Read Angguruk Yali YEREMIA 51 Bible Online

YEREMIA 51 - Angguruk Yali bible

YEREMIA 51

¹NINIKNI Allahn ele urukon tu, ”An nele ying naptukon Babel inap arimano siyahap enebukag ulug Anden siyelu humon eke monde fuhuk.

²Ap o winamon Anden mon enebuhukmu wamuhupteg Babel inap obog toho yanggal enebuhupmu homhomowen indok abulolo fu isarukmu longgo uruk hag toho longgo uhup. O Babel siyag aruhu sambil horog aruhumu ap seliyon arimanowen pin halog toho unusul ulug walinggoho kilap enesug lamuhup.

³Kilap enesugmu Anden hiyag isaruk lit, ’Babel inaben tohen nunusuhup tohon ulug henemumuwen yet teg lamok! Sing wan toho tog aptuk lit hit apmayap henebuhup tohon ulug hunubam anggat toho welamuhup! Ap kabiniyon sehen senehon hinindi isa fug angge obog toho unusilihip,’ ulug hiyag isahuk.

⁴Babel inap pinggi unusuhubon arimano o Babilonia kinangma lin-lan uruk lamuhup. Tog sinat unusuhubon arimano kalemma yinggig lamuhup.

⁵An Israel inap INIKNI Allah nebe usa fulu reg lahiyon nele ying naptuk ane ariyen Babilonia kinang keleg tehen alem angginon ari unubam aruhu. We tem toho An pohol ha kinang ha seneg lahi nahun Israel inap Yehuda inap INIKNI welahiyonen numalikisi ulug umbusuhuk fug.

⁶Ari fahet hit Israel hinap, Yehuda hinap welahebon, nori, Babilonia inaben siyag ane turuk latuson fahet hebeloho aben unusuruk lamuhup halug hit it men ambiyeg war amuhuk tohon ulug it enengginang embeselug linggik-longgo uhup! Iren onolok ane turuk latuson fahet An HINIKNI Allahn ayeg wat isahuk sambil horog teg.

⁷O Babel ino ikag ik olokon kubag emas umbagpag turukon fam hinanggohon hag toho weregma An HINIKNI Allah ninggiken seneg latikik. Ik olokon ino ap obog tohowen nawag ulug o Babel inap arimanowen hinang isil larusama ap kinang atogman atogma werehon arimano narusareg nenek turuk latusa.

⁸Ari roho turukmen keman wahileg keman wahileg o Babel ino pin halog toho siyahap turusa. Siyahap turuson fahet hunu sini iyek! Nin hebeloho fano aruhu ano ulug ouk hihituk angge walug maniyek ulug Anden ap wol eneptikik angge famen

⁹iren enele uruk lit, ’Niren o Babel ino hihibul ulug wal harukuk angge famen fano atisi fug. Alem angginon eke hag eke hag unubam atuk latisiyon arimano kinangman keleg il poholma laharisimu nin hebeloho fano amuhup fug. Fano am fug tehen nit o Babel embeselug ninibam wal taneg lul,’ uruk.

¹⁰Ari urukmu hol hahupteg An numalikisiyen enele uruk lit, ’NINIKNI Allahn alem nunubam werehon ino haloho emberisimu NINIKNIYEN nunubam tirisi ane ari tom Sion famen ap hiyag isahuken lul,’ uruk lamuhup.”

¹¹Babilonia inaben An nibam siyahap turusa ane fahet An HINIKNI Allahn hebeloho unusuhuk perisi ane hikit toho o Babel pin halog toho unusuhup ulug o Media inap onowesi inindi kahal eneptuk latisi. Kahal eneptuk latisimu Media inap onowesi arimanowen unumalikisi hiyag isaruk lit, ”Sing wan turuk lit tog ambiyang mohok toho emberuk lamek!

