Read Angguruk Yali YEREMIA 4 Bible Online

YEREMIA 4 - Angguruk Yali bible

YEREMIA 4

¹An HINIKNI Allahn hebeloho Israel inap unubam nele uruk lahiyon tu: Haren NIKNI Allah ambeg hebeloho lamin peruk lahen halug An nambeg watmihin. Usangge enemben siyahon arimano An nolohotman hik isamihin halug hat hindi handuhal teg lit mulilik la mulilik wam turuk lahen ane eleg aruhu.

²Aben tem toho ehek pukag ulug hele wirik toho hayeg umen NINIKNI Allah oluk werehon unuk fam ihi uruk lit fano ane eneg turuk laruhun halug ap o pumbuk winonen oho An nunuk wel naptuk lit Allahn nir oho ninineyap nenebukag uruk lamuhup.

³An HINIKNI Allahn Yehuda inap men Yerusalem inap men unubam nele uruk lahiyon tu: Hoholangge sehelimu anggen fok tuk fug! Wen keron wiri fiyok!

⁴Yehuda hinap men, Yerusalem hinap men, nori, hinindi ambilahap palehon hag toho wereg lit An HINIKNI Allah nele holtuk lamuhup! Hiren siyag ane til-wil noruk latikibon fahet An nundama ahe laharukon ino indok ambulpul hag angge hit hunubam hik isahukmu aben wabuk fug tehonen hit mondabi siyahap henebuhu rohon!,” irisi.

⁵Kinang atogman atogma pinggong ele hum toho watil aliyek! Yerusalem inap men Yehuda inap obog toho menen holukag ulug henele hi roho hiyag isil lalihibon tu, ”O pumbuk elehet ineyon walinggoho ohowon arimano undama hirag arik lulen maniyek!

⁶Ap obog toho tom Sion fam lalusan enehangge yaho fiyek! Unduhuk lam fug angge pupu angge aliyek! NINIKNI Allahn ik eleruk filen alem mondabi siyahon nunubam monde fik waharuk.”

⁷Olomene fareman wilip atuk hag toho ap o pumbuk walinggoho siyahap enebil laruk ahun ino ibamen wilip atuk. Aren hit henengginang siyahap turuk lit hinibam pumbuk obog toho harep pisako oluna fusuhumu ap enele teng uhup.

⁸Ari fahet fesi lahaboho uba yatuk lit, ”NINIKNI Allahn olok haruk ane umbusuk fug angge indok ambulpul hag toho nunubam pilabik waharuk,” ulug henele ya nga iyok!

⁹NINIKNI Allahn ele uruk lit, ”O ino sambil ap suwon otsi at iraham werehon men inine eleg aruhumu imam inap enekolen enemelmel toho weregma nabi Allah ele hiyag isarukon arimano inindi angginen lebe ruk fug angge welamuhup,” irisi.

¹⁰Ari irisimu anden nele uruk lit, ”Yihi, NIKNI suwon Allah, Haren Yehuda inap men Yerusalem inap men unubam hele si ane irikin. Haren hiyag isaruk lit, ’Hinindi yuwag toho welamuhup,’ ulug sali emberikin angge famen ketiya ap seliyonen nunusuk oho waharuk,” irikik.

¹¹Nunusuk oho waharukmu aben Yehuda inap men Yerusalem inap men hiyag isaruk lit, ”Siyelu inahanon lek filen hit han wirag henebik waharuk. Alinglongangge homhomowen fu isaruk lit walug laruk hag toho wam fug angge

¹²ine roho fu ruruk lit fuk-fak hisa waharuk. Allahn siyelu ino monde fik waharuk lit umalikisiyen siyag ane turuk latuson fahet alem angginon unubam emberuk,” ulug hiyag isaruk.

¹³Ap seliyon arimano hina singon hag toho waharukmu yet homok! Kereta enembohom kudan lisoho walug laruk angge fam lahalug siyelu hag toho waharuk. Enembohom kuda folo-folo laruk ane men suwe ngileken laruk ane men wirim teg eleg. Yihi, nit siyag amuhuk!

¹⁴O Yerusalem, hat hindimuwen siyag toho wenggel haruk lahenon eleg amag ulug hebe puhun toho umag tahun halug eneg siyag aruhun fug. Noenam welamuhukteg hat hundaman siyag ane tuhuk ulug wenggel haruk lahenon umbusuhun?

