Read Angguruk Yali YEREMIA 5 Bible Online

YEREMIA 5 - Angguruk Yali bible

YEREMIA 5

¹NINIKNI Allahn ele urukon tu, ”Ele tem toho uruk lit fano ane eneg turuk ahun eke wereg ano ulug o Yerusalem pumbukmu owahalem ke men kalem laruk ke men yami ril aliyek! Ap ari hahon eke wereg halug siyag ane o Yerusalem inaben turuk latuson Anden nambolmaya fesehuk.

²Yerusalem inap arimanowen aben tem toho ehesa pukag ulug enele uruk lit, ’NINIKNI Allah oluk werehon unuk fam tem toho ehe,’ uruk angge famen enele si ane uruk.”

³We tem toho Hat NINIKNI Allahn enele wirik toho eneyeg umen uruk inap yami eneptuk lahen. Haren Yerusalem inap arimano unusuruk latikin angge famen ouk haruk latusa fug. Haren elehap enebuk hag ane unubam turuk latikin angge famen it inindi anggar atisi fug. It inindi helep arikon hag toho wereg lit Hat hambeg hebeloho waharukon fahet ninirim peruk.

⁴Ari roho turukmu an nindimuwen wenggel haruk lit, ”Ap arimano olma inap wereg lit inindi anggat teg elehen ari hag toho turuk. Iren NINIKNI Allahn fano peruk ane men, tuk teg ane fahet komo nenepfag ane men enepelehen sohu ane turuk,” perikik.

⁵Ari perikikteg, ”Ap suwon-suwon men nenele ulen enembeg lamin. It suwon-suwon arimanowen NINIKNI Allahn fano peruk ane men, tuk teg ane fahet komo nenepfag ane men onoluk,” ulug wenggel harikik. Wenggel harikik ane hikit toho enembeg larikikteg yet isarukmen it enebe mangno roho Allah Wene ari kumbi ilil nenesuhen holtuk lamuhuk fug ulug Hat NINIKNI Allah men hiliyap haptuk latusa.

⁶Ari fahet ap seliyonen Yerusalem inap arimano siyahap enebik waharuk. Wam eli hirahoman wilip atug wam senggel taruk hag toho unusik waharuk. Olomeneyen pak namin ulug lekman kahaleg hag toho ap seliyon arimanowen o pumbuk Yehuda kinangma werehon selma kahaleg lit ap o pumbukmuwen wilip atukon obog toho unusuruk. Yerusalem inap men Yehuda inap menen Allah enembol yig utuk lit siyag ane eneg til-wil laruk latusa ane fahet alem ari unubam atuk.

⁷Ari roho turukmu NINIKNI Allahn ele uruk lit, ”Nungge fahet siyag ane hiren turuk latikibon Anden nambolmayap tuhuk? Hit An numbahalug ap winonen nunumba ulug wel eneptukon alem elehon onombolim laruk lit it ununuk fam tem toho ihi uruk lahep. Anden mun angge man angge og hisarukmen eneg henehummu atuk latisi angge famen hiren An numbaharikipteg likiya hupmu hiyap yaying turukon inibam laruk lahep.

⁸Hit wam olombik fitlug uwali yami rurukon hag toho welahep. Wamen uwali yami ruruk lit ele nguk turuk hag toho hit obog tohowen honori unuhesi yami eneptuk lahep.

⁹Iren ari roho turukon Anden nambolmayap tuhuk ano? Anden ayeg waroho alem angginon unubam umbuhuk. An HINIKNI Allahn nele aru uruk lahi.

¹⁰Anggur yabuk iren tohon siyahap tilihiben aliyek! Lalihipteg kinang siyahap tuk fug angge hele anggur inggik eneg kong toho hik isalihip.

¹¹Israel inap men Yehuda inap menen we tem toho An nele ying naptuk ulug An HINIKNI Allahn uruk lahi,” irisi.

¹²Ap arimanowen NINIKNI Allah fahet awiya waruk lit, ”Hun ariyen nungge-nungge nunubam tuhu fug. Alem angginon nunubam aruhu fug. Ap seliyon tog abul ulug waharuk lamuhup fug. Suburu obok oho haruk lamuhuk fug.

¹³Allah ele hiyag nisaruk inap nabi arimano e inggila siyeluwen walug larukon hag amuhup. NINIKNI Allahn nungge-nungge hiyag isaruk elegman alem angginon hunubam aruhu ulug hiyag nisaruk. Alem hiyag nisarukon ino ininggareg unubam aruhu,” uruk latusa.

¹⁴Ari urusama NINIKNI Allah pohol ha kinang ha senehon inowen an nubam ele uruk lit, ”Ap arimanowen enele ari roho uruken An nawene indok ambulpul hag amag ulug hambilikmu umbuhukmu ap arimano e ilimon hag atukmu indoken han nahu,” ulug hiyag nitisi.

