Read Angguruk Yali YEREMIA 49 Bible Online

YEREMIA 49 - Angguruk Yali bible

YEREMIA 49

¹ NINIKNI Allahn o Amon inap fahet irisiyon tu, ”Nungge fahet o Amon inaben nunumba ulug wel turukon Milkom inowen o Gad kinang ilmig tirisimu umalikisi Amon inap o Gad pumbuk arimano ngi atusa? O Israel inap arimano iniknisiyet unumalikisi kinang ngi reg lamonet eleg atusa peruk lit ilmig tarusa ano?

²Ap seliyonen Amon inap inibam pumbuk suwon Raba ino pin kuhuk ulug enele ngik-ngog il lahuben Anden mon enebuhuk sambil horog aruhu ulug An HINIKNI Allahn uruk lahi. Ap seliyon arimanowen o Raba ino halog toho oluna fesehupteg o pumbuk toron walinggoho werehon arimano harep pisako siyahap tuhup. Siyahap tuhupmu Israel inaben it enengginang Amon inaben ilmig taruson ino hebeloho hilahup.

³It seliyonen o pumbuk Ai siyahap turusa ane fahet hit Hesbon hinaben henele ya nga iyok! Hit Raba hiyaben fesi lahaboho fong watuk lit henele hi roho hunu sini ilihip. Hiren nunumba Milkom ulug wel turuk lahebon ino ap seliyonen ha roho walug lahup. Laruk lit at amingmingangge nabi men at iyabuk turukon ununuk suwon winon men ininggik lisoho og eneplug o winama imbisik lahup ane fahet hinindi nonghong uruken anggen ke la wam turuk latihip.

⁴Hit An nele ying naptuk lahebonen nungge fahet hiren, ’Tonggoma kinang seiyon fam welahe,’ uruk lahep? Nungge fahet hiren te, ’Mun angge man angge foroho lit ninine roho welahereg ap san nit apmayap nenebuhu?’ ulug hininggarehen wel taruk lahep?

⁵Ari uruk lahepma Anden o kema-keman ap seliyon henembeg mon enebik waruhukmu hit yuk lagmag uruk lamuhup. Ap seliyon arimanowen hit yanggaloho ilkal hisarukmu hit misig-misig linggik-longgo uhup halug ap misihen oho hit hiyako palu henebuhu fug.

⁶Fobik eneg Anden Amon inap arimano nin hebeloho fanowap enebuhuk ulug An HINIKNI Allahn nele uruk lahi.”

⁷ NINIKNI Allah pohol ha kinang ha senehon inowen Edom inap unubam teko lahu ane fahet ele irisiyon tu, ”O Edom inaben inindi anggat toho wenggeltuk ane eleg atisi ano? Mun ane man ane alem onoluk teg inaben komo eneptuk ane longgo irisi ano?

⁸Anden Edom inap hun Esau umbusagsi arimano unggum unubam werehon kong turuk lit angginon unubam umbuhuk. Ari fahet hit o Dedan hinap, nori, hit hunumbali Edom inap men ambiyeg siyag amuhup tohon folo-folo lalihipteg kiling elma hirag arik lalihip.

⁹Ap seliyon Edom inap iniyabuk anggur yatuk ambeg kuhupteg anggen tahan taruk lit misig oho umbusuk fug angge obog toho hilahup. Hubanggo yoholiyangge hilaruk inap enembeg waharuk lit mun angge man angge hulul peruk ane hikit toho wahup.

¹⁰Esau umbusagsi arimano hirag arik lahup angge famen Anden ap seliyon ininggikmu embemin ulug enehap inamap tuhukmu longgo uk fug teg lamuhup. Longgo uk fug tehen Edom inap obog toho unumalikisiyet onoriyet unumbaliyet ap seliyonen unusuhup.

¹¹Edom hinap nori, hit obog toho war amuhup angge re hunuhesi hunumalikisi lin isahubon arimano Anden fet enesug laruhuken ninggikmu umbuhup.

