Read Angguruk Yali YEREMIA 43 Bible Online

YEREMIA 43 - Angguruk Yali bible

YEREMIA 43

¹NINIKNI Allahn Yehuda inap o Mesir lahuk pibahon fahet hiyag itfag ane Yeremia inowen ap arimano hiyag isibagma

²hun Hosaya amloho Azarya men Kareah amloho Yohanan men ap unubabut hemet toho turukon arimano obog toho menen Yeremia hiyag isaruk lit, ”Hele si ane ehen! Nit NINIKNI Allahn hat hiyag hum fugmen o Mesir lahupteg yug toho welamuhup fug ulug hiyag nesehen.

³Hat hamingmingangge hun Neria amloho Barukh inowen hindi kahal haptisimu hele hiyag nesehen. Aren te ap aruma Babilonia inaben winon unusuruk lit winon ininggikmu hele waroho o Babel imbisik lahuben ininggikmu amuhup peruk,” ulug hiyag isibag.

⁴Ari ulug hiyag isibareg Yohanan men ori ap sehen senehon milal eneptukon men ap arimano obog toho menen NINIKNI Allahn Yehuda kinangma welamuhup ulug hiyag isibag ane holuk fug anggeyen

⁵o Mesir lahuk ulug wilip atfag. Wilip atfareg laruk lit Yohanan men ap sehen senehon onowesi obog toho menen milal eneptukmu Yehuda inap o kema-kema laruk latfag ambehen suhuloho enengginangma watfahon abet hiyabet maliket men Yehuda inap onowe aholani men hun Gedalya inowen fet enesug laruhun ulug Nebukadnezar ebe foroho inap onowe Nebuzaradan inowen hiyag itfag inap arimano obog toho it onombolim laruk lit Yeremia men amingmingangge Barukh men og eneplug libag.

⁷Libareg NINIKNI Allah ele sobir isalug Mesir kinang fam o pumbuk Tahpanhes libag.

⁸Libagma NINIKNI Allahn o Tahpanhes inowen Yeremia hiyag utuk lit,

⁹”Helep suwon wamihinteg Yehuda inaben yet hawag ulug it iniline ap suwon ibam o Tahpanhes werehon sok kurukon iraham helep arimano kinangma salmihin.

¹⁰Salmihinteg Yehuda inap hiyag isamihinon tu: Nit Israel ninap NINIKNI Allah pohol ha kinang ha senehon inowen ele urukon tu holeg lamek! An namingmingangge o Babilonia inap onowe suwon Nebukadnezar hondoholug waruhukteg helep kinangma salehon aruma emberimu at lehoma heriyeg laruhu ambeg unduhuk fuhukmu aren o sabo fanowon wit tahu.

¹¹Nebukadnezar inowen o Mesir inap apmayap eneptuk lit winon ininggik hele waroho og eneplug lahu, winon karohen unusuhu, winon ouk alem suwonen war amuhup.

¹²Mesir inaben usangge foroho ibam arimano Anden harep pisako siyahap tuhukmu usangge arimano minggiroho winon Nebukadnezar inowen indokma yale feseruk lit winon o Babel walug lahu. Usangge o Mesir inaben forohowon obog toho Nebukadnezar inowen fi matuk hag toho elehap tuhureg ibam larukmu ap misihen oho ele ying tuhu fug.

¹³Tuhu fugmu ibam laruk lit usa ahalep o Mesir kinangma o pumbuk Bet-Syemes hutuk tibahon arimano halog toho siyahap tuhureg Mesir inaben usangge foroho ibam obog toho harep pisatil lahu,” ulug hiyag itfag.