Read Angguruk Yali YEREMIA 8 Bible Online

YEREMIA 8 - Angguruk Yali bible

YEREMIA 8

¹Ari tuhu sambil Yehuda inap iniknisi raja unuwag oho onowesi suwon unuwag oho Allah ibam foroho inap imam unuwag oho wene hiyag isaruk inap nabi unuwag oho o Yerusalem inap arimano unuwag men sal enepfag ambehen lisoho wahupteg

²obog toho sal enebuk fug angge umbusuhupmu kinang amug war amag. Mo men pikalem men suhal inindi reg lit unubam ninikni ulug mug eneplug umung eneptuk lit wel eneptuk latusa ane hikit toho enepma unuwag arimano siraloho emberuk lamuhup.

³Ap onolok inap welamuhubon arimano obog toho Anden o kema-kema hik isahukmu fano war ala angge famen nonoluk ninap welahe ulug ya nga uruk lamuhup,” ulug NINIKNI Allah pohol ha kinang ha seneg ahun inowen irisi.

⁴Ari irisireg NINIKNI Allahn an nubam ele uruk lit, ”HINIKNI Allahn ele ari roho irisi ulug An numalikisi hiyag isamihinon tu: Ap sa fuk toho ying atuk angge famen nin hebeloho in atuk eleg? Ap sa indi nonghong uruken kebunggalem hareyon laruk anggeyen nin suhuloho waharuk eleg?

⁵Nungge fahet Yerusalem inap arimano indamen tulug ketiya oho An numbahalug laruk lit fobik oho Allah ambeg hebeloho wamuhuk fug ulug usangge ap enele ying eneptukon onombolim larukmen eneg wereg?

⁶Anden it enele urukon fuki roho hol isarukmu misihen oho nambiken tirikik uruk eleg. Iren siyag ane turukon fahet wenggel haruk lit siyag ane tehe ulug ininggali haruk eleg. Aben tog abul ulug wam kuda fam lahalug folo-folo tog elma laruk hag toho it obog toho An numbahalug unuyug ilaluwe roho kebunggalem hareyon laruk.

⁷Suwe pohol ke larukon arimanowen Anden imbiyag li hikit toho kuk wilip am turuk. Suwe yalma, hilalim, pel menen oho Anden it fahet imbiyag li onoluk teg angge famen An numalikisi An HINIKNI Allahn tu men ari men turuk lamuhup ulug imbiyahon enepeleg.

⁸Hiren henembong se roho, ’Allah Wene seneg lahereg mun ane man ane nonoluk,’ uruk lahep angge famen Allah Wene nonoluk teg lahe uruk inaben Wene ino hareyap turuk lit un ane hiyag hisaruk.

⁹Mun ane man ane nonoluk uruk inap arimano ininggik hele waroho imbisik lahup sambil enekol haruk lit ininggaliyen enele uruk lamuhup fug. An INIKNI Allahn komo eneptuk lahiyon sobir isaruk inap arimano mun ane man ane onoluk teg ane ariyen windat enebuhu ano?

¹⁰Windat enebuhu fugmu unuhesi eneholani men iniyabuk men Anden ap winon og isahuk. It suwonet toronet nininggikmu anggolo welalep ulug ap enenggengge hilil laruk. An namingmingangge nabi men imam menen An numalikisi un ane hiyag isaruk.

¹¹Numalikisi unusurusama yowil tehon arimano hihit enebuk fug angge it unubam, ’Hayen-a, fano amuhup,’ ulug hiyag isaruk angge famen fano amuhup fug.

¹²Iren amben mondabi siyahon turukon fahet ininggali helep angge famen ininggali haruk ane enepeleg atuken enembong se roho wereg. Werehen Anden alem unubam umbuhuk sambil onori Israel inap winon men ambiyeg mako wambuhup ulug An HINIKNI Allahn uruk lahi,” irisi.

¹³NINIKNI Allahn nin ele uruk lit, ”Anggen yihikon tahamin ulug yet harukmen anggur anggen men sawe anggen men uk fug angge inggila ilim atisi. Ari fahet aben siyahap enebuhup ulug mon enebik waruhuk,” irisi.

¹⁴Ari irisimu Yehuda inaben enele uruk lit, ”Nit nenekolen nungge-nungge tuk fug angge heriyeg laheyon ari siyag. Ari fahet nit nenebe mangno roho o pumbuk elehet ineyon walinggoho ohowon undama hirag arik lulen maniyek. Lul ambehen war amuhuk halug oho fano. Nit NINIKNI Allah olohotman siyag ane turuk latukukon fahet ik olokon nalug war atuk ahik hinang nisahumu war amuhukon nonoluk.

¹⁵Fano amuhuk perukmen fano atukuk fug. Ouk nunubam werehon eleg aruhu perukmen eleg atuk elehen nenekol toho welahe.

¹⁶O Dan famen wam kuda ap seliyonen tohonen hag sararup turukmu hol haruk lahe. Enele kat-kar angge urukmu kinang obog toho yuk turuk. Yuk til waharuk lit mun angge man angge nenengginangma werehon obog toho ninibamet nenebeyet naruk lamuhup,” urusa.

¹⁷Ari urusama NINIKNI Allahn ele uruk lit, ”We tem toho hukalo ap unusurukon anggolo henembeg monde fik waruhukmu aben lukuram sipuk toho yanggal enebuhup angge famen oho fato heneptuk lamuhup,” irisi.

¹⁸An nundama ouk atisimu nindimu anggin toho wenggel haruk lahiyon eleg aruhu fug.

¹⁹Kinang atogman atogma an nori Israel inap arimano enekolen enele hi roho uruk lit, ”NINIKNI Allah tom Sion fam wereg eleg? Nit fet nenesuhon ino tom ino embeselug larisi ano?” urukmu hol isaruk lahi. Ari urukmu NINIKNI Allahn hiyag isaruk lit, ”Nungge fahet hit An numbahalug ap winonen nunumbasi ulug wel eneptuk angge onombolim laruk lit tu Allah hag toho wereg ulug laltuk angge alem elehon wel eneptuk lahep? Wel eneptuk lit An nindi siyahap naptuk lahep,” uruk.

²⁰Urukmu Israel inaben enele uruk lit, ”Let nenebik wamusa ulug nangno rurukmen eneg suburu yahaltuk li roti anggen paltuk li obog atisi angge famen ap misihen oho let nenebik waharisi fugmu asengseng toho welahe,” uruk.

²¹Uruk lit an nori asengseng haruk hag toho an oho asengseng haruk lahi. An nakolen namelmel toho wereg lit fong watuk lahi.

²²Nungge fahet an nori ouk warukon arimano nin hebeloho fano atuk eleg? Ahaluwe ap hihir eneptuk angge o Gilead kinang famen eleg atisi ano? Hal ahun ap hihir eneptukon oho o Gilead wereg eleg?