¹²An HINIKNI Allahn hit hunubam nele uruk lahiyon tu: Ap winon alem unubam elegman ik olokon Anden hinang isarikikon narusa angge famen nungge fahet hit alem hunubam weregman nul fug peruk lahep? Anden hit fahet nolok haruk lahireg hiren oho nahup.

¹³Anden nele tem toho uruk lit sali emberuk lahiyon tu: Hit hinibam pumbuk suwon Bozra ino halog toho lin uhumu aben yet halug enekolen homhombuk turuk lamuhup. Iren ap huluwap eneptuk lit, ’O Bozra siyag atisiyon hag amuhup,’ uruk lamuhup ane ariyen hit hininggaliyap heneptuk lamuhup. O pumbuk Bozra walinggoho werehon oho olun amuhupmu nin hebeloho wibuhup fug,” ulug NINIKNI Allahn ele irisi.

¹⁴Allahn nin ele urukmu holtikikon tu, ”Anden namingmingangge eke hiyag utuk lit, ’Edom inap men tog abuhuken palu arik wamuhup ulug ap o pumbuk obog toho hiyag isa lamihin,’ ulug monde ferikik.

¹⁵Hit Edom hinap nori, Anden o pumbuk obog toho palimuwap enebuhukteg hit enepma welamag ulug apmayap henebuhukmu ap obog tohowen hit hininggaliyap heneptuk lamuhup.

¹⁶Hit hinibam tom fam helep pun elma welahebon hinindimuwen, ’Nit tom yaron seneg laheyon fahet ap obog toho enekol haruk,’ ulug palimuwap taruk lit henele ying taruk lahep. Hit hinibam suwe tunguni inowen ei wituk hag toho tom ayegma wirigmu welahep angge famen Anden hit lisoho pilap henebik waruhuk,” ulug NINIKNI Allahn ele uruk.

¹⁷”Ap seliyonen o Edom kinang siyahap enebuhupmu ap kinang ari iraham ke larukonen amben siyag ulug enembiyang lat taruk lit ininggaliyap eneptuk lamuhup.

¹⁸Indam o Sodom Gomora men o pumbuk walinggoho welatfahon men siyahap enepfagma olun atfag hag toho o Edom kinang oho olun aruhu,” ulug NINIKNI Allahn ele il laruk lit,

¹⁹”Olomene olokon ohi ik Yordan horogman wilip atug wam endetuk ambeg kuruk hag toho An oho Edom inap arimano enepeleg toho weregman waharuk lit enengginangman yanggal enebuhukteg ap suwon Anden mumal tahukon ekeyen kinang ari seneg laruhun ulug lahabe fuhuk. Anden ari roho tuhuk hag toho ap ari rohon turukon eke wereg ano? Ap san alem nubam embemin perukon wereg ano? Ap suwon An apmayap nabukon kema wereg?

²⁰Ari fahet Anden Edom inap fahet kong toho emberuk lahiyon tu holeg lamek: Wam kumbi fam ililoho lit-lar isaruk hag toho it maliket inine eleg inabet ininggik lit-lar isil lahupmu ap obog toho yuk lagmag uhup.

²¹Edom inap arimano mako wamburuk lit tulungum turuken kinang yuk elek turuk laruhu. Iren siyag amul ulug enele ya nga uhubon ap ik Longgop ayegma werehonen oho hol hahup.

²²Ap seliyon arimano suwe tunguni aherabul wiriloho laruk hag toho wamuhupteg o pumbuk suwon Bozra siyahap turukmu Edom inap enehako roho turukon arimano hiyaben malik endebuk oho lit enekol haruk hag toho enekol haruk lamuhup.”

²³ NINIKNI Allahn o Damsyik inap fahet ele irisiyon tu, ”Ap seliyon waharuk urukmu hol halug o Hamat inap men Arpad inap men enekolen enemelmel toho wereg. Ap ik saho ahik ayegma werehon oho yuk lagmag uruk lit inindi yuwag am fug teg.

²⁴O Damsyik inap arimano hiyap maliken ahum narukmu akol haruk hag toho enekolen unuwag elek turuk. Eneliplip eneptuken inine eleg atukmu ap seliyon onolohotman linggik-longgo ul ulug inibam embeselug laruk.

