Read Angguruk Yali YEREMIA 46 Bible Online

YEREMIA 46 - Angguruk Yali bible

YEREMIA 46

¹NINIKNI Allahn ap o pumbuk wal taneg werehon alem angginon unubam umbuhuk ulug an At amingmingangge nabi Yeremia hiyag nitisi.

²Atamtam o Mesir inap fahet ele hiyag nitisi. Hun Yosia amloho Yoyakim inowen Yehuda inap fet enesug latisi li mo ilig am wirig am turukmen eneg uhan atisimu Mesir inap onowe suwon Nekho umalikisi menen Babilonia inap men tog abuhuk ulug ik Efrat ayegma larusareg o pumbuk Karkemis horogma o sabo wiroho weregman Babilonia inap onowe suwon Nebukadnezar inowen waroho apmayap eneptisi. Apmayap eneptisi ane fahet an Yeremian Allahn hiyag nitisi ane hikit toho nele uruk lahiyon tu,

³”Anden hol harukmen Mesir inap onowesiyen enele hi roho uruk lit, ’Tog silimu lulen tog piyabangge men hununggul asum men lahaboho

⁴henembohom kuda kereta lisoho walug laruk angge fam ilili felihipteg winon henembohom emberimu lahalug in arik maniyek! Sing wan tebelug tog ambiyang morok toho imbiyek!’ uruk.

⁵Ari urukmu anden yet isarukmen Mesir inap arimano enekolen tog aptuk ambeg embeselug laruk. It enembong se roho turukon arimano ap seliyonen apmayap eneptukmu enembol fil yet ha fug angge linggik-longgo uruk. ’Ap enekolap enebil larukonen waling enesug,’ ulug NINIKNI Allahn ele uruk.

⁶Ap nonoluk welamul ulug folo-folo larukon oho wilip atuk eleg. Ap inine roho turukon oho ininggarehen windat ta fug tehen ik Efrat ayegma ik eleruk fil fuk toho yingguruk lit war atuk.

⁷Ap sa ik Nil fu waharuk lit fima-fima miyaloho laruk hag toho waharuk?

⁸Mesir inap arimano ari hag toho waharuk lit, ’Nit lahakukteg kinang obog toho hondo ruruk lit o pumbuk obog toho abet inibamet siyahap enebuhuk,’ uruk.

⁹Wam kuda arimano folo-folo lawag! Wam kudan lisoho walug laruk angge kereta fili-folo lalusa! Hit henembong se roho turuk lit tog piyabangge lahabeg lahebon Sudan hinap men Libia hinap men, Lidia hinap henesehen olokon men tog elma lalihip!

¹⁰NINIKNI Allah pohol ha kinang ha senehon inowen At men seli roho wereg inap hebeloho unusuhu sambil ino karog Aren tohon fene mep eneg aruhu. Aben Allah fahet wam waroho emberuk hag toho NINIKNI Allah pohol ha kinang ha senehon inowen ik Efrat ayegma ik eleruk filen ap anggolo unusuhu.

¹¹Hit Mesir hinap, nori, ahaluwe ap hihir eneptuk angge hilahuben o Gilead kinangma lalihip! Ap hihir eneptuk angge eke hag eke hag andog til laruk lahep angge famen fano amuhup fug.

¹²Ap seliyonen hit hininggaliyap heneptusa ane fahet ap o pumbuk kema-kema werehonen hol harusa. Honori tog elma laruson arimano enekolen it-it miyal-miyal atil laruk lit salog-malog angge roho fuk turuk lit war atusama hiren henele ya nga uruk latikip ane ariyen kinang obog toho keleg atisi.”

¹³Babilonia inap onowe suwon Nebukadnezar inowen o Mesir kinang ilmig tahuk ulug waharisimu NINIKNI Allahn an At amingmingangge nabi Yeremia hiyag nitisi ane hikit toho nele uruk lahiyon tu,

¹⁴”O Mesir inap unubam teko lahu ane fahet hiyag isil lalihip! Hiyag isa lalihip ane ari o Migdol inap men, Memfis inap men, Tahpanhes inap menen holukag! Hiren it unubam henele uruk lit, ’Hit walinggoho wereg inap arimano obog toho ap seliyonen karog fam unusurusama hit in atug sehen fam tog sap teg lit welamok!’ ulug hiyag isalihip.

