Read Angguruk Yali YEREMIA 42 Bible Online

YEREMIA 42 - Angguruk Yali bible

YEREMIA 42

¹O Mesir uwan la fug lit hun Kareah amloho Yohanan men Hosaya amloho Azarya men onori ap sehen senehon milal eneptukon arimano men ap obog toho it inim welatfahon suwonet toronet

²Allah amingmingangge nabi Yeremia ambeg libareg hiyag utuk lit, ”Niren hat fam heng habulon tu holeg lamin: Nit tor angge welaheyon aruma fahet Hat HIKNI Allah fam sembahyang imihin. Nit nenebe anggolo welatukuk angge famen ketiya tor angge welahe ane hilen yet nisaruk lahen.

³Haren nit fahet sembahyang imihinmu hat HIKNI Allahn nit o kema laruk lit turuk lamuhukon hiyag nisahu ano,” ulug hiyag itfag.

⁴Hiyag itfagma Yeremia inowen hebeloho hiyag isaruk lit, ”Hiren heng nabehebon holihireg anden hit HINIKNI Allah fam sembahyang iminmu Aren hebeloho hiyag nuruhu ane anden il misig oho hirahuk fug angge fag toho hiyag hisahuk,” ibag.

⁵Ibagma iren Yeremia fam enele uruk lit, ”NINIKNI Allah olohotman nenele tem toho uruk laheyon tu: Hikni ALLAHN hat feneyen nit hiyag nisahu ane obog toho turuk lamuhuk fug halug At niren uruk lahe ane holtukon inowen alem angginon nunubam umbuhu.

⁶NINIKNI Allah ubam sembahyang imihin ulug heng haptuk lahe ahun inowen fano ane hiyag nisahu halug oho siyag ane hiyag nisahu halug oho niren holtuk lamuhuk. At ele holtuk lamuhuk halug fano welamuhuk,” ulug hiyag itfag.

⁷Ari ulug hiyag itfagma hup numenam noholug NINIKNI Allahn Yeremia ubam ele uruk latfag.

⁸Uruk latfagma Yeremia inowen Yohanan men ori sehen senehon milal eneptukon arimano men ap obog toho it inim welatfahon suwonet toronet wol enepfareg

⁹hiyag isaruk lit, ”Hiren te nit fahet Israel ninap NINIKNI Allah fam sembahyang imihin ulug heng naptikip ane hikit toho anden sembahyang uruk latikik. Urukmu Aren an hebeloho hiyag nitisi ane iminon tu holeg lamek:

¹⁰’Anden alem angginon hunubam emberikikon fahet nindi siyag atisi. Ari fahet hit kinang aru fam welamuhup halug Anden hit heneko hik isa fug angge yako suwap eneptuk laruhuk.

¹¹Babilonia inap onowe suwon henekol toho welahep ahun ino fahet henekol haruk lamuhup fug ulug An HINIKNI Allahn nele uruk lahi. An hit men wereg lit at inggikmuwen windat henebuhuk.

¹²Anden nin hebeloho nindi henesug lit Babilonia inap onowe indi kahaluhukmu aren hinilaheg ulug hinibam lalihip ulug hiyag hisahu,’ ehek.

¹³Ari ehek angge famen hiren NINIKNI Allah ele holtuk lamuhuk fug ulug henele uruk lit, ’Nit kinang aru embeselug

¹⁴o Mesir kinangma lahukteg tog aptuk ane yet haruk lamuhuk fug, tog elma kul ulug pinggong ele watukmu hol haruk lamuhuk fug, suburu obok haruk lamuhuk fuhen yug toho welamuhuk,’ uhup halug

¹⁵nit Israel ninap NINIKNI Allahn ele urukon tu holeg lamek: ’Hit Yehuda hinap we tor angge welahebonen we tem toho o Mesir kinangma lahukteg ap pohon hag toho welamuhuk peruk lahep halug

¹⁶ap karog fam hunusuruk ane men suburu obok haruk ane men hiren henekol haruk lahebon ariyen hunusil larukmen eneg hit o Mesir kinangman war amuhup.

¹⁷O Mesir lahuk peruk inap obog toho tog men suburu obok men ouk alem angginon menen war amuhup. Anden alem angginon unubam monde fik waruhukmu ap misig oho wilip atuk lit fano aruhu fug.

¹⁸Hit o Mesir lahup halug An nundama ahe laharukon ari indok ambulpul hahon Yerusalem inap unubam hik isarikik hag toho hit hunubam oho hik isahuk. Hik isahukmu aben hit yet hisalug enekolen yug lagmag uruk lit wasubag sup toho hininggaliyap heneptuk lamuhup. Ap ekeyen eke huluwap timin peruk laruhu halug Yehuda inap mondabi siyag atusa hag toho ar oho siyag amag uruk laruhu. Hit suhuloho waharuk lit we tem toho o aru hinilen yet hahup fug. An Israel hinap HINIKNI Allah pohol ha kinang ha seneg lahiyonen nele aru uruk lahi,’ ehek,” ulug hiyag isibag.

¹⁹Ari ulug hiyag isibareg Yeremian nin hiyag isaruk lit, ”Hit Yehuda hinap tor angge welahebon, NINIKNI Allahn, ’O Mesir kinangma lahup fug,’ ulug hiyag hesehek. Aren hiyag hesehekon hikit toho anden o yoho komo henebihi ane fano wenggel homok!

²⁰Hiren te nit fahet NINIKNI Allah fam sembahyang imihinmu Aren hebeloho uhu ane hiyag nisahunon hikit toho turuk lamuhuk uruk latikip. Ari roho irikibon ari nit siyahap taruk lamuhukon fahet ehe ulug henepelehen uruk lit hininggareg hinindi ninap taruk latikip.

²¹O yoho anden hit HINIKNI Allahn an hiyag nitisi ane obog toho hiyag hisihi angge famen hiren At ele holtuk lahep fug.

²²Ari fahet hit kinang aru embeselug lahukteg yug toho welamuhuk peruk lahep ambehen tog men suburu obok men ouk alem angginon menen war amuhup ane honoluk toho welamok!,” ulug hiyag isibag.