Read Angguruk Yali YEREMIA 40 Bible Online

YEREMIA 40 - Angguruk Yali bible

YEREMIA 40

¹Babilonia inap arimano o Rama wereg lit Yerusalem inap men Yehuda inap men og eneplug o Babilonia kinangma imbisik lul ulug turukmu Yeremia oho inggik hele waroho ori sehelimu weregma yet hibareg Babilonia inap inikni foroho inap onowe Nebuzaradan inowen hun aru Yeremia ulug oluk atfagma Yeremia inggik hele lole fisibareg hibam lamihin ulug hiyag itfag. Hiyag itfagma itano NINIKNI Allahn Yeremia ubam ele hiyag itfag.

²Hiyag um fugmu Nebuzaradan inowen Yeremia wol tibareg ele ubam uruk lit, ”O aru siyag am fugmu Hat HIKNI Allahn o aru siyag aruhu irisi.

³Irisi ane ino ketiya hikirap tirisi. Hiren HINIKNI Allah ele windal isaruk lit ele ying turuk latikipmu alem angginon ari hunubam atisi.

⁴Ari teko larisimu ketiya anden hat hinggik hele lol hapminmu hat an men ambiyeg o Babilonia kinangma lulon fahet fano pemihin halug ambiyeg lulteg anden hat fano fet hasug laruhuk. Ambiyeg lul fug pemihin halug welatmihin. Kinang aru fam hindimuwen o kema-kema lamin pemihin ambeg lamihin,” ulug hiyag itfag.

⁵Hiyag itfareg Yeremia uwan la fugmu nin ele uruk lit, ”O Babilonia ninap nonowe suwon inowen o Yehuda pumbuk arimano seneg laruhun ulug lahaptisiyon hun Safan amloho Ahikam inowen endetfahon Gedalya ambeg lamihinteg at men wereg lit hat hori sehelimu welaruhun. Gedalya men welaruhuk fug pemihin halug hindimuwen lamin pemihin ambeg lamihin,” ulug hiyag itfareg kalemma laruk lit naruk angge men fano-fano angge men Yeremia og itfareg lamihin ulug hiyag itfag.

⁶Hiyag itfagma Yeremia ino hun Gedalya o Mizpa weregma libareg at men wereg lit ori o Babilonia kinangma hondog eneplug libag fuhon sehelimu welatfag.

⁷Yehuda inap sehen senehon onowesi men kema-kema linggik-longgo ik libareg anggenma welatfag. Wereg lit hol harukmen Babilonia inap onowe suwon inowen Yehuda kinang seneg lit ap ininggikmu elehon o Babilonia hondog eneplug waharukuk fuhon abet hiyabet maliket fet enesug laruhun ulug hun Safan umbusag, Ahikam amloho Gedalya lahaptisi urukmu hol hibag.

⁸Hol hibareg unumalikisi men hun Gedalya o Mizpa weregma libag. Libahon arimano ununuk te hun Netanya amloho Ismael men, Kareah amloho Yohanan men, Tanhumet amloho Seraya men, o Netofa ahun Efai umalikisi men, Maakha amloho Yezanya men Gedalya ambeg libagma

⁹Gedalya inowen it unumalikisi men fag toho hiyag isaruk lit, ”Henekol eleg toho Babilonia inap enepma welamuhup. Kinang aru fam yuwag toho wereg lit Babilonia inap onowe ele urukon holtuk lamuhup halug hit henebe fano welamuhuben tem toho uruk lahi.

¹⁰O pumbuk hiren seneg lahebon fam wereg lit hele anggur anggen men e anggen men e zaitun anggen men tahanoho hinibam walug watug andog toho emberuk lamuhup. An Yehuda hinap honowe roho o Mizpa tuma wereg lit Babilonia inap nenembeg waharukmu anden it men nenele uruk lamuhuk,” ulug hiyag isibag.

¹¹Hiyag isibag li itano Yehuda inap o Moab kinang fam, Amon kinang fam, Edom kinang fam, o pumbuk winon fam linggik-longgo ibahon arimanowen oho hol harukmen Babilonia inap onowe suwon inowen nonori Yehuda inap winon enembeg embeselug laruk lit hun Gedalya Yehuda kinang seneg laruhun ulug lahaptisi urukmu hol hibag.

¹²Hol hibareg Yehuda inap arimano obog toho o kema-kema longgo ibag ambehen Yehuda kinangma suhuloho wamul ulug Gedalya o Mizpa weregma watfareg hele anggur anggen men e anggen men anggolo tahanoho inibam walug watug andog toho emberuk latfag.

¹³Misihim sambil hun Kareah amloho Yohanan men Yehuda inap sehen senehon onowesi anggenma welatfahon arimano men hun Gedalya o Mizpa weregma watfareg

¹⁴at ubam enele uruk lit, ”O Amon inap onowe suwon Baalis inowen Netanya amloho Ismael hiyag utuk lit Gedalya ware fesemihin ulug hambeg monde ferisi ane hat holuk?,” ulug hiyag itfag angge famen Gedalya inowen enele si ane ehesa pibag.

¹⁵Pibagma Yohanan inowen hirahoman Gedalya hiyag utuk lit, ”Anden Ismael ino ware fusuhukmu ap misihen oho san watisi ulug oluk laruhu fug. Nungge fahet hun inowen hat huwaruhumu Yehuda inap hat hiraham palu arik waharuson arimano obog toho linggik-longgo uruk lamuhup? Yehuda inap tor angge werehon arimano mondabi siyag amuhup tohon!” ulug hiyag itfag.

¹⁶Hiyag itfagma Gedalya hebeloho hiyag utuk lit, ”Ismael abug uk fug!” ibag.