Read Angguruk Yali YEREMIA 50 Bible Online

YEREMIA 50 - Angguruk Yali bible

YEREMIA 50

¹ NINIKNI Allahn Babilonia inap men inibam o pumbuk suwon Babel men fahet an At amingmingangge nabi Yeremia feneyen ele irisiyon tu,

²”O Babel pin kurusa ulug ap o pumbuk obog toho hiyag isalihip! Babel inaben ninikni ulug wel turukon Merodakh inowen umalikisi windat eneptisi fugmu tu Allah hag toho wereg ulug wel eneptuk angge ap inindi siyahap eneptukon arimano obog toho halog toho lin-lan uruk ane ari hirahuk fug angge o kema-kema hiyag isil aliyek! Alem ari ap obog tohowen onoluk amag ulug enehangge yaho fiyek!

³Ap o pumbuk ik eleruk fil werehon wamuhupteg Babilonia kinang lekma hag tebehupmu abet wamet obog toho embeselug lahup ambeg ino ap misig oho welaruhu fug.

⁴O itano li Israel inap men Yehuda inap men ambiyeg inibam suhuloho waharuk lit NINIKNI Allah horogma welamuhuk ulug inindi ouk toho uba yatil waharuk lamuhup,” ulug NINIKNI Allahn ele uruk.

⁵”Tom Sion fam lul ulug kalemma laruk lit ke keyen lul ulug ap kapal isil laruk lamuhup. It-it enele uruk lit, ’NINIKNI Allah ambeg hebeloho lahuken maniyek! Aren te An men hit men nininggik ahandip toho mondabi welamuhuk ulug sali imbibahon ino nenepeleg am fug angge senegman eneg welamuhuk,’ il laruk.

⁶An numalikisi wam domba longgo urukon hag toho welatusa. It fet enesug inaben kalem hareyon hondog eneplug laruk lit tom eke famen eke fam larukmen it inibam enepeleg atisi.

⁷Wam longgo uruson arimano hiyag taruk latusa inaben sen eneptug naruk latusa. An numalikisi siyahap eneptuk inap arimanowen enele uruk lit, ’It unumbasiyen NINIKNI Allahn eneg ili og neneptuk ulug wenggel haruk latfag ahun inowen mun angge man angge eneseher angge og isaruk latisi angge famen iren At fahet ninirim ulug enembol yig utuk lit ininggarehen alem angginon unubamap taruk angge re niren unusuruk laheyon ari re siyag ane turuk lahe fug,’ uruk latusa.

⁸Hit ap pohon welahebon, o Babilonia kinangman linggik-longgo uhup! Hit wam kambing yuhambukon tam atukmu heyon unumalik ombolim laruk hag toho hit tam amuhupmu winon honombolim laruk lit ambiyeg wilip amuhup.

⁹Babilonia inap arimano unusukag ulug Anden ap o pumbuk anggolo ik eleruk fil werehon arimano wol enebuhukmu luhaloho waharuk lit o pumbuk Babel pin kuhup. Pin kuruk lit tog pising tik larukon hil tubuk fug angge unusul peruk inap obog toho unusuhup.

¹⁰Unusurukmu ap seliyon inindimuwen mun angge man angge Babilonia inaben tohon hulul puhubon huhulangge hilahup ulug An HINIKNI Allahn nele uruk lahi.

¹¹Hit Babilonia hinaben An numalikisi enenggengge huhulangge hilarikip ane fahet henehiyehen wam sapi umaliken hemet turuk hag toho hiren oho hemet turuk latikip. Wamen enele kat turuk hag toho henele henehiyeg toho uruk latikip.

¹²Ari turuk latikip angge famen henengginang hinisinga hahon mondabi lilog atuk lit lekma hag aruhumu hit o pumbuk winon enepma welamuhup.

¹³An nolok haruk lit kinang ino lilohap tuhukmu ap obog toho eleg amuhup. Eleg amuhupmu ap kinang ari iraham ke larukonen amben siyag ulug enembiyang lat taruk lit ininggaliyap eneptuk lamuhup.

¹⁴Hit sehen seneg lahebonen o pumbuk Babel pin halog toho unusuhuben waling enesug lamiyek! Babel inap arimanowen An HINIKNI Allah nele ying naptuk latusa ane fahet enebe anggolo unusilihiben hiren tog winon minggiroho umbuk fug angge pising-pasang isalihip!

¹⁵O Babel ino walinggoho kilap enesug lit ngik-ngog tiyek! Elehet o pumbuk ari huk toho ohowon men o yaron ap seliyon yet enesug ambeg arimano men halog toho wamburukmu Babel inap arimanowen nit ap seliyon ininggikmu ahe uruk. Iren siyag ane turuk latusa ane fahet NINIKNI Allahn hebeloho unusuhuk peruk ane hikir amag ulug hinindi isa fug angge unusiyek! Babel inap ininggarehen onolok ane ap unubam turuk latusa hag toho hiren oho it unubam tiyek!

