Read Angguruk Yali YEREMIA 6 Bible Online

YEREMIA 6 - Angguruk Yali bible

YEREMIA 6

¹Benyamin hinap, nori, o Yerusalem embeselug linggik-longgo iyek! Ap seliyon waharuk ulug o Tekoa inowen pinggong ele hum toho wariyek! O Bet-Kerem inowen hubu lahabiyek! Ik eleruk filen ap seliyonen o pumbuk obog toho pin halog toho unusil waharuk.

²Tom Sion o Yerusalem werehon ino wam foroho ambeg fanowon hag toho wereg angge famen NINIKNI Allahn o ino mondabi siyahap tuhu.

³Ap o kema-kema werehonen enembohom og eneplug waharuk lit Yerusalem walinggoho o sabo wiroho weregma enembohomen kinang wal taneg waruk.

⁴It arimano winonen enele uruk lit, ”O unukoho tog abulen luk ohon!” urukmu winonen hebeloho, ”Yihi, mo lahareg ubuk uruken la fug teg lahe,” uruk.

⁵Ari urukmu ekeyen, ”Ari halug, hubanggo in amulteg inibam fanik-fanowon arimano halog tik lul,” uruk.

⁶Ap seliyon arimano NINIKNI Allah pohol ha kinang ha senehon inowen hiyag isarukon tu, ”E o pumbukmu walinggoho werehon obog toho mubuhupteg o ino kul ulug elehet fene pila ril lahiyek! O pumbuk ariyen onolok ane eneg turuken siyag amag.

⁷Ik eleruk wiliptukmen eneg wereg hag toho o pumbuk ariyen oho onolok ane wiliptukmen eneg wereg. Anden hol harukmen Yerusalem inaben yik aptuk lit ap unusurukmen eneg wereg. Anden yet isarukmen likiya hupmu ap yowil toho unusuruken o ino ouk warukonen keleg teg,” uruk.

⁸Allahn Yerusalem inap hiyag isarukon tu, ”Anden nambol yig hisaruk lit hinibam halog toho oluna fusuhukmu ap enele teng uhup tohon Anden komo heneptuk lahi ane holiyok!” uruk.

⁹NINIKNI Allah pohol ha kinang ha senehon inowen an nubam ele uruk lit, ”Anggur anggen tahantuk lit we tor angge yabukmu embeserukon fobik tahanik laruk hag toho Israel inap unusuruk lit we tor angge embeseruson arimano fobik elehap enebuhuk ulug wamuhup. Uwan wam fugmu aben anggur anggen embeserukukon eke wereg ano ulug nin hebeloho yabukmu lalug hele inggila sehelimu yami ruruk hag toho haren Israel inap we tor angge embeseruson windat enepmin ulug nin hebeloho yet isa lahun,” ulug hiyag nitisi.

¹⁰Hiyag nitisimu anden hebeloho At ubam nele uruk lit, ”Ap sa ubam nele uruk lit komo rimin? San an nele hol niyahu? Inisanggo lareg lit holuk fug teg. Nungge fahet Wene fam pet neneptuk ulug Hat hele fahet ninirim peruk.

¹¹Haren holok haruk ane an nubam pilabik waharuk lit nundama keleg teg angge famen ap unubam nele olok toho imin fug ulug nundama forohoman eneg nine eleg atisi,” uruk lahi. Ari urukmu NINIKNI Allahn an nubam ele uruk lit, ”An nolok haruk lahi ane hat feneyen ap sabalon war atuk ane horog toho werehon men ap kabiniyon palu roho werehon men malik toron owahalem ke werehon men unubam aruhu. Abet hiyabet obog toho ininggik hele waroho og eneplug o winama imbisik lahup.

¹²Imbisik lahupmu inibam men iniyabuk men unuhesi men ap winon ininggikmu amuhup. An ninggik ineyonen we tem toho ap kinang tu fam werehon siyahap enebuhuk ulug An HINIKNI Allahn uruk lahi.

¹³Ap suwonet toronet nininggikmu anggolo welalep ulug ap enenggengge hilil laruk. An namingmingangge nabi men imam menen An numalikisi un ane hiyag isaruk.

¹⁴Numalikisi unusurusama yowil tehon arimano hihit enebuk fug angge it unubam, ’Hayen-a, fano amuhup,’ ulug hiyag isaruk angge famen fano amuhup fug.

¹⁵Iren amben mondabi siyahon turukon fahet ininggali helep angge famen ininggali haruk ane enepeleg atuken enembong se roho wereg. Werehen Anden alem unubam umbuhuk sambil onori Israel inap winon men ambiyeg mako wambuhup ulug An HINIKNI Allahn uruk lahi,” irisi.

