Read Angguruk Yali YEREMIA 39 Bible Online

YEREMIA 39 - Angguruk Yali bible

YEREMIA 39

¹Zedekia ap suwon welatfag li mo sohowen libagma pikalem numon fam Babilonia inap onowe suwon Nebukadnezar ino umalikisi sehen senehon obog toho men Yerusalem inap unusuhuk ulug watfag. Watfareg o pumbukmu pin kuhuk ulug waling enesug latfag.

²Waling enesugmen eneg Zedekia ap suwon welatfag li mo nanggoloben atfagma pikalem uhanehon fam hup sohowenam noholug Babilonia inaben elehet ino halog tibareg

³it milal eneptukon arimano o pumbukmu kik watfareg elehet sok pulmuwon iraham welatfag. It sehelimu hun Nergal-Sarezer men, Samgar Nebo men, ap suwon ibam forohowon Sarsekim men, Nergal-Sarezer Rabmag men, ap ununuk suwon winon men welatfag.

⁴Weregma yet hibareg Yehuda inap onowe suwon Zedekia men umalikisi sehen senehon obog toho men enekolen hubanggo hirag-hirag ap suwon ibam ambol fil elehet altap toho ohoma sok ele keyen o Yerusalemen wilip atlug ik Yordan fil libag.

⁵Larukmen o Babilonia inap sehen senehon arimanowen it mug eneplug o Yerikho horogma laruk lit Zedekia senetfag. Senetfareg Babel inap onowe suwon welatfag ambeg Hamat kinang fam o Ribla walug libagma Nebukadnezar inowen alem angginon ubam imbibag.

⁶Alem angginon ubam imbibareg Nebukadnezar inowen Zedekia umalikisi inikni olohotman kong tebeselihip ulug otsi hiyag isibag. Kong tibisibareg Yehuda inap onowesi arimano oho o Riblan pinggi unusibag.

⁷Pinggi unusibareg Zedekia ilanggen pirenet sog tibisibareg hele ineyon fam pug toho o Babel walug libag.

⁸Walug larukmu o Babilonia inaben ap suwon Zedekia ibam ino men Yerusalem inap inibam men o pumbuk obog toho harep pisako siyaha fisibareg elehet o pumbuk walinggoho ohowon obog toho halog toho lin-lan isibag.

⁹Lin isibareg ap tot o Yerusalem pok atfahon men Babilonia inap inibil atfahon men obog toho ininggik hele waroho ap suwon foroho inap onowe Nebuzaradan inowen hondog eneplug o Babilonia imbisik libag.

¹⁰Imbisik laruk lit ap ininggikmu elehon pumbuk sel ke welatfahon we tor angge arimano eneg suburu yabuk men anggur yabuk men hiyag isibareg inibam embeselug libag.

¹¹Babilonia inap onowe suwon Nebukadnezar inowen Yeremia fahet ap suwon foroho inap onowe Nebuzaradan hiyag utuk lit,

¹²”Hun ino hondohik lamihinteg fano foroho laruhun. Siyag ane ubam tuk fug angge we aren hat heng haptuk ane hikit toho ubam turuk laruhun,” ulug hiyag itfag.

¹³Hiyag itfagma Nebuzaradan men, Nebusyazban ap suwon ibam forohowon ino men, Nergal-Sarezer ap sehen senehon onowe ino men, ap suwon let eneptukon winon menen onotsi mon enepfagma

¹⁴Yeremia ap suwon owahalma foroho ambeg weregma libareg hondoholug wilip atug hun Safan amloho Ahikam inowen endetfahon Gedalya fam inggareg ibam hondoholug lamihin ulug hiyag itfagma Yeremia ibam hondoko imbisik libag. Libagma Yeremia ino Yerusalem inap sehelimu inggareg ibam welatfag.

¹⁵Yeremia ap suwon owahalma foroho ambehen uwan wilip am fugmu NINIKNI Allahn ubam ele uruk lit,

¹⁶”O Etiopia ahun Ebed-Melekh ambeg lamihinteg hiyag utuk lit, ’Nit Israel ninap NINIKNI Allah pohol ha kinang ha senehon inowen ele urukon tu holeg lamin! Anden o Yerusalem aru siyahap tuhuk irikikon ino hikirap tuhuk sambil horog teg. O aru siyag atukmu hat hilen yet hahun angge famen

¹⁷ap hakol haruk lahen inap ininggikmu aruhun fuhen An HINIKNI Allahn windat habuhuk.

¹⁸Haren we tem toho An nubam wenggel niyaruk lahenma hat ap seliyonen karog fam huwabuhup fugmu fano wilip aruhunen Anden hat ili og habuhuk ulug NINIKNI Allahn ele ehek,’ imihin,” ulug hiyag itfag.