¹⁶Ap suburu yatukon men yahaltukon men Babilonia kinangman elehap enebuhup! Hit ap pohon welahebon, nir oho nunusuhup tohon ulug kinang ari embeselug hinibam wal taneg aliyek!

¹⁷An numalikisi Israel inap arimano wam olomeneyen mug eneplug larukmu linggik-longgo urukon hag toho welatusa. Ari roho weregma tam Asyur inap onowe suwon inowen sen eneptisireg narisimu fobik Babilonia inap onowe suwon Nebukadnezar inowen unuwag kehebo roho narisi.

¹⁸Ari fahet An Israel inap INIKNI Allah pohol ha kinang ha seneg lahiyonen nele uruk lahiyon tu: Anden Asyur inap onowe suwon ino ayeg ware ferikik hag toho Babilonia inap onowe suwon men angginang men oho ayeg waroho siyahap tuhuk.

¹⁹Ari tuhukteg Anden Israel inap arimano aben enembohom og eneplug laruk hag toho kinang fanoma kel tawag ulug hondog eneplug lahukmu hoholangge anggolo wereg ambeg tom Karmel fam, kinang Basan fam, tom Efraim fam oho kinang Gilead fam oho wereg lit enehum ouk toho naruk lamuhup.

²⁰O itano li numalikisi Anden unusuruk lit enebe we tor angge embeserikikon arimano alem unubam werehon nambolmaya fesehuk. Nambolmaya fesehukmu aben Israel inap men Yehuda inap men unggum unubam wereg ano ulug yami ruruk lamuhup angge famen hiyahakup fug,” ulug NINIKNI Allahn ele irisi.

²¹Ari irisireg NINIKNI Allahn nin ele uruk lit, ”Kinang Merataim ilmig tahuben wilip amek! O pumbuk Pekod inap men tog abuhuben aliyek! Ap arimano obog toho unusuhupmu mondabi eleg amuhup! Anden hiyag hisaruk lahiyon ari suhan isa fug angge hikit toho eneg tuhup!” ulug NINIKNI Allahn ele irisi.

²²Aben tog aptuk lit enele ngik-ngog urukon hol hemek! Mun angge man angge kinang tu fam werehon halog toho siyag atuk.

²³Hit Babilonia hinap welahebon helep simbuk ineyon hag toho wereg lit ap o pumbuk obog toho arap toho ilkal tebeseruk latikip angge famen ketiya hit hininggareg arap toho hunusuruk. Hit arap toho hunusuruson yet hisaruk lit ap o pumbuk kema-kema werehon enekolen yug lagmag uruk.

²⁴NINIKNI Allahn ele urukon tu, ”Hit Babilonia hinap yebangge elma kukag ulug yep tirikikmu henepeleg toho larukmen elma huhur atikip. Huhur atikipmu Anden sen heneptikikteg nungge fahet An HINIKNI Allah nele ying naptuk latikip ulug alem hunubam emberuk lahi.

²⁵An HINIKNI Allah pohol ha kinang ha seneg lahiyonen nindimu nolok haruk lahireg ap unusuruk angge foroho lahi ambehen An nasehen warikikteg sehen tu fam o Babilonia inap unusuhuken wep toho seneg lahi.

²⁶Hit o kema-kema yat ke welahebon oho Babilonia inap unusuhuben wamuhup! Wamuhupteg mun angge man angge Babilonia inaben tohon foroho ambehen wili felug andog toho umbuhupteg obog toho elehap tuhupmu tor angge oho welaruhu fug.

²⁷Babilonia inaben siyag ane turuk latuson fahet ayeg waroho unusuruk sambil inam ahama wam unusuruk hag toho obog toho unusilihip.”

²⁸Holeg lamek! Ap nonoluk welamulen linggik-longgo ul ulug Babilonia kinang embeselug laruk lit tom Sion fam wahasareg ap hiyag isaruk lit, ”Babilonia inaben Allah ibam siyahap turusa ane fahet nit NINIKNI Allahn hebeloho unusuruk,” ulug hiyag isaruk.

²⁹Ap sehen senehon obog toho wamuhuben wol enebiyok! O pumbuk Babel famen ap misig oho koloweg wilip aruhu rohon ulug walinggoho kilap enebuhup. Babel inap ininggarehen onolok ane ap unubam turuk latusa hag toho hiren oho it unubam tuhup! Iren winik-wonog angge ruruk lit Israel ninap NINIKNI Allah ebe usa fulu rehon ele ying turuk latusa ane fahet hebeloho unusuhup!

³⁰NINIKNI Allahn ele urukon tu, ”O ino sambil Babel inap kabiniyon arimano obog toho inibam owahalem ke waroho lin-lan uruk lamuhup.

