Read Angguruk Yali YEREMIA 48 Bible Online

YEREMIA 48 - Angguruk Yali bible

YEREMIA 48

¹Israel ninap NINIKNI Allah pohol ha kinang ha senehon inowen Moab inap fahet ele irisiyon tu, ”O pumbuk Nebo pin halog toho siyahap turusa. O Kiryataim ilmig toho kuruson fahet Kiryataim inap ininggali haruk. O Moab elehet yaron walinggoho ohowon ino oho halog toho ilkal isarusa.

²Moab inap ununuk palimu welatusa ane eleg atisi. Ap seliyon o Hesbon ilmig toho kurusareg enele sahaltuk lit, ’O Moab inap mondabi elehap enebuhuk,’ uruk. Hit o Madmen hinap karog fam hunusul ulug mug heneplug wamuhupmu hinibam pumbukmu ap enele teng uhup.”

³Holeg lamek! O Horonaim inaben enele hi roho pin lilibug toho nunusik wahasa uruk.

⁴Malik fuwonen oho enele hum toho uba yatuk lit, ”O Moab kinang obog toho siyag atisi,” uruk.

⁵O Luhit horogma tom fene laharuk lit aben uba yatil laruk. O Horonaim horogma tom famen wamburuk lit ap seliyonen mun angge man angge siyahap turukon fahet enekolen enele hi roho urukmu hol esemek!

⁶Iren te, ”Nonoluk welamuhuken longgo ul! Lekma lulteg yawe siyahon hag toho welamuhuk halug oho fano,” uruk.

⁷Hit hinindimuwen wenggel haruk lit, ”Elehet ineyon nit ninibam walinggoho ohowon arimano men mun angge man angge foroho laheyon men famen fano amuhuk,” perukmen ap seliyonen hit hinibam pin kik waharuk. Nunumba ulug wel turuk lahebon Kamos men at iyabuk turukon imam men ununuk suwon winon men ininggik lisoho o winama imbisik lahup.

⁸Mun angge man angge siyahap turuk inap arimano o pumbuk misig oho pisan toho la fug angge o Moab pumbuk obog toho siyahap til laruk. Yordan tonggoma oho tom fene oho laruk lit NINIKNI Allahn tam irisi ane hikit toho mun angge man angge lilibug toho ilkal isaruk.

⁹O Moab pumbuk arimano oluna fusuhupmu ap welamuhup fug. It obog toho unusuhubon fahet enehangge helep eke hutuk tebehup!

¹⁰Ap san NINIKNI Allahn Moab inap arimano obog toho karog fam unusuhup ulug hiyag isarisi ane hikit toho turuk eleg halug siyag amag!

¹¹Indam Moab inap arimano ap seliyonen enele ying eneptuk lit ininggik lisoho og eneplug o winama imbisik laruk latusa fug. Inindi yuwag toho wereg lit hele anggur ahaluwe amben fanowon aben kubag eke famen eke fam hilil isaruk elehon hag toho welatusa angge famen

¹²aben hele anggur ahaluwe kubag famen hilil isaruk hag toho Moab inap arimano hik-hak isahup ulug Allahn ap mon enebuhu sambil horog aruhu. NINIKNI Allahn ele ari uruk. Mon enebuhu inap arimanowen anggur ahaluwe kubag fam hinanggoho werehon obog toho hik isahupteg kubag arimano arap toho ilkal isahup.

¹³Ilkal isarukmu Israel inaben o Betelen tu Allah hag toho wereg ulug wel turukon inowen umalikisi let eneptisi fug hag toho Moab inaben nunumba ulug wel turukon Kamos inowen oho umalikisi let enebuhu fug.

¹⁴Hiren henele hemet toho uruk lit, ”Nit tog aptuk ane nonoluk ninap wereg lit nenembong se roho turuk lamuhuk,” uruk lahep angge famen

¹⁵ap seliyonen o Moab kinang siyahap turuk lit hinibam pin kul ulug turuk. Pin kul ulug turukmu Moab hinap kabiniyon hinine roho turuk lahebon it enelukeman larukmen wam watuk hag toho hunusuhup. At suwon unuk NINIKNI Allah pohol ha kinang ha senehonen ele ari uruk.

