Read Angguruk Yali YEREMIA 44 Bible Online

YEREMIA 44 - Angguruk Yali bible

YEREMIA 44

¹NINIKNI Allahn Yeremia ubam ele uruk lit, ”Yehuda inap o Mesir kinang fam o pumbuk Migdol men Tahpanhes men, Memfis men, ik elerukmu werehon obog toho men hiyag isamihinon tu,

²’Israel ninap NINIKNI Allah pohol ha kinang ha senehon inowen ele urukon tu holeg lamek! Alem angginon Anden o Yerusalem men o Yehuda pumbuk arimano men unubam monde ferikikon obog toho hiren yet harikip. O pumbuk halog toho lin isaruson arimano ap eleg atusama o yoho olun eneg wereg.

³Yerusalem inap men Yehuda inap menen siyag ane anggolo turuk lit An nindi siyahap naptuk latusa ane fahet alem angginon ari unubam emberikik. Iren ap winonen tu Allah hag toho wereg ulug wel eneptuk angge it men hit men hunumbasi men henepeleg toho welatikibon arimano unubam sembahyang uruk lit it fahet hubu lahaptuk latusa.

⁴Anden namingmingangge nabi arimano obog toho hundig-hundig enembeg mon enebik waharuk lit, ’Amben siyahon Anden nirim peruk lahiyon ari tuk fug,’ ulug hiyag hisaruk latikik angge famen

⁵hit hinisanggo laroho wereg lit An nele sobir isalug siyag ane hiren turuk latikibon umbusuk fug angge ap winonen nunumbasi ulug wel eneptuk angge fahet hubu lahaptuk latikip.

⁶Ari roho turuk latikip ane fahet An nundama ahe laharukon ino indok ambulpul turuk hag toho o Yerusalem pumbuk owahalem ke men o Yehuda pumbuk kema-kema hik isaruk lit harep pisako olunap tirikik ambeg arimano ketiya oho wereg.

⁷Ari fahet o yoho An Israel hinap HINIKNI Allah pohol ha kinang ha seneg lahiyonen hit kapal hisaruk lit, ’Nungge fahet o Mesir kinang fam welamuhuk ulug waharikipteg Mesir inap unumbasi fahet hubu lahaptuk lit An nindi siyahap naptuk lahep? Nungge fahet hininggareg siyahap taruk lahep? Hininggarehen turuk lahebon ariyen hit Yehuda hinap ap hiyap malik fuwonet eleg amuhupmu ap o pumbuk obog tohowen hol hahupteg ap huluwap eneptuk lit, ’Yehuda inap siyag atusa hag toho ar oho siyag amag,’ uruk lamuhup ane ariyen hit hininggaliyap heneptuk lamuhup.

⁹Hit hunumbasi men Yehuda hinap honowesi unuhesi men hit hininggareg hunuhesi menen Yehuda kinangman oho o Yerusalem pumbukmuwen oho siyag ane turuk latikibon fahet henepeleg atisi ano?

¹⁰Hit hininggareg hinindi apmayap tarikip fug hag toho o yoho oho hunubabut haleg eleg angge welahep. Hit An nubahet henekol eleg toho wereg lit Anden tu men ari men turuk lamuhup ulug hit hunumbasi men komo heneptik iyag ane hikit toho turuk lahep fug.

¹¹Ari fahet An norohole nolok toho kim hisaruk lit hit Yehuda hinap mondabi eleg amuhuben siyahap henebuhuk. An Israel hinap HINIKNI Allah pohol ha kinang ha seneg lahiyonen nele aru uruk lahi.

¹²Hit Yehuda hinap we tor angge welahebon o Mesir yug toho welamuhuk ulug waharikibon Anden elehap henebuhuk. Hit suwonet toronet o Mesir kinang tu famen karog men suburu obok menen hunusuhup ane fahet aben hol hahupteg enekolen yug lagmag uruk lit wasubag sup toho hininggaliyap heneptuk lamuhup. Ap ekeyen eke huluwap timin peruk laruhu halug Yehuda inap mondabi siyag atusa hag toho ar oho siyag amag uruk laruhu.

¹³Anden o Yerusalem inap arimano karog men suburu obok men ouk alem suwon menen unusirikik hag toho Yehuda hinap o Mesir kinangma waharikibon oho hunusuhuk.

¹⁴Hunusuhukmu hit Yehuda hinaben o Yehuda kinangma suhuloho lila ulug hinindi ouk toho wenggel haruk lamuhup angge famen ap misig oho wilip atug lahu fug. We ap piren hinahan hirag amuhubon eneg o Yehuda kinangma suhuloho lahup ehek,’ imihin,” ulug hiyag itfag ane hikit toho Yeremian Yehuda inap arimano hiyag isibag.

