Read Angguruk Yali YEREMIA 7 Bible Online

YEREMIA 7 - Angguruk Yali bible

YEREMIA 7

¹NINIKNI Allahn an Yeremia hiyag nutuk lit,

²”An HINIKNI Allah nibam sokolma in arik lamihinteg Yehuda inap sembahyang ul ulug sok elma kurukon hiyag isamihin ane tu: Allah pohol ha kinang ha senehon Israel ninap NINIKNI inowen ele urukon tu holeg lamok, ’Hiren siyag ane turuk lahebon embeselug hunubabut hal amuhup halug Anden hit fet henesugmu o aruwen hinindi yuwag toho welamuhup.

⁴Hinindimu haleg eleg anggeyen henembilik famen eneg, ’NINIKNI Allah ibam tu wereg, NINIKNI Allah ibam tu wereg, NINIKNI Allah ibam tu,’ uruk lahep ane ariyen fano amuhuk puk fug!

⁵Hiren siyag ane turuk lahebon fahet nenembiken turuk latukuk peruk lit hunubabut haltuk lamuhup! Hareyon pikirap turuk lit we tem toho honori men let-ler atuk lamuhup!

⁶Ap pohon, hiyap yuwohon, malik suwarehon arimano men apmayap enebuhup fug! O aruwen ap siyag ane turuk eleg inap enemep hinang enebuk fug! Alem angginon hit hunubam aruhu rohon ap winonen niniknisi ulug wel eneptukon onombolim lahup fug!

⁷Anden ihiyon aru holtuk lamuhup halug kinang hunumbasi og isarik iyahon aru fam Anden hit fet henesugmu hinindi yuwag toho welamuhup.

⁸We hit hinindimu haleg eleg anggeyen henembilik famen eneg uruk lahebon ariyen fano amuhuk peruk lahep.

⁹Hiren ap enenggengge hilaruk lit ap unusuruk lit hiyap paltuk lit tem toho ihi uruk anggeyen henele si ane uruk lit Baal fahet nunumba ulug wam yaltuk lit ap winonen niniknisi ulug wel eneptukon henepelehon onombolim laruk lahep angge famen

¹⁰An nalukema watlug o An nunuk fam wirig ibam aruwen unduhuk lit, ’Allahn fet nenesugmu fano welahe,’ uruk lahep anggeyen nin amben siyahon til laruk lahep.

¹¹O An nunuk fam wirig ibam aru fahet hiren perukon te ap enengge hirag taruk inap inibam tu peruk lahep? Hiren siyag ane turuk lahebon obog toho Anden yet hisaruk lahi ulug An HINIKNI Allahn nele uruk lahi.

¹²Indam An nunuk wel naptuk latfag ibam o Silo ino yet ha lalihipteg An numaliki Israel inaben siyag ane eneg turuken siyaha fisiyagma olun atfahon ino yet ha lalihip!

¹³Anden hit hunubam nele irikik warikikmu hiren holuk fug angge ambi ane eneg til-wil laruk latikip. Anden wol heneptukmu hiren hebeloho wo uruk latikip fugmu

¹⁴ketiya An nibam aruwen fano amuhuk peruk lahep ibam tu oho kinang hunumbasi og isiyahon ino oho Anden atam o Silo siyahap tiyag hag toho siyaha fusuhuk.

¹⁵An nolohotman honori Israel inap yanggal eneptikik hag toho hir oho ambi roho yanggal henebuhuk,’ ehek,” ulug NINIKNI Allahn an Yeremia feneyen Israel inap unubam ele hiyag isarisi.

¹⁶NINIKNI Allah ele an Yeremia nubam uruk lit, ”Haren ap aruma fahet nubam sembahyang uk fug! Hele hine roho windat enebin ulug it fahet heng nabuhun fug! Haren let enebin, let enebin ulug nubam uhunmu Anden hat hele holuhuk fug.

¹⁷Iren o Yehuda pumbuk ele ke men o Yerusalem funggalem ke men turuk ane ari haren isaruk lahen fug?