¹²Elehet o Babel walinggoho ohowon halog toho kulen enehangge leho fiyek! Ap anggolowen elehet aru walinggoho kilabeg lamusan hiyag esemek! Ap seliyon sap enesug ambeg lalihip iyek! Huhelma kahal enebik lalusan ap hiyag isalihip,” uruk. We tem toho NINIKNI Allahn o Babel inap unusuhuk perisi ane hikirap turuk.

¹³Hit Babel hinap hinibam ik eleruk fulok-falok toho wilip atuk ambeg weregma mun angge man angge hilaruk lit tung atikip angge famen hit mondabi eleg amuhup li horog teg!

¹⁴Horog tegma NINIKNI Allah pohol ha kinang ha senehon inowen ele uruk lit, ”An noluk welahiyonen nele tem toho uruk lahiyon tu: Anden ap seliyon inini hag toho mon enebuhukmu henembeg wamuhupteg apmayap heneptuk lit, ’Palimu ahe,’ ulug enele ngik-ngog uruk lamuhup,” uruk.

¹⁵NINIKNI Allah ineyon inowen kinang obog toho wal tibag. At eneg indi anggat teg lit kinang yuk tuhu rohon ulug ineyap tibag. At eneg mun ane man ane oluk teg lit pohol leho fibag.

¹⁶At ele urukmu ululu sipuk toho poholman osit wambik waharuk. Kinang atogman hina hondoko lahik waharuk lit lebeglu osit warik ohoma lebeg tukag ulug monde feruk. Homhomo poholman fu rukag ulug hiyag utuk.

¹⁷Ap kinangmon obog toho inindi anggat teg eleg lit mun ane man ane alem obog toho fahet wenggel ha fug teg. Tu Allah hag toho wereg ulug laltuk inap arimanowen ininggali haruk lamuhup. Ininggiken laltuk angge sat elehen nungge-nungge tuk fug teg.

¹⁸Usangge arimano alem wereg eleg ulug aben inda yag eneptuk. Allahn alem obog toho haloho umbuhu sambil mondabi eleg amuhup.

¹⁹Israel inap INIKNI Allah ari hag toho wereg eleg. Aren mun angge man angge wal tibag. At unuk NINIKNI Allah pohol ha kinang ha senehon suwaleg. Aren Israel inap An numalikisi welamuhup ulug mumal enepfag.

²⁰NINIKNI Allah inowen ele uruk lit, ”Hit Babilonia hinap helep simbuk ineyon hag toho wereg lit An fahet o kema-kema tog abik laruk lamuhup ulug hunumbaharikik. Hit feneyen Anden ap ununggul unuk wal taneg werehon onowesi men arap toho ilkal isaruk latikik.

²¹Hit feneyen Anden wam kuda men wam kuda fam lahalug laruk inap men arap toho ilkal isaruk latikik. Hit feneyen Anden wam kudan lisoho walug laruk angge kereta men ap kereta fam lahalug larukon men arap toho ilkal isaruk latikik.

²²Hit feneyen Anden ap men hiyap men arap toho ilkal isaruk latikik. Hit feneyen Anden ap sabalon men malik fuwon men arap toho ilkal isaruk latikik. Hit feneyen Anden ap kabiniyon men hiyap tuhumon men arap toho ilkal isaruk latikik.

²³Hit feneyen Anden wam foroho inap men enembohom men arap toho ilkal isaruk latikik. Hit feneyen Anden yabuk wituk inap men enembohom kinang habultuk angge lisoho walug larukon men arap toho ilkal isaruk latikik. Hit feneyen Anden ap fet enesuhon men onowesi roho werehon men arap toho ilkal isaruk latikik angge famen ketiya An HINIKNI Allahn nele uruk lahiyon tu:

²⁴Babilonia inaben o Yerusalem siyahap turusama Anden hit Israel hinap hiniline it arimano ayeg waroho unusuhuk.