¹⁵Hiyag isibagma ap nit nunuhesiyen ap winon unumbasi fahet hubu lahaptuk ulug onolukon arimano men hiyap anggolo luhaloho welatfahon men Israel inap o Mesir kinangma ik eleruk fil welatfahon menen Yeremia hiyag utuk lit,

¹⁶”NINIKNI Allahn ele ari roho ehek ulug hiyag nesehen ane ino holtuk lahe fug.

¹⁷Niren sali emberuk lit ninisinga poholmon fahet hubu lahaptuk lit ik hilili feruk lamuhuk urukukon hikit toho turuk lamuhuk. Nit o Yerusalem men Yehuda men wereg lit nunumbasi men nonowesi suwon men it sen nenesuhon winon menen turuk ane hikit toho ninisinga poholmon ino wel turuk latukuk ane ariyen suburu si roho wilip atukmu nenebe fano welatukuk angge famen

¹⁸at wel turuk ane embeserukuk liyen suburu eleg atisimu suburu obok men karog men famen war atuk lahe,” ulug hiyag itfag.

¹⁹Hiyag itfareg hiyap arimanowen nin hiyag utuk lit, ”Niren ninisinga poholmon fahet hubu lahaptuk lit ik hilili feruk lit roti anggen at ahuhe hag toho wiratuk laheyon emberuk lahe ane fahet nenehunsiyen fano peruk,” ulug hiyag itfag.

²⁰Hiyag itfagma Yeremia inowen ap hiyap luhaloho welatfahon arimano hebeloho hiyag isaruk lit,

²¹”Hit hunumbasi men honowesi suwon men hit sen henesuhon winon menen o Yehuda pumbukmu men Yerusalem owahalem ke men ninisinga poholma wereg peruk lahebon fahet hubu lahaptuk latikip ane ari fahet NINIKNI Allahn indi siyag toho wenggel harisireg alem angginon hunubam emberisi fug ano?

²²NINIKNI Allahn hiren amben siyahon eneg turuk latikip ane fahet nirim perisireg hit henengginang mondabi siyahap tirisimu ap enele teng uruson ketiya oho wereg. Enele teng uruson fahet aben hol halug enekolen yug lagmag uruk. Iren ap huluwap eneptuk lit, ’Yerusalem inap men Yehuda inap men siyag atusa hag toho ar oho siyag amag,’ uruk.

²³Hiren NINIKNI Allah ele holtuk lit tu men ari men turuk lamuhup ulug komo nenepfag ane hikit toho tuk fug angge ninisinga poholma wereg peruk lahebon fahet hubu lahaptuk latikip ane ariyen NINIKNI Allah ele ying turuk latikip. Ari fahet alem angginon arimano obog toho hunubam atisimu ketiya oho siyag toho welahep,” ulug hiyag isibag.

²⁴Hiyag isibareg Yeremian ap hiyap obog toho unubam nin ele uruk lit, ”Hit Yehuda hinap o Mesir kinangma waharikibon, nit Israel ninap NINIKNI Allah pohol ha kinang ha senehonen ele urukon tu holeg lamek: Hit hunuhesi menen, ’Ninisinga poholmon fahet hubu lahaptuk lit ik hilili feruk lamuhuk,’ ulug sali emberikip ane hikit toho turuk lahep. Ari halug hiren sali emberikip ane hikit toho turukmen eneg welamuhup angge famen

²⁶An HINIKNI Allahn hit Yehuda hinap o Mesir kinangma waharikibon obog toho hiyag hisaminon tu: An nunuk suwonen nele tem toho uruk lit, ’O Mesir kinang tu famen Yehuda ahun misihen oho, ’NINIKNI Allah oluk werehon unuk fam ihi,’ uruk laruhu fug,’ ulug hiyag hisaruk lahi.

²⁷Anden hit fano welamuhup ulug wenggel ha fug angge siyag amuhup ulug sap teg lahireg hit Yehuda hinap o Mesir kinang fam welahebon obog toho tog men suburu obok menen war amuhupteg mondabi eleg amuhup.

²⁸Eleg amuhupmu ap we tor angge onoluk welamuhubon o Mesiren suhuloho Yehuda kinangma wamuhup. Wamuhubon arimanowen NINIKNI Allahn ele irisiyon hikir atisi ano, niren nenele urukukon hikir atisi ano ulug wenggel hahupteg inindi anggar aruhu.

²⁹An HINIKNI Allahn hit o Mesir kinangman siyahap henebuhuk ihiyon ari hikirap turuk ulug honoluk aruhuwen enehane Anden tuhukon tu:

³⁰Anden Yehuda inap onowe suwon Zedekia ino ap seliyonen wabukag ulug Babilonia inap onowe suwon Nebukadnezar inggikmu emberikik hag toho Mesir inap onowe suwon Hofra oho ap seliyonen wabukag ulug ininggikmu umbuhuk ulug An HINIKNI Allahn uruk lahi,” ulug hiyag isibag.