²⁵O pumbuk suwon aben wel turukmu Anden oho nahiyeg toho wenggel haruk latikik ambeg ino ap enele teng uhup.

²⁶O Damsyik inap kabiniyon arimano unusuhupmu inibam owahalem ke waroho lin-lan uruk lamuhup. O ino sambil it sehen senehon misig oho oluk welaruhu fug ulug An HINIKNI Allah pohol ha kinang ha seneg lahiyonen nele uruk lahi.

²⁷Elehet o Damsyik walinggoho ohowon ino Anden harep pisaho fusuhukmu ap suwon Benhadad ibam o fanowon ino han nahu.”

²⁸O Kedar inap men Hazor inap onowesi suwon wal taneg werehon unumalikisi men Babilonia inap onowe suwon Nebukadnezar inowen apmayap enebuk fugmu NINIKNI Allahn it unubahet ele irisiyon tu, ”Babilonia hinap, nori, o Kedar inap yali fil lekma werehon arimano siyahap enebuhuben lahup!

²⁹Lahupteg henele hi roho, ’Siyahap henebul ulug waling henesug lahe,’ uhupteg inibam o sabo wirihon men enembohom kambing domba unta men mun angge man angge iren tohon hilahup,” ulug NINIKNI Allahn ele uruk.

³⁰”Babilonia inap onowe suwon inowen Hazor hinap apmayap enebik lahuk ulug kong toho emberisimu hit hinibam embeselug folo-folo lalihipteg owikmu hirag arik lalihip!

³¹Anden Babilonia inap hiyag isarikikon tu: Hazor inap arimano ap seliyonen siyahap nenebik waharuk eleg ulug elehet wa fug angge inindi yuwag toho weregman pikit inibam kuhupteg

³²enembohom unta kambing domba anggolo forohowon arimano hilahup. Hilahupmu ap unuwal oruk herehon arimano Anden yali fil, hubula fil, ik eleruk fil, ambut fil hik-hak isahukteg alem angginon eke hag eke hag o kema-keman unubam arik wamag ulug wol tuhuk ulug An HINIKNI Allahn uruk lahi.

³³O Hazor ino mondabi lekma hag aruhumu ap misig oho elegma olomene onolokon eneg welamuhup.”

³⁴Yehuda inap onowe Zedekia ket laharisi li NINIKNI Allah pohol ha kinang ha senehon inowen o Elam inap fahet an At amingmingangge nabi nubam ele irisiyon tu, ”O Elam inaben sehen seneg lit inine roho turuk angge famen Anden enesehen eneminggin tog fala rebesuhukmu inine eleg amuhup.

³⁶Inine eleg amuhupmu Anden yali filen, hubula filen, ik eleruk filen, ambut filen siyelu humon unubam monde fik waharuk lit Elam inap arimano mun ke man ke hik-hak isahuk. Hik-hak isahukmu Elam inap arimano o pumbuk munon-manon indit-indit werehon fam welamuhupmu o pumbuk Elam inap elehon eke welaruhu fug.

³⁷Anden Elam inap inine elehap enebuhukmu ap seliyon unusul ulug waharukon onolohotman enekol haruk lamuhup. Enekol harukmu An nundama ahe laharukon ari indok ambulpul hahon Elam inap arimano unubam hik isahukmu alem angginon eke hag eke hag unubam aruhu. Anden ap seliyon enembeg mon enebuhukmu karog fam unusul ulug mug eneplug larukmen eneg Elam inap obog toho unusuhup ulug An HINIKNI Allahn nele uruk lahi.

³⁸Elam inap onowe suwon men at let turukon ununuk suwon men Anden unusuhukteg it unubalma An ninggarehen o Elam kinang ino seneg laruhuken An lehoma heriyeg laruhuk ambeg o Elam kinangma unduhuk fuhuk.

³⁹Fobik Anden Elam inap arimano nin hebeloho fanowap enebuhuk ulug An HINIKNI Allahn nele uruk lahi.”