¹⁵Ari ulug hiyag nitisireg NINIKNI Allahn Israel inap unubam ele uruk lit, ”Ap seliyon aben apmayap enebuk fug tehon hit hunusik wamuhuben yatman wol eneptuk lahi. It unumbasi indam angge weregman eneg ketiya oho wereg. It enele hit henepelehon urukmu hiren holtuk lahep fug.

¹⁶Enesehen ele hum teg lit ap mag-mag nil laruken enembong se roho tog aptuk.

¹⁷It seliyonen mun angge man angge hiren tohon naruk lamuhup. Henengginangman wilip atuk angge men naruk angge hinibamen foroho lahebon men, hunumalikisi ap angge men hiyap angge men, henembohom sapi men domba men, hele anggur men e sawe men obog toho naruk lit hinibam pumbuk elehet yaron walinggoho ohowon hiren siyag aruhu fug peruk lahep ambeg arimano obog toho pin halog toho hunusil lahup.

¹⁸Itano li hunusil lahup angge famen Anden hit mondabi elehap henebuhuk fug. An HINIKNI Allahn nele uruk lahi,” ulug hiyag isarisi.

¹⁹Ari ulug hiyag isarisireg NINIKNI Allahn an nubam ele uruk lit, ”Ap arimanowen hat hubam, ’Nungge fahet NINIKNI Allahn alem ari nunubam tirisi,’ ulug kapal hiyahup halug haren hiyag isaruk lit, ’Hit henengginangma wereg lit Hinikni Allah embeselug ap winonen nunumbasi ulug wel eneptukon enemingmingangge atikip hag toho hit fobik o winama wereg lit ap o pumbuk winamon enemingmingangge amuhup,’ uhun,” ulug hiyag nitisi.

²⁰NINIKNI Allahn ele uruk lit, ”Yakub amloho Yehuda inowen ondohowonen ondohowon arimano hiyag isa lalihibon tu,

²¹’Hit hinindi anggat teg elehen sohu-sohu ane turuk lahebonen Allah ele urukon tu holeg lamek! Hinil wereg angge famen fum toho haruk lahep fug, hinisanggo wereg angge famen fuki roho holtuk lahep fug.

²²Hit An HINIKNI Allah nolohotman henekolen elek turuk lalepman fano. Anden ik saho ahik suwon inowen kinang obog toho hondo ruhu rohon ulug hili imbiyag. Hili ino mondabi welaruhu piyag ane hikit toho ik haglabut hum toho watuk lit aplohok tung turuk halug oho hili ino pisan isalug laharuk eleg angge famen

²³hit hununggul uwag arik tehen Anden komo heneptuk lahiyon pisan isaruk lit An numbahalug larikip.

²⁴Hit hinindimuwen wenggel haruk lit, ’Suburu ei uwan yabuk fugmu nit NINIKNI Allahn osit og nisaruk lit yahoma oho pilabik waharuk. Aren imbibag li itano suburu wirik atukmu niren yahal taruk lahe. NINIKNI Allahn ari obog toho turuken At fahet nenekol toho welamuhuk,’ perikip fug.

²⁵Hiren siyag ane turuk latikibon ari famen fano ane eke hag eke hag hunubam atukon eleg atisi.

²⁶We tem toho An numalikisi sehelimu ap onolok ane turukon wereg. Aben suwe hinimu sap teg hag toho iren oho ap senebul ulug sap enesug.

²⁷Suwe watuk inaben waroho walug inibam kilaptukmen eneg keleg atuk hag toho onolok inap inibam oho ap enele ying eneptuk lit enenggengge hilaruk angge arimanowen keleg teg. Ari roho turuk latusa ane ariyen tung inap atusareg

²⁸enebe fit taruk. Ap inindi enesug lam fug angge onolok ane eneg turuk. Alem ekeyon-ekeyon fano haloho umbuk fug angge ap inilaheg toho werehon men malik suwarehon men ili og eneptuk eleg.

²⁹Ap arimanowen ari roho turukon Anden nambolmayap tuhuk ano? Anden ayeg waroho alem angginon unubam umbuhuk. An HINIKNI Allahn nele uruk lahi.

³⁰Kinang tu famen aben amben mondabi siyahon eneg turuk.

³¹An nele hiyag isaruk inap nabi arimanowen enele si ane urukmu An nolohotma unduhuk inap imam arimano ininggarehen fano peruk ane hikit toho ap milal eneptuk. Amben siyahon eneg turuk angge famen An numalikisiyen fano peruk. Hiren amben siyahon eneg turuk lit weregman obog aruhu sambil ino nangginuhup?” irisi.