¹⁶ NINIKNI Allah ele uruk lit, ”Tam laruk latikip ke arimano suhuloho yet ha lahup! Yet ha lahupteg la reg halug ke ari lahup! Kebunggalem fanowon ari lahup halug hinindi yuwag toho welamuhup ulug hiyag isaruk latikik angge famen iren te, ’Nit ke ari lul fug,’ uruk latusa.

¹⁷Nin Anden te alem angginon unubam aruhu rohon fano roho kahaleg lamuhup ulug ap in eneptuk latikik. In eneptuk lit Israel inap unubam, ’Ap kahaleg inap arimanowen waruk ele hi roho teltuk lamuhup halug fano roho holeg lamuhup,’ ulug hiyag isarikik angge famen iren te holtul fug ulug wenggel haruk latusa fug.

¹⁸Ari fahet ap o pumbuk obog toho welahebon, alem nunggeyon An numalikisi unubam aruhumu holeg lit honoluk toho welamuhup!

¹⁹Kinang aru fam welahebon holeg lamok! Iren An nele sobir isaruk lit hiyag isaruk lahiyon embeselug alem eke hag eke hag turukon ari onggoken Anden hebeloho alem angginon it unubam umbuhuk.

²⁰Nungge fahet o Syeba inowen amben fano angge men o winama yatman oho saho unduk fanowon An nubahet umbul ulug walug waharuk lahep? Hit hunubabut haleg eleg angge An fahet wam yaltuk lahebon ari Anden fano peruk lahi fug. Hiren An fahet wam esetuk lahebon ari fam nindi nahiyehap naptuk lahep fug.

²¹Ari roho turukmu An Allahn nele uruk lahiyon tu: Ap aruma laruk ambeg funggalma Anden helep yaho fuhukmu unuyug ahap sultuk turuk lit fuk toho unusuhu. Iniknisiyet unumalikisiyet onori walinggoho werehon obog toho waroho lin uhup,” irisi.

²²NINIKNI Allah ele uruk lit, ”Ap ununggul unuk eke ik eleruk filen waharuk. Ap o pumbuk suwon kinang atog filen enebe anggolo luhaloho henembeg aruma waharukon fahet tem toho uruk lahi.

²³It arimano ininggikmu minggin tog men fit men seneko waharuk lit ap inindi isa fug angge yuhun angge unusuruk. Ik humon aplohok mi-mi angge til wirig atuk hag toho ngik-ngog til waharuk. Tog silimu kul ulug sum, sing, sehen wep toho wam kuda fam lahalug hit o Yerusalem welahebon pin hunusuk oho waharuk,” irisi.

²⁴It seliyon waharuk urukon niren holtukukteg nininggik ine eleg atisi. Nenekolen nenemelmel toho wereg lit hiyap malik indag tamin ulug ouk waruk hag toho nunubam atisi.

²⁵Aben hiyag nisaruk lit, ”Ap seliyonen karog ayeg ambiyang wiltik-welte uruk lit kalem wal toho kahalik waharusareg werehen hit yabukmu sel ke la fug,” ulug hiyag nisarusa.

²⁶NINIKNI Allahn ele uruk lit, ”Hit An numalikisi enehangge fesi lahaboho fong watuk lit ul ke imbil-ambal uruk lamek! Amloho misig enehon war atukmu isingan fong watuk hag toho uba yatuk lamek! Hinindi ouken hunu sini uruk lamek! Hit henepeleg toho welahepma hunusuruk inap arimano horogma waharuk,” irisi.

²⁷NINIKNI Allahn an Yeremia nubam ele uruk lit, ”Haren numalikisi unubabut kim isalug wal isaruk laruhun ulug Anden unduhuk hubaharikik,” ulug Allahn hiyag nitisi.

²⁸It obog toho ununggul uwag arik teg lit Allah ele ying tul ulug ap enebug il laruk lit amben siyahon eneg turuk.

²⁹Melei il yanggo amag ulug indok olok anggolowon fam iringguruk angge famen siyag angge ine roho tag tehen eleg am fug angge wereg hag toho siyag ane turuk inap oho eneko wili fusuk fug teg.

³⁰NINIKNI Allahn Israel inap indam fano angge hag toho mumal enepfag angge famen iren siyag ane turukon fahet hik isarisimu ununuk salikap toho ”Fano angge Aren hik isarisiyon” suwaluhup!