¹⁶O Moab kinang siyag aruhu li horog tegma alem siyahon folo-folo hunubam aruhu.

¹⁷Hit o Moab kinang walinggoho welahebon men Moab inap ununuk honoluk teg lahebon menen it fahet hunu sini uruk lit, ”Inine roho turuk lit wanggun ininggikmu seneg latuson fala roho hik isarusa,” uruk lamek.

¹⁸Hit o Dibon hinap, ap seliyon o Moab kinang siyahap tuhuk ulug waharuson arimanowen elehet hit hinibam walinggoho ohowon halog tuhuk ulug waharukmu hit lehoma heriyeg lahep ambehen wambulug kinangma hur amiyek.

¹⁹Hit o Aroer hinap, sa waharuk ulug yet isalihiben kebunggalma unduhuk lamek! Unduhukmu ap hirag arik lul ulug henembeg waharukon unubam, ”Nungge teko larisimu wahep?” ulug kapal isalihip.

²⁰Kapal isalihipmu iren hebeloho hiyag hisaruk lit, ”O Moab inap waroho apmayap eneptusama ininggali roho werehon fahet henele hum toho uba yatuk lamek. Ap ik Arnon ayegma werehon oho onoluk amusan, ’O Moab siyag atisi,’ ulug hiyag isa lalihip,” ulusa.

²¹O Moab kinang fam tom fene werehonen siyag ane turuk latuson fahet alem angginon unubam atisiyon ununuk tuma ul: o Holon, Yahas, Mefaat,

²²Dibon, Nebo, Bet-Diblataim,

²³Kiryataim, Bet-Gamul, Bet-Meon,

²⁴Keriot, Bozra men o Moab pumbuk kema-kema werehon men NINIKNI Allahn alem angginon unubam emberisi.

²⁵NINIKNI Allahn ele urukon tu, ”O Moab inap ininggik kong tebeserusama inine roho turuk ane eleg atisi.”

²⁶Iren NINIKNI Allah olohotman ininggareg palimuwap taruk ane eleg amag ulug ik olokon anggolo hinang isahupmu narukmen eneg nenek turuk lamuhup. Nenek turuk lit me wibuhubon fene imbil-ambal uruk lamuhup. Imbil-ambal urukmu aben yet isalug inda yag eneptuk lamuhup.

²⁷Tam it ininggarehen Israel inap inda yag eneptuk latusa. Yoholiyangge waruk inap sen eneplug enebug uruk hag toho Israel inap fahet uruk latusa. It unubahet ununggul kaya ruruk lit ininggaliyap eneptuk latusa ane fahet hebeloho ininggareg ininggali atuk lamuhup.

²⁸Hit Moab hinap hinibam embeselug lalihipteg kiling elma wereg lit suwe yalman pulema ei witukon hag toho welamuhup.

²⁹Niren hol harukmen Moab inap arimano ininggareg wel taruk lit winik-wonog toho urukmu hol isarukuk.

³⁰Holtukukon ino fahet NINIKNI Allahn ele uruk lit, ”Moab inaben hemet til laruk lit enele mahayeg toho uruk angge famen iren urukon hikit toho turuk eleg ane An HINIKNI Allahn noluk,” uruk.

³¹Ari fahet an Yeremian Moab inap obog toho fahet hunu sini uruk lahi. O Kir-Heres inap siyag atukon fahet ngesekum turuk lahi.

³²O Yaezer inap fahet nele tor angge uba yatuk lit hit Sibma inap fahet eneg nele hi roho uba yatuk lahi. Indam hele anggur hiren yatuk latikibon arimano unggum yaluk-faluk isil larukmu asimit sililim-salalam turukon ik Il Warehon ilanma oho o pumbuk Yaezer horogma oho laruk latisi. Hiren e anggen men anggur anggen men tahantukmen ap seliyonen ngik-ngog til hunusik waharusa.