²⁵Hit Babel hinap tom yaron hag toho wereg lit kinang hit henepma werehon obog toho siyahap tirikipmu Anden hit men seliyap heneptuk lahi ulug An HINIKNI Allahn uruk lahi. An ninggik ineyonen hit hininggik lisoho tom atelman hik hisa wambuhuk. Kinangma wambuhupmu Anden hit indokma yal henebuhuk ambeg ul ino tom yaron hag toho lahaku.

²⁶Mun angge man angge hit henengginangma werehon arimano ul hag aruhumu elehet waruk inaben helep yami ril larukmen hit henengginangma misig oho weregma hiyahakup fug ulug An HINIKNI Allahn uruk lahi.

²⁷Ap o pumbuk kema-kema werehonen holukag ulug pinggong ele hum toho watil aliyek! Babel inap men tog abuhuk ulug ap obog tohowen onoluk aruhuwen enehangge yaho fiyek! Allah fahet tog abuhuben hunubabut haloho welamuhup ulug o kema-kema hiyag isil lalihip! O Ararat inap, Mini inap, Askenas inap onowesi suwon men hit men ambiyeg lahuben wol enebiyok! Ap sehen senehon milal eneptuk lamuhup inap in eneplihip! Heren sunggabi ayeg olokon winag isa fug teg hag toho wam kuda fam lahalug laruk inap anggolo roho palu enebiyok!

²⁸Allah unuk fam tog abik lahuk ulug Media inap onowesi suwon men, it let eneptuk inap ununuk suwon men, unumalikisi milal eneptuk inap men wol enebik lalihip! Ap o pumbuk obog toho Media inaben sen enesuhon arimano oho tog elma wamag!

²⁹An HINIKNI Allah nindimuwen wenggel haruk lit Babilonia kinang obog toho lekma hag aruhumu ap misig oho welaruhu fug perikik ane ketiya hikirap turuk lahi. Ari fahet o mek turuk lit kinang obog toho yuk turuk.

³⁰Babel inap enehako roho turuk latuson arimano hiyap inine elehon hag toho atusareg tog aptuk ane embeselug elehet yaron huk toho kilabeg ambeg hirag arik larusa. It inibam pumbuk arimano ap seliyonen pin halog toho kuruk lit harep pisako siyahap turusa.

³¹Babilonia inap onowe suwon ambeg ap eke wam eke wam turuk lit, ’Ap seliyon yali filen, hubula filen, ik eleruk filen, ambut filen o Babel walinggoho pik kik wahasa.

³²Ik paloho nindig atuk ambeg arimano oho ilmig tehesa. Elehet yaron wirig ambeg arimano harep pisako siyahap tehesama nonori sehen senehon arimano enekolen hirimuruk turuk,’ ulug hiyag utuk.

³³An Israel hinap HINIKNI Allah pohol ha kinang ha seneg lahiyonen nele uruk lahiyon tu: O Babel ino aben roti anggen waruk ambeg kinang ine amag ulug unuyuhen soptukon hag toho wereg. We tot welamuhupmu ap seliyonen Babel inap arimano unuyuhen sobit-sabar isalug apmayap enebuhup.”

³⁴Yerusalem inaben enele uruk lit, ”Babilonia inap onowe suwon Nebukadnezar inowen pisanggo mulan naruk hag toho nit mag-mag pil nisarisi. Aren unduk fano angge niren foroho latukukon ahum ouk toho narisi. Obog toho narisireg aben hali inggila tuwaloho suburu emberukon obog toho nalug inggila hik isaruk hag toho nit miyaloho hik nisarisi.

³⁵Aren nit nunusurukmu nenemep wambirisiyon ino o Babilonia inap unubam amag!” uruk.

³⁶Ari fahet NINIKNI Allahn Yerusalem inap unubam ele urukon tu, ”Anden alem hunubam werehon ino haloho umbuhuk. Babilonia inaben hit siyahap heneptusa ane fahet Anden ayeg wat isaruk lit enehik suwon oho ik eleruk fululuk-falalak wilip atuk ambeg oho firihap tuhuk.