³¹Hit hunubabut hemet til laruk lahebon, Anden hit men seliyap heneptuk lahi ulug An HINIKNI Allah pohol ha kinang ha seneg lahiyonen nele uruk lahi. Anden hit hunubam alem angginon umbuhuk perikik sambil inam aha.

³²Hit winik-wonog angge ruruk lahebon fuk toho kinangma ying amuhupmu ap let heneptukon elehen henemu in am fug teg lamuhup. O pumbuk hit hinibam Babel walinggoho werehon arimano Anden harep pisaho fusuhukmu kinang walinggoho werehon obog toho nahu.

³³An HINIKNI Allah pohol ha kinang ha seneg lahiyonen nele uruk lahiyon tu: Israel inap men Yehuda inap men ap seliyonen apmayap eneptusareg ininggik hele waroho hondog eneplug o winama imbisik larusareg hinibam lalihip ulug hiyag isa fug angge inine roho sen enesug angge famen

³⁴An nunuk NINIKNI Allah pohol ha kinang ha seneg nahun suwaleg lahiyonen nine roho turuk lit numalikisi windat enebuhuk. Anden ili og eneptuk lit alem unubam emberuson haloho umbuhuk. Ari roho turuk lit ap kinang atogman atogma werehon inindi yuwahap enebuhuk, we Babilonia inap eneg Anden enekolap eneptuk laruhuk.

³⁵An HINIKNI Allahn nele uruk lahiyon tu: Babilonia inap onowesiyet ap inindi anggat tehonet karohen unusukag!

³⁶Babilonia inap unubam teko lahu ane fahet fulu roho hiyag isaruk inap war amag! Unusul ulug turukmu yet isaruk anggeyen sohu-sohu ane turukon arimano siyag amag! It enembong se roho turukon sehenen unusukag! Unusurukmu yuk lagmag ulug war amag!

³⁷Enembohom kuda oho unusuruk lit wam kudan lisoho walug laruk angge kereta halog toho siyahap tukag! Ap pohon onggo fahet it men tog aptukon yahayen unusukag! Unusurukmu hiyaben enekol haruk hag toho enemelmel toho wereg lit war amag! Mun angge man angge forohowon arimano ap seliyonen huhulangge hilawag!

³⁸Babilonia kinang ino tu Allah hag toho wereg ulug laltuk anggeyen keleg teg. Laltuk angge amben siyahon turukon arimanowen ap inindi sohuwap eneptuk. Ari fahet ik obog toho firig amag! Babilonia kinang atogman atogma lilog amag!

³⁹Babilonia kinangma ap welamuhup fugmu fobik oho olomene men suwe kohoni men eneg welamuhup.

⁴⁰Indam Anden o Sodom Gomora men o pumbuk walinggoho welatfahon men siyahap tiyagma olun atfag hag toho o Babilonia kinang oho olun eneg aruhu ulug An HINIKNI Allahn uruk lahi.

⁴¹Yet homok! Ap ununggul unuk eke ik eleruk filen waharuk. Ap o pumbuk suwon onowesi men kinang atog filen enebe luhaloho waharuk.

⁴²It arimano ininggikmu minggin tog men fit men seneko waharuk lit ap inindi isa fug angge yuhun angge unusuruk. Ik humon aplohok mi-mi angge ril wirig atuk hag toho ngik-ngog til waharuk. Tog silimu kul ulug sum, sing, sehen wep toho wam kuda fam lahalug hit o Babel hinap welahebon pin hunusuk oho waharuk.

⁴³It seliyon waharuk urukon Babel inap onowe suwon inowen holtisireg inggik ine eleg atisi. Akolen amelmel toho wereg lit hiyap malik indag tamin ulug tanggusi narukmu ouk waruk hag toho ubam atisi.

⁴⁴Olomene olokon eke ohi ik Yordan horogman wilip atug wam endetuk ambeg kuruk hag toho An oho Babilonia inap arimano enepeleg toho weregman waharuk lit enengginangman yanggal enebuhukteg ap suwon Anden mumal tahukon ekeyen kinang ari seneg laruhun ulug lahabe fuhuk. Anden ari roho tuhuk hag toho ap ari rohon turukon eke wereg ano? Ap san alem nubam embemin perukon wereg ano? Ap suwon An apmayap nabukon kema wereg?

⁴⁵Ari fahet An HINIKNI Allahn Babilonia inap fahet kong toho emberuk lahiyon tu holeg lamek: Wam kumbi fam ililoho lit-lar isaruk hag toho maliket inine eleg inabet ininggik lit-lar isil lahupmu ap obog toho lagmag uhup.

⁴⁶O Babel aben pin hi halog ane unusurusa ulug aben enele hi roho uhup ane ariyen kinang yuk elek turuk laruhu. Iren siyag amul ulug enele ya nga uhubon ap o pumbuk kema-kema werehonen hol isahup.”