¹⁵O Dan kinangman enele ngik-ngog urukmu tom Efraim famen aben nit siyag amul urukon holiyok!

¹⁶Ap seliyon waharuk ulug ap o pumbuk walinggoho werehon enele wal-wal werehon urukon obog toho hiyag isa aliyek! Ap seliyon yitmi-yatman waharuk lit o pumbuk Yehuda kinang fam werehon waling enesug lit siyahap enebul ulug enele ngik-ngog urukon fahet o Yerusalem inap hiyag isiyok!

¹⁷NINIKNI Allahn ele uruk lit, ”Yehuda inap men Yerusalem inap menen An nele ying naptuk latusa ane fahet Anden ap seliyon arimano mon enebik waharukmu ap yabuk foroho lit walinggoho unduhuk hag toho it inibam waling enesug lamuhup.

¹⁸Haren siyag ane til-wil noruk lit hinggarehen alem ari hubamap taruk latikinmu ketiya hindimu fit fam ahako folok haptuken asengseng haruk lahen,” uruk.

¹⁹Tog abul ulug pinggong ele hum toho watil laruk lit enele ngik-ngog urukmu holtuk lahi. Holtuk lit nilonggoma ouk naptuken inel-hanel uruk lahi. Nindi pong-pong angge rurukmu nele eleg angge welam fug teg lahi.

²⁰Kinang obog toho siyahap turuk lit o pumbuk eke halog til eke halog til waharuk. Keman wahileg keman wahileg an nibam o sabo wiroho welahi ambeg oho siyahap tik waharuk.

²¹Noenam welamuhukmu tog abul ulug pinggong ele hum toho uruk ane anden hol haruk lahiyon ino eleg aruhu? Nosambil ap seliyon palu atuk ambeg enehangge yahowon anden yet haruk lahiyon arimano heneko hik isahup?

²²NINIKNI Allahn ele urukon tu, ”An numalikisi inindi sohu roho wereg lit An Inikni fahet enepeleg toho wereg. Malik fuwon hag toho wereg lit inindi anggat teg eleg. Siyag ane fahet enehiyeg toho wenggel haruk lit fano ane fahet inindi nonghong uruk.”

²³Anden kinang walinggoho yet harukmen kinang pirim-pirim angge ruruk lit mondabi s ungguk-sanggak teg latisi. Pohol fil lahap harukmen hik teg latisi.

²⁴Tom fil yet harukmen tom yuk elek turukmu punu reg ambeg obog toho yu rik la yu rik wam turuk latusa.

²⁵Anden yet harukmen ap enele teng urukmu suwe obog toho linggik-longgo urusa.

²⁶Kinang fano fil yet harukmen lekma hag atisimu NINIKNI Allah olok indok ambulpul hahon olohotman o pumbuk obog toho halog toho lin-lan urusa.

²⁷Anden fulu roho yet harikikon ino fahet NINIKNI Allahn ele uruk lit, ”Anden kinang ari obog toho siyahap tuhuk angge famen mondabi elehap tuhuk fug,” irisi.

²⁸NINIKNI Allahn kong toho emberisiyon ari uwag oko hilahu fug. Ari fahet kinangen fong watuk hag toho turuk laruhumu pohol hik teg eneg laruhu.

²⁹Ap seliyon sehen seneg lit wam kuda fam lahalug waharukon arimanowen enele ngi urukmu hol isaruk lit ap o pumbuk obog toho enekolen linggik-longgo uruk. Linggik-longgo ul ulug farema hirag arik laruk lit tom yaron fam helep unggulmu laharuk. Ap obog toho inibam embeselug linggik-longgo urukmu ap misig oho ibam wereg eleg.

³⁰O Yerusalem, ap seliyonen hat siyahap habik oho waharuk angge famen nungge fahet haren sum polu fam palehon wan taruk lit horohole fene wam finggi are rebelug haliliyangge emas umbagpag turukon fam wirihon lahaptuk lahen? Hat hebe fanowap taruk lahenon ari saplangge turuk lahen. Ap inindi hasug latuson arimanowen hat fahet inirimen huwabuk oho reg.

³¹Anden hol harukmen hiyap malik tamon indag taruk lit tanggusi naruken ele hi roho uruk hag toho urukmu hol hiyaruk lahi. He Yerusalem ino sat pong-pong angge ruruk lit akolen inggik leko, ”Yihi, nakolen-e, an nuwabul ulug turuk,” uruk.