³⁷O Babel ino halog toho oluna fesehupmu ap eleg amuhup ambeg ino olomene ibam aruhu. O ino ap winonen yet halug enekolen yuk lagmag uruk lit wasubag sup toho ininggaliyap eneptuk lamuhup.

³⁸Ketiya Babilonia inaben olomene olokonen hilak turuk hag toho enele hum toho uruk.

³⁹Iren suburu oboken nila puhup li Anden seni isag isahukteg it nenek turuk lamag ulug ik olokon hinang isahukmu iren nalug enehiyehen inda yatukmen eneg noho inilen nohoruk lamuhup. Nohoruk lit weregman eneg nin hebeloho in atuk lamuhup fug ulug An HINIKNI Allahn nele uruk lahi.

⁴⁰Anden Babilonia inap arimano wam domba umalik wabul ulug walug laruk hag toho unusuhup ambeg ininggik lisoho imbisik lahuk.

⁴¹Indam o pumbuk Babel unuk ino kinang atogman atogma aben palimuwap turuk latusa angge famen ketiya ap seliyonen pin hi halog ane unusurusama yet isarukmen ap o pumbuk kema-kema werehonen enekolen yug lagmag uruk.

⁴²Ik haglabut hum toho watil waharuk lit kinang ahakoma lahalug o pumbuk Babel obog toho hondo ririsi.

⁴³O pumbuk walinggoho werehon arimano oho aben halog toho oluna feserusama lekma hag atisi. Lekma hag atisimu ap enele teng urusa ambeg ino ap misig oho laruk eleg.

⁴⁴Babel inaben ninikni ulug wel turukon Bel inowen pil-pil naruk latisi angge arimano Anden ambilikmuwen taluk toho hilahukteg At wel turuk ane elehap tuhuk. Elehap tuhukmu ap o pumbuk kema-kema werehonen Bel wel tul ulug ambeg waharuk lamuhup fug. O Babel walinggoho elehet oko kilabehon ino oho ap seliyonen halog turusama

⁴⁵hit An numalikisi welahebon o pumbuk ariyen wilip amiyek! Anden nolok haruk lit o Babel ino siyahap timin peruk lahireg nir oho war ahe ha nowen ulug o ari embeselug linggik-longgo ilihip!

⁴⁶Hit Israel hinap henekol ha fug! Aben enele uruk lit o Babilonia kinang aru fam alem angginon tu men ari men teko laha ulug it-it enele urukmu hol hahup halug yuk lagmag uhup fug. Mo ilig am wirig am turukmu aben sibiling-sibiling ane eke hag eke hag uruk. Aben onolok ane til-wil larukon men ap suwon it-it wat-war atukon men fahet enele urukmu holtuk lamuhup angge famen hit hinindi anggin toho welamuhup fug!

⁴⁷We tem toho Anden Babilonia inaben nunumbasi ulug laltusa angge arimano siyahap tuhuk sambil horog aruhu. O ino sambil Babilonia kinang obog toho siyag aruhumu o kema-kema ap waroho lin-lan uruk lamuhup.

⁴⁸Ap o pumbuk suwon ik eleruk fil werehon arimanowen o Babilonia kinang siyahap tik waharuk ulug poholma werehon men kinangma werehon menen sini yunggultuk lamuhup. An HINIKNI Allahn nele aru uruk lahi.

⁴⁹Babilonia inaben kinang atogman atogma ap anggolo unusuruk latusa hag toho ketiya Israel inap unusuruson fahet ap seliyonen Babilonia inap mulangge unusuruk lamuhup.

⁵⁰Hit Israel hinap honoluk welahebon, aben hunusul ulug turukmu koloweg wilip atikibon, hit hinibam Yerusalem yatma wereg angge famen An HINIKNI Allah fam wenggel haruk lit Yerusalem fahet henepeleg am fug angge welamuhup! Ari fahet musun tuk fug angge folo-folo Babilonia kinang embeselug hinibam lalihip!

