Read Angguruk Yali YEREMIA 9 Bible Online

YEREMIA 9 - Angguruk Yali bible

YEREMIA 9

¹An nunggul ik eleruk hag toho wereg lit nil ahaluweyen keleg teg lalepma an nori unusuruson fahet hubanggo unukoho kel ta fug angge uba yatukmen eneg welale.

²An nori Israel inap arimanowen Allah fam sali emberuson sobir isalug enebe mangno roho yaying-yaying ane ril norukon an nirim. Nirimen it embeselug lekma lelereg namu welale peruk lahi.

³Aben tog pising til laruk hag toho enele si ane il laruk. Enele tem toho uruk ane kinang tu famen eleg atisimu un ane eneg uruk. ”An INIKNI Allah fahet enepeleg atusareg onolok ane eke til eke til laruk,” ulug NINIKNI Allahn uruk.

⁴Hit honoriyen henele ying nenebuhup tohon ulug yet enesug lamuhup! Nowe noren enele si ane nunubam uruk eleg puk fug. Ap obog tohowen onori lal eneptuk lit owe ot fahet enebug il laruk.

⁵It-it enele ying-ying atukmen eneg enele wirik toho uruk ane eleg atisimu nenembilikmuwen un ane eneg uruk lamuhuk ulug milal taruk. Onolok ane fahet inindi reg lit nin hebeloho kalem pikiron larukon fahet ninirim peruk.

⁶Ap ekeyen eke siyahap tulug winon eke siyahap timin ulug laruk. Ap ekeyen eke lal halug winon eke lal hamin ulug laruk. Ari roho turuk lit it INIKNI Allah onoluk toho wereg ane fahet inirim haruk.

⁷Ari fahet NINIKNI Allah pohol ha kinang ha senehonen ele urukon tu, ”Numalikisi fano amuhup peruk lit mun ane man ane wal harikikteg nin eke nangginoho unubam tuhuk? An numalikisi unubabut hal amag ulug wal isahuk. Wal isahukon tu: Melei il yanggo amag ulug indokma iringguruk hag toho unubam tuhuk.

⁸Enembilikanggen tog fam ap unusurukon hag toho wereg. Onori fam nindi hasug lahi uruk angge famen inindimuwen nare yebangge fam luhur amag ulug kahal enesug.

⁹Iren ari roho turukon Anden nambolmayap tuhuk ano? Anden ayeg waroho alem angginon unubam umbuhuk ulug An HINIKNI Allahn uruk lahi.

¹⁰Allahn ele uruk lit, ”Yabuk punumu tonggoma obog toho lekma hag atisiyon fahet piya sini uruk lit uba yatuk lamek! Ap unuyug soptuk elegma wam ele oho teng atisi. Suwe pohol ke larukon oho pak mene oho mondabi linggik-longgo urusa.

¹¹O pumbuk Yerusalem oho Anden harep pisako pin unusuruk lit siyaha fusuhukmu olomene hirag atuk ambeg aruhu. O Yehuda pumbuk arimano oho oluna fusuhukmu ap eleg ambeg aruhu,” irisi.

¹²NINIKNI Allah, nanggintuk latusama o aru siyag atisireg lekma hag atisimu ap unuyug soptuk eleg? Ap san indi anggat teg lit nungge fahet o aru fam ari hag toho teko larisi ulug oluk atmisi? Ap sa Allah ambilik famen alem tu fahet hiyag itisi ahun wereg halug hiyag isa reg ano?

¹³NINIKNI Allah ele uruk lit, ”Anden komo eneptik iyag ane haharehon og isarik iyag angge famen iren An nele sobir isaruk latusa.

¹⁴Ununggul uwag arik teg lit unumbusagsiyen turuk latfag ane hikit toho Baal arimano unubam nunumbasi ulug wel eneptuk.

¹⁵Ari famen An Allah pohol ha kinang ha seneg lahiyon Israel inap INIKNI inowen nele uruk lahiyon tu holeg lamok: Anden ap aruma wam amiye sihon men nali humu men nalug war amag ulug og isahuk.

¹⁶Iren oho unumbusagsiyen oho isarusa fug inap wereg ke hik-hak isahukteg karog olokon lisoho mug isaruk lit unusuhuk,” irisi.

¹⁷NINIKNI Allah pohol ha kinang ha senehon inowen ele uruk lit, ”O aru fam teko larisi ane fahet hinindi wenggel hemek! Hiyap hunu sini onolukon wamag ulug wol eneplihip! Hunu sini ik wamusa ulug ap mon eneplihip!” irisi.

¹⁸Folo wamusareg nit welahe ane fahet hunu sini wilibusama nit uba longgon kali-kale uruk lit ubayen ninil hubun atmisi.

¹⁹O Sion famen piya sini wilip atukon holeg lamok: ”Yihi, nit mondabi siyag atuk lahe! Nit ninibam aben pin halog toho siyahap turusama nenengginang embeselug wilip atuk laheyon fahet nininggali anggolo atuk lahe,” ulug uba yatuk lit uruk.

²⁰Hit hiyap welahebonen NINIKNI Allah ambilik famen wilip atisiyon hinisanggoma kukag! Hit wal tanehen heneholani men henehebi men uba yatuk ane milal eneptuk lamuhubon tu,

²¹”Ap naruk angge sok ele keyen ninibam pumbukmu kik waha! Ap suwon inibam oho kehekteg malik toron kebunggalem ke ware feseruk lit kabiniyon pumbuk ele ke siyahap enebehek.

²²Yabukmu indok tuluk turuk hag toho ap obog toho waroho pilili isaruk. Aben walangge filohon pug tehon umu fil ahamu fil lin isalug ibam larukmu wereg hag toho ap arimano ari roho waroho lin uruk,” ulug NINIKNI Allah ele irisi.

²³NINIKNI Allahn nin ele uruk lit, ”Ap sa alem oluk tohon wereg halug ap inowen, ’An noluk nahun welahi,’ ulug awelwel ta fug! Ap sa ine wereg halug ap inowen, ’An nahako lahi,’ ulug suwap ta fug! Ap sa tung ahun wereg halug at inowen, ’An tung nahun welahi,’ ulug palimuwap ta fug!

²⁴Ap san ninggareg wel tamin peruk halug ap ariyen, ’An Allah noluk teg lit Aren perukon fahet nindi anggat teg lahi,’ ulug wel taruk laruhu. Allahn ap indi enesug lit enebe wal taneg let eneptuk lit hare ane kinangma werehon haloho pikirap turuk ulug ap ariyen An wel naptuk lamag! At inowen ari roho wel naptuk halug Anden fano puhuk,” irisi.

²⁵Ari irisireg NINIKNI Allahn nin ele uruk lit, ”Ap enembilahap palehon obog toho alem angginon unubam umbuhuk sambil horog aruhu.

²⁶Mesir inap, Yehuda inap, Edom inap, Amon inap, Moab inap, ap unuwal oruk herehon lekma wereg inap arimano obog toho enembilahap paleg angge famen inindimu enembilahap paleg eleg hag toho wereg. Weregma An numalikisi Israel inap arimano oho inindimu enembilahap paleg eleg hag toho wereg lit An nindi mondabi siyahap naptuk.