³³O Moab kinang atogman atogma aben yabuk wituk lit enehiyehen sini yunggultuk ane eleg atisi. Aben anggur anggen pete roho umatuk ane Anden elehap tirikikmu o kema-kema enehiyehen ngik-ngog uruk ane teng irisi.

³⁴O Hesbon inaben let nenebik maniyek ulug enele ya nga uruk ane o Eleale inap men Yahas inap menen hol isaruk. Ik o Nimrim werehon oho firig atuken o Zoar inaben enele hum toho uba yatukon o Horonaim inap men Eglat-Selisia inap menen oho hol isaruk.

³⁵NINIKNI Allahn ele uruk lit, ”Moab inap arimano punumu laharuk lit nunumbasi ulug wel eneptukon fahet hubu lahaptuk ane Anden elehap tuhuk,” uruk.

³⁶Ari regma Moab inaben mun angge man angge andog toho emberuk latuson obog toho eleg atisimu anden Moab inap unubahet nindi anggin toho wenggel haruk lit inibam pumbuk suwon Kir-Heres fahet nindi wat taruk lahi.

³⁷Moab inap obog toho inindi siyahen onoruk paluk fug angge ininggik enehap ke kiriring heheg wat taruk lit fesi enemigmu lahaboho wereg.

³⁸O kema-kema ap obog tohowen fong watuk lit o unggama lahalug hunu sini uruk, o silimuwen oho uba eneg yatuk. Ari turukmu NINIKNI Allahn ele uruk lit, ”Anden o Moab inap arimano kubag aben hik usul perukon hag toho arap toho hik isarikik,” uruk.

³⁹Nit nenengginang mondabi siyag atisi ulug Moab inap arimano ininggaliyen enenduhun ap yig isaruk. Yig isarukmu ap o pumbuk walinggoho werehonen inda yag eneptuk lit nungge fahet alem ari unubam atisi ulug yuk lagmag uruk lamuhup.

⁴⁰NINIKNI Allahn ele uruk lit, ”Ap seliyon arimanowen o Moab kinang siyahap tuhuk ulug suwe tunguni aherabul wiriloho laruk hag toho waharuk,” uruk.

⁴¹Iren o pumbuk obog toho pin kuruk lit elehet yaron huk toho kilabeg ambeg oho ilmig taruk lamuhup. O ino sambil Moab inap inine roho turukon arimanowen hiyaben malik endebuk oho lit enekol haruk hag toho enekolen yuk lagmag uruk lamuhup.

⁴²Moab inaben NINIKNI Allah olohotman ininggareg palimuwap taruk latusa ane fahet mondabi eleg amuhup.

⁴³Hit Moab hinap henekolen yuk lagmag uruk lit kiling elma mako wambulug yebangge fam luhur amuhup,” ulug NINIKNI Allahn ele uruk.

⁴⁴Ap sa akolen longgo imin puhureg larukmen kiling elma wambuhu. Ap sa kiling elma wambulug nin hebeloho lahik waruhu halug yebangge fam kuhu. NINIKNI Allahn ele uruk lit, ”Anden puhuk sambil alem angginon ari unubam umbuhuk,” uruk.

⁴⁵Aben nonoluk welamul ulug hirag arik larukmen inine eleg atuken o Hesbon kel taruk lit yet harukmen ap suwon Sihon ibamen indok ambulpul wilip atuk. Indok inowen o Hesbon pumbuk men Moab inap enele hemet toho urukon enengginang tom atelmat alo keyet obog toho naruk.

⁴⁶Hit Moab hinap nunumba Kamos ulug wel turuk lahebon mondabi siyag amuhup. Ap seliyonen hit abet hiyabet hininggik hele waroho og heneplug o winama hunumbahik lahup angge famen,

⁴⁷”Fobik Anden Moab inap arimano nin hebeloho fanowap enebuhuk,” ulug NINIKNI Allahn ele uruk. Allahn Moab inap alem angginon unubam umbuhuk irisi ane we ita emberuk lahe.