utuk lit, ”Ap ari pinggi ware fisiyek! Hun ariyen ele ari roho hiyag isaruk lit sehen seneg inap o pumbuk aru pok atuson men ap aruma obog toho inine elehap enebuhu rohon. Hun ariyen o pumbuk aru fano roho welamag ulug tuk fug angge siyag toho welamag ulug alem amuwon yami ruruk,” ulug hiyag itfag.

⁵Hiyag itfagma ap suwon Zedekia inowen it unubam uruk lit, ”Hun ari hit hininggikmu amag! Hit henele ine roho uruk lahepma an nele hebeloho uk fug teg lahi,” ulug hiyag isibag.

⁶Hiyag isibagma iren Yeremia senetfareg hele kumbi ililoho ap suwon ibam owahalma ik fahet habulfag ambeg pila fisibag. Habulfag ambeg ino ap suwon amloho Malkian tohon ino ik firig atfagma sabelep eneg welatfag ambeg pila fisibagma Yeremia ino sabelepma ubuk ibag.

⁷Ap suwon amingmingangge o Sudan ahun Ebed-Melekh inowen hol harukmen Yeremia ik fahet habulfag ambeg pila feserusa urukmu hol hibareg ap suwon ibamen wilip atug Zedekia o Benyamin larukon sok elma heriyeg lit weregma libareg hiyag utuk lit,

⁹”Nikni hat ap suwon, ap arimanowen nabi Yeremia ubam eke hag eke hag turukon ari mondabi siyag. Ik fahet habulig ambeg pila feserusama o pumbuk aru roti eleg atisimu Yeremia ino suburu oboken war aruhu,” ulug hiyag itfag.

¹⁰Hiyag itfagma ap suwonen hun Ebed-Melekh ubam, ”Ap hinahan hondog enepmihinteg hun Yeremia ino uwan war am fugmu ik fahet habulig ambeg inowen lisoho wili fik lalihip,” ibag.

¹¹Ibagma Ebed-Melekh inowen ap hinahan hondog enepfareg ap suwon ibam sum foroho ambeg kibareg sum siyahon kiririp tohon oko hele fam ililoho ik fahet habulig ambeg ino Yeremia pilap itfag.

¹²Pilap itfareg Ebed-Melekh inowen Yeremia ubam ele ine roho uruk lit, ”Sum siyahon tararag tohon arima hahuwal apma kilabe femihinmu niren hele kumbi fam lit habul,” ulug hiyag itfagma Yeremian aren ibag ane hikit toho tibibagma

¹³hele kumbi lisoho ik fahet habulig ambeg inowen Yeremia ilanma imbik lahibag. Lahibagma Yeremia ino ap suwon ibam owahalma forohoman amusun toho welatfag.

¹⁴Ap suwon Zedekia inowen wene hiyag isaruk ahun nabi Yeremia ino hondohik lalihip ulug ap mon enepfagma Allah ibam sok ele hinahanehon horogma hondoholug watfag. Hondoholug watfagma ap suwon inowen Yeremia fam ele uruk lit, ”Nin eke hiyag nitmihinon wereg ano ulug kapal hiyaruk lahi. Wereg halug an nolohotman hirahuk fug,” ibagma

¹⁵Yeremia inowen, ”Hat hubam aruhu ane hiyag hitmin halug hindi holoken nuwaruhun lit teg. Anden komo hapmin halug an nele holuhun fug,” ibagma

¹⁶ap suwon Zedekia inowen ele orog-orog Yeremia fam sali uruk lit, ”Anden huwaruhuk fug. Anden huwabul peruk inap ininggikmu humbahakuk fug ulug Allah oluk werehon ino sat fanowon og nisibahon inowen holeg lit weregma tem toho uruk lahi,” ulug sali imbibag.

¹⁷Sali imbibagma Yeremia inowen Zedekia hiyag utuk lit, ”Allah pohol ha kinang ha senehon Israel ninap NINIKNI inowen ele urukon tu, ’Hat o aruwen wilip aruhunteg Babilonia inap sehen senehon onowesi ininggikmu atmin ulug lahun halug huwabuk fug angge huhesi humalikisi men o pumbuk aru harep pisako hunusuhup fug angge famen

¹⁸haren Babilonia inap enepma aruhuk fug peruk lit wilip aruhun fug halug o pumbuk aru Babilonia inap ininggikmu aruhumu o harep pisako hunusurukmu it ininggikmuwen wilip aruhun fug,” ulug komo yig itfag.

¹⁹Komo yig itfagma Zedekia inowen, ”An numalikisi Yehuda inap Babilonia inap inibil amul ulug enembeg laruson ininggikmu numbahakup halug siyahap nabuhup lit teg ulug nakol toho welahi,” ibag.

²⁰Ibagma Yeremian hebeloho hiyag utuk lit, ”Hayen, ehenon ari hat hubam aruhu fug. NINIKNI Allah ele anden uruk lahiyon holuhun halug hebe fano wereg lit war aruhun fug.

²¹Ap seliyon ininggikmu arik lahuk fug peruk lahen halug NINIKNI Allah ele hiyag nutukmu yet harikikon iminon tu hubam aruhu:

²²Anden fulu roho yet harukmen hiyap tor angge hat hibam weregma ininggik lisoho hondog eneplug Babilonia inap onowesi onolohotma imbisik larukmu iren enele hat habug uruk lit, ’Hori hindi reg lahenonen enele si ane hubam uruk lit nenemno haptukmu it onombolim larikinteg ketiya re huyug sabelepma yukuk teg lahenma humbahalug it linggik-longgo ehesa,’ urukmu yet isarikik.

²³Huhesi humalikisi obog toho ininggik lisoho o Babilonia inap onolohotma imbisik lahupteg har oho ap suwon Babilonia inap inikni inowen sen habuhumu it ininggikmuwen wilip am fug angge welaruhun. O pumbuk aru oho indoken nahumu siyag aruhu,” ulug hiyag itfag.

²⁴Hiyag itfagma Zedekia inowen Yeremia fam ele uruk lit, ”Niren uruk laheyon aru fahet aben holuhup tohon! Ap winonen holuhupteg hat pinggi huwabuk nowen!

²⁵Niren uruk laheyon aru fahet onowesi suwon arimanowen holuhupteg hambeg wamuhup lit teg. Wamuhupteg iren kapal hiyaruk lit, ’Ap suwon fam nungge ulug hiyag itikinmu aren hat hubam nungge ane hiyag hitisi? Irikip ane hirahuk fug angge hiyag nisamihin halug huwabuhuk fug,’ ulug hiyag hirik wamuhup halug

²⁶haren it unubam hiyag isahunon tu, ’An war ahi ha nowen suhuloho Yonatan ibam numbahik lalihip fug ulug anden ap suwon fam heng tirikik,’ uhun,” ulug Yeremia hiyag itfag.

²⁷Hiyag itfareg weregma onowesi suwon arimano Yeremia kapal hul ulug watfag angge famen Yeremia inowen ap suwonen hiyag itfag ane hikit toho hiyag isibagma Yeremia embeselug libag. It pirenen enele ibag ane fahet misihen oho hol hibag fug.

²⁸Holfag fugmu Yeremia ino ap suwon ibam owahalma forohoman eneg o Yerusalem inap obog toho ap seliyon ininggikmu atfag.