¹⁵Nungge fahet Mesir inap onowe suwon ine roho turuk latisiyon ino kinangma fuk tirisi? NINIKNI Allahn miyaloho pilaptisimu mako wambirisi.

¹⁶Onggo fahet o Mesir inap inibil arik waharuson arimano Allahn enekolap eneptukmu it-it miyal-miyal atil laruk lit ap anggolo salog-malog angge roho fuk turusa. It-it enele uruk lit, ’Tohen nunusuhup tohon ulug nit ninibam yugmu wal taneg lul,’ uruk latusa.

¹⁷Mesir inap onowe suwon ino unuk salikap toho ’Ele hemeron ine roho tuk teg ane telep li pisantisi ahun’ ulug suwaluhup!

¹⁸NINIKNI Allah unuk pohol ha kinang ha seneg ahun suwalehon inowen ele uruk lit, ’An suwon noluk welahiyonen nele tem toho uruk lahiyon tu: Tom yaron Tabor men tom Karmel ik saho ahik famen laharukon men hag toho ap suwon obog toho enemberimu wereg ahun ino waruhureg Mesir inap onowe suwon apmayap tuhu.

¹⁹Hit Mesir hinap hininggik lisoho og heneplug o winama lahuben henesum wep toho emberuk lamek! O pumbuk Memfis halog toho ilkal isahupmu ap enele teng uhup.

²⁰O Mesir kinang wam tuhumon hag toho weregman kin ami ekeyen fato rimin ulug ik eleruk filen waharuk.

²¹Onggo fahet o Mesir inap inibil arik waharuson oho wam seiyon hag toho wereg angge famen Allahn hebeloho unusuhu sambil horog atukmu ir oho inine eleg atuken linggik-longgo uruk.

²²E mutuk inaben yaha unumaloma hubaloho laruk hag toho ap seliyon arimanowen oho iniyaha hubaleg lit enebe inine roho waharuk. Waharukmu yet isalug o Mesir inap arimanowen pisanggo hirag atuk lit aplohok turuk hag toho turuk lit longgo uruk.

²³Ap seliyon arimano inini hag toho mondoko waharuk lit o Mesir kinang atogman atogma ohi humon obog toho mubuhup ulug An HINIKNI Allahn uruk lahi.

²⁴O Mesir inap arimanowen ap o pumbuk ik eleruk fil werehon ininggikmu atukuk ulug ininggali haruk,’ irisi.

²⁵Israel ninap NINIKNI Allah pohol ha kinang ha senehon inowen nin ele uruk lit, ’O Tebe inaben nunumba Amon ulug wel turukon ino Anden apmayap turuk lit o Mesir inap onowesiyet tu Allah hag toho wereg ulug wel eneptukonet siyahap enebuhuk. Siyahap eneptuk lit onowe suwon men at ele holtukon men oho alem angginon unubam umbuhuk.

²⁶It arimano obog toho Anden it unusuhuk perukon o Babilonia inap onowe Nebukadnezar umalikisi men ininggikmu umbuhuk angge famen fobik nin hebeloho o Mesir kinangma wamuhupteg tam welatfag hag toho welamuhup ulug An HINIKNI Allahn uruk lahi.

²⁷Hit An namingmingangge Yakub umbusagsi welahebonen henekol haruk lamuhup fug! Hit Israel hinap hininggik lisoho o yatma og heneplug larusa ambeg welahebonet hunumalikisiyet Anden windat heneptuk lit hondog heneplug henengginangma suhuloho waruhukmu ap misihen oho henele ying henebuk fug angge weregma hinindi yuwag toho welamuhup.

²⁸Ari fahet hit An namingmingangge Yakub umbusagsi welahebon henekol eleg toho welamuhup. Hit hik-hak hisarikik ambehen An hit men wereg lit windat henebuhukteg it mingming heneptuk inap arimano obog toho elehap enebuhuk. Hit eneg elehap henebuk fug angge siyag ane hiren turuk lahebon wirim toho unggum angginon hunubam umbuhuk,’” ulug NINIKNI Allahn hiyag nitisi.