¹⁸Maliken e witil larukmu iniknisiyen indok munggaltikim hiyaben roti tag toho wiratukon nunumba hiyap angge poholma wereg perukon fahet emberukmu ap arimanowen Allah indi siyahap tul ulug ap winonen nunumbasi ulug wel eneptukon onolohotma ik hililtuk.

¹⁹Iren Allah indi siyahap tul ulug turuk angge famen hebeloho ininggareg inindi siyahap tarukon ariyen ininggali hahup.

²⁰Alem ari fahet An HINIKNI suwon Allahn uruk lahiyon tu: An nundama ahe laharukon ari indok ambulpul hahon An nunuk wel naptuk ibam tu fam hik isahukmu abet wamet e farema werehonet suburu homet obog toho arimano indoken narukmen eneg war am fug angge welaruhu,” ulug hiyag nitisi.

²¹Allah pohol ha kinang ha senehon Israel ninap NINIKNI inowen ele uruk lit, ”Wam yaltukon men esetukon men arimano palu lahabil laharuk lit esetil wiratil laruk lit narukmen eneg fano henehum ouk amag!

²²Anden hunumbusagsi o Mesiren hondog eneplug wilip atuk lit An fahet wam yaltukon men esetukon men emberuk lamuhup ulug hiyag isarik iyag fug.

²³Anden hiyag isarik iyahon te iminon tu fahet eneg hiyag isarik iyag: Hiren An nele holeg lit welamuhup halug hit An numalikisi weregma An hit Hinikni aruhuk. Kebunggalem fanowon hiyag isaruk lahiyon ino laruk lamuhup halug henehiyeg toho welamuhup ulug hiyag isarik iyag angge famen

²⁴iren At ele holtul fug ulug inisanggo lare felug inindi haro roho wereg lit un ane wenggeltukon ino mutug eneg laruk lit An enembolmayap naplug eneluke yig nutuk latfag fug.

²⁵Indam unumbusagsi o Mesiren wilip atfag liyen tulug namingmingangge wene hiyag isaruk inap nabi arimano eke sambil eke sambil mon eneptukmen eneg ketiya oho mon eneptuk lahi angge famen

²⁶iren An nele sobir isalug enenduhun yig nutukon ari unumbusagsiyen turuk latfahon arimano apma regma iren siyag ane anggolo turukon arimano mondabi palimu reg.

²⁷Anden uruk lahiyon ari obog toho haren it hiyag isahunmu hele holuhup fug. Hele ine roho uhunmu oho iren hebeloho hubam enele uhup fugmu

²⁸haren it unubam uruk lit, ’Allah HINIKNI ele holtuk eleg hinap, Allahn komo heneptukon fahet ninirim uruk hinap welahep,’ uhun. An nubam inindimu wirik toho wenggeltukon ino eleg atisimu An nawene fahet enele uruk eleg,” irisi.

²⁹NINIKNI Allah ele uruk lit, ”An HINIKNI nolok haruk lahiyonen hit miyaloho hik hisarikikmu welahebon fahet honoruk hununggulmuwon hik isalug punu keyen hunu sini fam uba yatuk lamek!

³⁰Yehuda inaben An nolohotman tuk fug ane turuk lit filik angge amben siyahon fahet ninikni ulug o An nunuk fam wirig ibamen unduhuk feruk lit nibam siyahap turuk.

³¹Tonggo Hinom ino famen helep sengget watil laharusa ambeg unuk Tofet ino fam unumalikisi waroho indokma yaltuk. An nindimuwen peruk eleg ane hiyag isarikik fuhon it ininggarehen turuk lit indokma yaltuk.

³²Ari fahet fobik ununuk Tofet men Hinom men suwaleg ambeg ino eleg aruhumu unuk ”Ap Watuk Ambeg” suwaluhup. Ap warehon saltuk ambeg elehen o Tofet ino fam sal enebik kuruk lamuhup.

³³Ap war atukon arimano winon suwe pohol ke larukon men fare mene menen suburuwap eneptukmu ap misihen oho yanggal eneptuk laruhu fug.

³⁴O Yehuda pumbuk ke, Yerusalem funggalem ke aben yunggultukon men inda yatukon men aben hiyap ket hilalug enehiyeg toho werehon oho Anden eleha fusuhukmu o pumbuk aruma fare ingga lahaku.