⁵¹Hiren henele uruk lit, ’NINIKNI Allah ibam ap saplangge kuk fug teg angge famen o winama inap kurusama ap o pumbuk kema-kema werehonen hol harusareg nit nininggaliyap neneptuken kunuk atuk lahe,’ uruk lahep angge famen

⁵²we tem toho Anden Babilonia inaben nunumbasi ulug laltusa angge arimano siyahap tuhuk sambil horog aruhu. O ino sambil aben unusurukmu war atuk lahe ulug enele ya nga uruk ane ariyen kinang obog toho hondo reg laruhu.

⁵³O Babel ino poholma ap lahuk fug teg ambeg hirag arik lahalep halug oho ap seliyon Anden wol enepleyon at ambeg lahalepteg siyahap telep ulug An HINIKNI Allahn uruk lahi.

⁵⁴Holeg lamek! Mun angge man angge Babilonia kinangma werehon halog toho siyag atuken aben enele ya nga uruk.

⁵⁵An HINIKNI Allahn o Babel siyahap turuk lit enele hi-hemet toho uruk ane elehap turuk lahi. Ik haglabut ine roho watil waharuk lit aplohok hum toho turuk hag toho

⁵⁶ap seliyon wamuhupteg o Babel pin halog toho oluna fesehup. Oluna feseruk lit Babel inap sehen senehon arimano sen enebuhupteg enesehen fala roho hik isahup. We tem toho An HINIKNI Allah aben siyag ane turukon fahet ayeg wat eneptuk lahi nahunen Babel inap arimano hebeloho unusuhuk.

⁵⁷Babel inap onowesi inindi anggat tehon men, it let eneptukon ununuk suwon men, sehen senehon men, it milal eneptukon menen nenek turuk lamag ulug Anden ik olokon hinang isahukmu iren nahupteg noho inilen nohoruk lamuhup. Nohoruk lit weregman eneg nin hebeloho in amuhup fug. An suwon HINIKNI Allah pohol ha kinang ha seneg nahun suwaleg lahiyonen nele aru uruk lahi.

⁵⁸Elehet ineyon o Babel walinggoho ohowon ino ap seliyonen lilibug-lalabug toho lin isahup. Ap o pumbuk kema-kema werehonen lisag toho yabuk eke hag eke hag turukon ambiyangma mun angge man angge iren witukon indoken nahu. Iniyabuk saplangge witukmen eneg inine eleg atuk.”

⁵⁹Hun Zedekia inowen Yehuda inap fet enesugmen eneg mo uhan atisimu o Babel larisi. Kalemma laruk lit suburu naruk ane men nohoruk ane men hun Mahseya umbusag, Neria amloho Seraya inowen haltuk latisi. It uwan la fugmu an Allah amingmingangge nabi Yeremian o Babel alem angginon ubam aruhu irikik ane obog toho suwesingga fam haharoho emberikik. Haharoho emberikikon ino anden hun Seraya og itmin ulug hiyag utuk lit,

⁶⁰

⁶¹”Hat o Babel lahunteg aben holukag ulug suwesingga aru kim halug anden haharoho emberikik ane obog toho hiyag isahun.

⁶²Hiyag isahunteg nin hele uruk lit, ’NINIKNI Allah, Haren hele uruk lit Anden o pumbuk aru siyahap tuhukmu abet wamet obog toho eleg amuhupmu lekma hag toho weregman eneg welaruhu irikin,’ uhun.

⁶³Ari obog toho uhunteg helep eke hele pug toho suwesingga aru fam ilili fuhunteg ik Efrat ikma hik isahun.

⁶⁴Hik isahunteg hele uruk lit, ’Suwesingga aru ik ahummu ubuk ehek hag toho o Babel aru oho ik ahummu ubuk uhureg nin hebeloho lahik waruhu fug. NINIKNI Allahn o Babel aru alem angginon ubam monde fik waruhumu mondabi siyag aruhu,’ uhun,” ulug hiyag itikik. An Yeremian nele uruk latikikon we ita.