Read Angguruk Yali YEREMIA 41 Bible Online

YEREMIA 41 - Angguruk Yali bible

YEREMIA 41

¹Ari ibag angge famen mo ino fam pikalem sabiron larukmu hun Elisama umbusag, Netanya amloho Ismael inowen ap numen hondog eneplug Gedalya o Mizpa weregma watfareg at men ambiyeg suburu naruk latfag. (Ismael ino ap suwonen ondohowon wereg lit owe suwon let turuk latfag.)

²Suburu narukmen Ismael otsi numen men in atfareg Gedalya o Babilonia inap onowe inowen Yehuda kinang fahet lahapfahon ino ware fisibag.

³Ware fisibareg Gedalya iraham o Mizpa welatfahon Yehuda inap men, Babilonia inap sehen senehon men oho unusibag.

⁴Likiyamon Gedalya ware fisibag ane fahet aben uwan holuk fugmu

⁵ap teng hinahan o Sikhem men, Silo men Samaria menen waharuk lit ap war atfahon fahet enehangge panisung kong toho, enehap ke fili fam kiriring toho, enesum tararag toho suburu men amben fano angge men NINIKNI Allah ibam walug lul ulug watfag.

⁶Kalemma waharukmu Ismael inowen uba yatil o Mizpan wilip atuk lit ap arimano onolohotma libareg hun Ahikam amloho Gedalya ha lalihip ulug hiyag isibag.

⁷Hiyag isibagma Gedalya ambeg lul ulug o pumbuk pulmu larukmen Ismael otsi menen unusibareg enebe wareg angge ik fahet habulig ambeg hik isibag.

⁸Ap teng hinahan arimano unusul ulug turukmen it sehelimuwon numen itanowen Ismael hiyag utuk lit, ”Niren roti anggen men e zaitun ahaluwe men kin ahaluwe men anggenma hirahoma foroho laheyon arimano unug huyulen lul,” ulug hiyag itfagma Ismael otsi menen onori winon unusehe hag toho it numen aruma oho unusul pibag ane imbisibag.

⁹Ik fahet habulig ambeg ino Yehuda inap onowe suwon Asa inowen Israel inap onowe Baesa men tog aptuk lit yat toho habulfahon elma Ismael inowen ap unusibahon enebe hik isibahonen keleg atfag.

¹⁰O Mizpa inap we tor angge welatfahon men Yehuda inap onowe suwon aholani men hun Gedalya inowen fet enesug laruhun ulug Nebukadnezar ebe foroho inap onowe Nebuzaradan inowen hiyag itfahon arimano obog toho Ismael inowen sen enepfareg ininggik hele waroho Amon inap enengginangma og eneplug libag.

¹¹Larukmu hun Kareah amloho Yohanan men ap sehen senehon onowesi winon at iraham welatfahon menen Ismaelen tibag ane fahet hol hibareg

¹²unumalikisi obog toho palu eneplug Ismael men tog abul ulug o Gibeon laruk lit at ik yenggelehon iraham weregma libag.

¹³Libagma ap Ismaelen ininggik hele waroho og eneplug libahon arimanowen yet harukmen Yohanan men sehen senehon onowesi winon men waharukmu yet isibareg enehiyeg haruk lit

¹⁴Ismael embeselug hun Kareah amloho Yohanan iraham libag.

¹⁵Libagma Ismael men otsi likinen men longgo ibareg o Amon kinangma libag.

¹⁶Libagma ap hiyap malik men ap sehen senehon men ap suwon let eneptukon men Ismaelen Gedalya ware fisibareg ininggik hele waroho og eneplug libahon arimano Yohanan men Yehuda inap sehen senehon onowesi arimano menen palu enepfag.

¹⁷Palu enepfareg hun Gedalya o Babilonia inap onowe inowen Yehuda kinang seneg laruhun ulug lahapfahon ino Ismaelen ware fisibagma Babilonia inaben ayeg waroho nunusuhuk ulug enekolen Yohanan ori men ap palu enepfahon arimano menen o Mesir kinangma longgo ik lahuken kalemma nohik lul ulug hun Kimham ibam o Betlehem horogma libag.